ବିଦ୍ୟୁତ ନିରାପତ୍ତା ନିୟମାବଳୀର ଉପଯୁକ୍ତ ରୂପାୟନ ପାଇଁ ରାଜ୍ୟସରକାରଙ୍କ ପକ୍ଷରୁ ଇମ୍ଫା ଚୌଦ୍ୱାର ୟୁନିଟ ପୁରସ୍କୃତ

#ଭୁବନେଶ୍ୱର(ଏନ୍‌.ଏମ୍‌.): କାର୍ଯ୍ୟକ୍ଷେତ୍ରରେ ବିଦ୍ୟୁତ ନିରାପତ୍ତା ନିୟମାବଳୀର ଉପଯୁକ୍ତ ରୂପାୟନ ପାଇଁ କଟକ ଜିଲ୍ଲା ଅନ୍ତର୍ଗତ ଇମ୍ଫା, ଚୌଦାର ୟୁନିଟ୍‌କୁ ଓଡ଼ିଶା ସରକାରଙ୍କ ଶକ୍ତି ବିଭାଗ ଜାତୀୟ ବିଦ୍ୟୁତ ନିରାପତ୍ତା ସପ୍ତାହ କାର୍ଯ୍ୟକ୍ରମରେ ପୁରସ୍କୃତ କରିଛନ୍ତି । ଚତୁର୍ଥ ଜାତୀୟ ବିଦ୍ୟୁତ ନିରାପତ୍ତା ସପ୍ତାହ ପାଳନର ଦ୍ୱିତୀୟ ଦିନରେ ଏହି ପୁରସ୍କାର ପ୍ରଦାନ କରାଯାଇଥିଲା । ଇମ୍ଫାକୁ ୨୦୨୨-୨୩ ବର୍ଷ ପାଇଁ ଏହି ପୁରସ୍କାର ପ୍ରଦାନ କରାଯାଇଛି । ରାଜ୍ୟ ସରକାରଙ୍କ ଶକ୍ତି ମନ୍ତ୍ରୀ ପ୍ରତାପ କେଶରୀ ଦେବଙ୍କ ଦ୍ୱାରା ପ୍ରଦାନ କରାଯାଇଥିବା ଏହି ପୁରସ୍କାରକୁ ଇମ୍ଫା ପକ୍ଷରୁ ବରିଷ୍ଠ ଉପସଭାପତି ତଥା ଫେରୋ ଆଲଏଜ୍ ବିଜିନେସ ୟୁନିଟ ମୁଖ୍ୟ ଦୀପକ ମହାନ୍ତି ଗ୍ରହଣ କରିଛନ୍ତି । ଇମ୍ଫା କଟକ ଜିଲ୍ଲା ଚୌଦାରସ୍ଥିତ ଫେରୋକୋମ୍ ପ୍ଲାଣ୍ଟରେ ଉତ୍ତମ ଶକ୍ତି ନିରାପତ୍ତା ପରିଚାଳନା ପାଇଁ ଏହି ପୁରସ୍କାର ଲାଭ କରିଛି । ଏହି ପୁରସ୍କାର ପ୍ରଦାନ ଉତ୍ସବରେ ଅନ୍ୟମାନଙ୍କ ମଧ୍ୟରେ ରାଜ୍ୟ ସରକାରଙ୍କ ଶକ୍ତି ବିଭାଗ ଅତିରିକ୍ତ ମୁଖ୍ୟଶାସନ ସଚିବ ନିକୁଞ୍ଜ ବିହାରୀ ଧଳ ଏବଂ ଶକ୍ତି ବିଭାଗର ଇଲେକ୍ଟ୍ରି ସିଟିର ସର୍ବୋଚ୍ଚ ଯନ୍ତ୍ରୀ ତଥା ପିସିଇଆଇ ସୁରେଶ ଚନ୍ଦ୍ର ମହାରଣା ପ୍ରମୁଖ ଉପସ୍ଥିତଥିଲେ । ପୁରସ୍କାର ଗ୍ରହଣ କରିବା ପରେ ଶ୍ରୀ ମହାନ୍ତି କହିଥିଲେ ଯେ, ନିରାପତ୍ତା ଆମ କାର୍ଯ୍ୟଶୈଳୀରେ ଏକ ବିଶେଷ ଅଙ୍ଗ । ଶକ୍ତି ସମ୍ବନ୍ଧୀୟ ନିରାପଦ କାର୍ଯ୍ୟ କ୍ଷେତ୍ର ପ୍ରସ୍ତୁତିକୁ ଗୁରୁତ୍ୱ ଦିଆଯାଇଥାଏ । ଏହି କାରଣରୁ ରାଜ୍ୟ ସରକାର ଇମ୍ଫାକୁ ସମ୍ମାନିତ କରିଥିବାରୁ ଆମେ କୃତଜ୍ଞତା ପ୍ରକାଶ କରୁଛୁ ।