ଦୁର୍ଘଟଣା ଘଟାଇ ଫେରାର ହୋଇ ଯାଉଥିଲା ଟ୍ରକ୍; ଲୋକେ ଅଟକାଇବାରୁ ପିଟିଲେ ଆଇଆଇସି, କୁହୁଳୁଛି ଅସନ୍ତୋଷ !
#ଭଦ୍ରକ(ଏନ୍.ଏମ୍.): ଥାନା ବାବୁଙ୍କ ଦବଙ୍ଗଗିରି ଦେଖିବାକୁ ମିଳିଛି ଭଦ୍ରକ ଜିଲ୍ଲା ବନ୍ତ ଥାନା ଅଞ୍ଚଳରେ । ଗୋଟିଏ ପଟେ ଦୁର୍ଘଟଣା ଘଟାଇ ପଳାଇ ଯାଉଥିବା ଗାଡ଼ିର ଡ୍ରାଇଭରଙ୍କ ବିରୋଧରେ ରନ ଆଣ୍ଡ ହିଟ ଧାରା ଲାଗୁ ହେବା ପାଇଁ ନିୟମ ହୋଇଥିବାବେଳେ ଦୁର୍ଘଟଣା ଘଟାଇ ପଳାୟନ କରୁଥିବା ଏକ ଟ୍ରକକୁ ଅଞ୍ଚଳବାସୀ ଅଟକାଇବା ଅପରାଧରେ ପୁଲିସ ବାବୁଙ୍କ ଦବଙ୍ଗ ଗିରି ଦେଖିବାକୁ ମିଳିଥିଲା । ତେବେ ପୁଲିସ ବାବୁ ଜଣକ ଏଭଳି ପକ୍ଷପାତ ନୀତି ଆପଣେଇ ଅଞ୍ଚଳରେ ଅପରାଧ ଓ ଅପରାଧୀଙ୍କୁ ପ୍ରୋତ୍ସାହିତ କରୁଥିବା ଭଳି ସଂଗୀନ ଅଭିଯୋଗ ଆସିଛି । ଏପରିକି ସମ୍ପୃକ୍ତ ଅଧିକାରୀ ଜଣକ ଦୁଇଦିନ ତଳେ ବଦଳି ହୋଇଥିଲେ ମଧ୍ୟ ଥାନାରେ ରାଜୁତି ଚଳାଇଥିବା ଦେଖିବାକୁ ମିଳିଛି । ଯାହାକୁ ନେଇ ଅଞ୍ଚଳବାସୀ ସମ୍ପୂର୍ଣ୍ଣ ପୁଲିସ ବିଭାଗ ପ୍ରତି ଅଙ୍ଗୁଳି ଉଠାଇଛନ୍ତି । ପ୍ରାପ୍ତ ସୂଚନା ଅନୁଯାୟୀ ବନ୍ତ ଥାନା ଆଇଆଇସି ଦବଙ୍ଗଗିରି ଚଳାଉଥିବା ଅଭିଯୋଗ ହୋଇଛି । ଦୁର୍ଘଟଣା ଘଟାଇଥିବା ଏକ ବାଲି ବୋଝେଇ ଟ୍ରକକୁ ସ୍ଥାନୀୟ ଲୋକେ ଅଟକାଇବାରୁ ସେ ନିଜ କ୍ଷମତାର ଦୂରପଯୋଗ କରିଛନ୍ତି । ଏପରିକି ରାସ୍ତା ଉପରେ ହିଁ ପୁଲିସ ବାବୁ ସାଧାରଣ ଲୋକଙ୍କୁ ନିର୍ଧୂମ ପିଟିଲେ । ଫଳରେ ବିଚ୍ ରାସ୍ତାରେ ମୁହାଁମୁହିଁ ହୋଇଛନ୍ତି ପୁଲିସ ଓ ସାଧାରଣ ଲୋକ । ବନ୍ତ ଥାନା ଛକରେ ଏଭଳି ଅଭାବନୀୟ ଘଟଣା ଘଟିଥିବା ବେଳେ ପୁଲିସ୍ ମାଡ଼ରେ ୪ ଜଣ ଆହତ ହୋଇଛନ୍ତି । ସୂଚନା ଅନୁଯାୟୀ, ବନ୍ତ ଥାନା ଅନ୍ତର୍ଗତ ଶ୍ରୀବନ୍ତପୁରୁରେ ଆଜି ସକାଳେ ଏକ ବାଲି ବୋଝେଇ ଟ୍ରକ୍ ଜଣେ ସ୍କୁଲ ପିଲାକୁ ଧକ୍କା ଦେଇ ଫେରାର ହୋଇ ଯାଉଥିଲା । ସ୍ଥାନୀୟ ଲୋକମାନେ ଗୋଡ଼ାଇ ଗୋଡ଼ାଇ ଟ୍ରକଟିକୁ ବନ୍ତ ଥାନା ଛକରେ ଅଟକାଇଥିଲେ । ଖବର ପାଇ ବନ୍ତ ଥାନା ଆଇଆଇସି ବଲ୍ଲଭ ସାହୁ ଘଟଣାସ୍ଥଳରେ ପହଞ୍ଚି କାହିଁକି ଗାଡ଼ି ଅଟକାଇଛ ବୋଲି ପ୍ରଶ୍ନ କରିଥିଲେ । ଏହାକୁ ନେଇ ସାଧାରଣ ଜନତା ଓ ପୁଲିସ ମଧ୍ୟରେ ଉଚ୍ଚବାଚ ହୋଇଥିଲା । ପୁଲିସ କର୍ମୀ ହଠାତ୍ ସାଧାରଣ ଲୋକଙ୍କୁ ଘଉଡାଇବା ସହ ନିର୍ଧୂମ ପିଟିଥିଲେ । ଏଥିରେ ୪ଜଣ ଆହତ ହୋଇଛନ୍ତି । ସେମାନଙ୍କୁ ପ୍ରଥମେ ବନ୍ତ ମେଡିକାଲରେ ଭର୍ତ୍ତି କରାଯାଇଥିବା ବେଳେ ସେଠାରୁ ଭଦ୍ରକ ରେଫର୍ କରାଯାଇଛି । ତେବେ ଏହି ରାସ୍ତା ଦେଇ ଦିନବେଳେ ଭାରୀଯାତ ଯାତାୟତ ନକରିବା ନିମନ୍ତେ ଉପଜିଲ୍ଲାପାଳ ନିର୍ଦ୍ଦେଶ ଦେଇଥିଲେ ମଧ୍ୟ ଏହି ଥାନା ବାବୁ ଜଣକ ଉତ୍କୋଚ ନେଇ ସମସ୍ତ ନୀତିନିୟମକୁ ଜଳାଞ୍ଜଳି ଦେଇ ମେରୀ ରାୟ ଚଳାଇଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ଏହାକୁ ନେଇ ଅଞ୍ଚଳରେ ତିବ୍ର ଅସନ୍ତୋଷ ପ୍ରକାଶ ପାଇବା ସହ ଏହି ଘଟଣାରେ ଭଦ୍ରକ ଏସପି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ନକଲେ ଆଗାମୀ ଦିନରେ ଯେଉଁ ପରିସ୍ଥିତି ସୃଷ୍ଟି ହେବ ସେଥିପାଇଁ ପୁଲିସ ବିଭାଗ ହିଁ ଦାୟୀ ରହିବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି ।