ନୂତନ ଶିଳ୍ପ ଗଢିବା ଉଦ୍ଦେଶ୍ୟରେ ଏକାଠି ହେଲେ ଚୌଦ୍ୱାର ଅଞ୍ଚଳ ବାସୀ

#ଚୌଦ୍ୱାର(ଏନ୍‌.ଏମ୍‌.): ଏକଦା ଏସିଆ ମହାଦେଶରେ ନାମ କରିଥିବା ଶିଳ୍ପ ନଗରୀ ଭାବେ ପରିଚୟ ସୃଷ୍ଟି କରିଥିବା ଚୌଦ୍ୱାର ଅଞ୍ଚଳ ଏବେ ଶିଳ୍ପହୀନ । କାହିଁ କେତେ ବର୍ଷରୁ ସାରା ଦେଶରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଥିବା ବେଳେ ଏବେ କିନ୍ତୁ ଜରାଜୀର୍ଣ୍ଣ । ସୂଚନା ମୁତାବକ ଚୌଦ୍ୱାର ଅଞ୍ଚଳରେ ଥିବା ଓଟିଏମ୍ ସୂତାକଳ, ବଲାରପୁର୍ କାଗଜକଳ, ଚୌଦ୍ୱାର ଲିବ୍ରା କାର୍ପେଟ ସମେତ ଗୋପାଳପୁର ରେ ରହିଥିବା କମ୍ପାନୀ ମାନ ଆଜି ସବୁ ଦୀର୍ଘ ବର୍ଷ ଧରି ବନ୍ଦ ହୋଇ ପଡ଼ିରହିଛି । ଯାହା ଫଳରେ ହଜାର ହଜାର ଲୋକ ନିଜର ଜୀବନ ଜୀବିକା ହରାଇବା ସହିତ ବହୁ ଦୁଃଖ କଷ୍ଟରେ ରେ ଜୀବନ ଜାପନ କରୁଛନ୍ତି । ତେବେ କେବଳ ଚୌଦ୍ୱାର ଅଞ୍ଚଳ ର ନୁହେଁ ରାଜ୍ୟ ତଥା ରାଜ୍ୟ ବାହାରୁ ଅନେକ ଲୋକ ମଧ୍ୟ ସମସ୍ତେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ତେବେ ବିଶେଷ କରି ଓଟିଏମ୍‌, ଲୀବ୍ରା, ଓ କାଗଜକଳ ଏସବୁ କମ୍ପାନୀ ପ୍ରାୟ ୨୦ବର୍ଷରୁ ଉର୍ଦ୍ଧ୍ୱ ଦିନ ହେବ ବନ୍ଦ ହୋଇ ପଡ଼ିରହିଛି । ଯାହା ଫଳରେ ଚୌଦ୍ୱାର ତାର ପୁରୁଣା ଅସ୍ତିତ୍ୱକୁ ଆଜି ହରାଇ ବସିଛି । ତେବେ ଦୀର୍ଘ ଦିନ ଧରି ଏସବୁ କମ୍ପାନୀ ବନ୍ଦ ରହିବ ଫଳରେ ଏହାର ରକ୍ଷଣବେକ୍ଷଣ ଅଭାବ ସମେତ ଏହି କମ୍ପାନୀମାନଙ୍କରୁ ସବୁ ଜିନିଷ ଚୋରି ହେବା ସହିତ ନଷ୍ଟ ମଧ୍ୟ ହୋଇଯାଉଛି । ମୋଟ ୧୨୨୨ ଏକର ଜାଗାରେ ୩ଟି ଶିଳ୍ପ ଗଢି ଉଠିଥିବା ବେଳେ ପ୍ରତ୍ୟକ୍ଷ ଓ ପରୋକ୍ଷ ଭାବରେ ୧୫ହଜାରରୁ ଉର୍ଦ୍ଧ୍ୱ ଶ୍ରମିକ ନିଜର ଗୁଜୁରାଣ ନିର୍ବାହ କରୁଥିଲେ । ବିଶେଷ କରି ପ୍ରବାଦ ପୁରୁଷ ସ୍ୱର୍ଗତ ବିଜୁ ପଟ୍ଟନାୟକଙ୍କ ଦ୍ୱାରା ନିର୍ମିତ ହୋଇଥିବା ଓଟିଏମ କଥା କହିଲେ ନସରେ ଦିନେ ଯାହାକୁ ନିଜ ହାତରେ ଗଢିଥିଲେ ଏବେ ସେ ଶ୍ରୀହୀନ ହୋଇ ପଡ଼ିରହିଛି । ତେବେ କିଛି ମାସ ତଳେ ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଟିଏମ୍ ଜାଗାରେ ଏକ ଟେକଷ୍ଟାଇଲ ପାର୍କ ହେବା ନେଇ ଘୋଷଣା କରି କିଛି ମାସ ତଳେ ୩ହାଜର କୋଟି ଟଙ୍କାରେ ୱେଲସ୍ପେନ କମ୍ପାନୀକୁ ଏହାର ଦାୟିତ୍ୱ ଦେଇ ଶିଳାନ୍ୟାସ କରିଥିଲେ । ମାତ୍ର ଏ ପର୍ଯ୍ୟନ୍ତ ଏ ନେଇ କୌଣସି ପ୍ରକ୍ରିୟା ଦେଖିବାକୁ ମିଳୁନାହିଁ । ଫଳରେ ସମଗ୍ର ଚୌଦ୍ୱାର ଅଞ୍ଚଳର ଲୋକଙ୍କ ମନରେ ଦ୍ୱନ୍ଦ ଲାଗି ରହିଥିବା ଦେଖିବାକୁ ମିଳିଛି । ଏନେଇ ରାଜ୍ୟ ବିଜେପି ଓବିସି ମୋର୍ଚ୍ଚା ସଭାପତି ଚୌଦ୍ୱାର ଅଞ୍ଚଳର ଜ୍ଞାନେନ୍ଦ୍ର କୁମାର ସ୍ୱାଇଁଙ୍କ ଅଧ୍ୟକ୍ଷତାରେ ଏବଂ ସଚେତନ ନାଗରିକ ମଞ୍ଚର ଆବାହକ ସତ୍ୟବ୍ରତ ଦାସଙ୍କ ମିଳିତ ଉଦ୍ୟମରେ ଆଜି ଚୌଦ୍ୱାର ଓ ଏହାର ଆଖପାଖ ଅଞ୍ଚଳରୁ ସମସ୍ତ ବୁଦ୍ଧିଜୀବୀ ମାନଙ୍କ ଠାରୁ ଆରମ୍ଭ କରି ଘରଘର ବୁଲି ବନ୍ଦ ପଡ଼ିଥିବା ସମସ୍ତ କମ୍ପାନୀକୁ ପୁନଃ କାର୍ଯ୍ୟକ୍ଷମ କରିବା ଉଦ୍ଦେଶ୍ୟରେ ଦସ୍ତଖତ ଅଭିଯାନ ଆରମ୍ଭ କରିଛନ୍ତି । ପରେ ଏହାକୁ ରାଜ୍ୟ ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁଙ୍କ ନିକଟରେ ପ୍ରଦାନ କରାଯାଇ ଯଥାଶୀଘ୍ର ସମସ୍ତ କମ୍ପାନୀ ଗୁଡ଼ିକୁ କାର୍ଯ୍ୟକ୍ଷମ କରିବା ପାଇଁ ନିବେଦନ କରାଯିବ । ଏହି କାର୍ଯ୍ୟକ୍ରମରେ ବିଜେପିର ଜିଲ୍ଲା ଉପସଭାପତି ପ୍ରଶାନ୍ତ ହୋତା, ଇନ୍ଦ୍ରାଣୀପାଟଣା ପୂର୍ବତନ ମଣ୍ଡଳ ସଭାପତି ରମେଶ ଚନ୍ଦ୍ର ନାୟକ, ଲାଲ ମୋହନ ପରିଡ଼ା, ବିଶ୍ୱରଞ୍ଜନ ସ୍ୱାଇଁ, ସଞ୍ଜୟ ମହାରଣା, ଧିରଞ୍ଜନ ସିଂ, ଶଶିକାନ୍ତ ନାୟକ, ପବ୍ଲିକ ୱେଲ ଫେୟାର ସୋସାଇଟି ସାଧାରଣ ସମ୍ପାଦକ ଅଜିତ ସ୍ୱାଇଁ, ପ୍ରକାଶ ନାୟକ, ପ୍ରତାପ ଜେନା, ଜୟକୃଷ୍ଣ ସାହୁ ଏଭଳି ଅଭିଯାନକୁ ସମସ୍ତେ ପ୍ରଶଂସା କରିଥିବାର ଜଣାପଡିଛି ।