ଦଲାଲଙ୍କ କବ୍ଜାରେ ସିଏମସି ବିକାଶ ଭବନ: ଦୃଢ଼ କାର୍ଯ୍ୟାନୁଷ୍ଠାନ ଦାବି କଲା “ମୋ କଟକ ସୁରକ୍ଷା ମଞ୍ଚ’
ଜନ୍ମମୃତ୍ୟୁ ସାର୍ଟିଫିକେଟ୍ ପାଇଁ ଦଲାଲ ନେଉଛନ୍ତି ୨ରୁ ୩ ହଜାର ଟଙ୍କା
କଟକ(ଏନ୍.ଏମ୍.): ସିଏମସି ବିକାଶ ଭବନରେ ଜନ୍ମମୃତ୍ୟୁ ପଞ୍ଜିକରଣ ସାର୍ଟିଫିକେଟ୍ ପାଇଁ ଦୂରଦୂରାନ୍ତରୁ ଲୋକମାନେ ଆସି ଦଲାଲର ଶିକାର ହେବାପରେ ମଧ୍ୟ ସିଏମସି ତରଫରୁ କୌଣସି କାର୍ଯ୍ୟାନୁଷ୍ଠାନ ନେଉନଥିବା ଯୋଗୁଁ ଦଲାଲଙ୍କ ପ୍ରାର୍ଦୁଭାବ ବଢ଼ିବାରେ ଲାଗିଛି। ଏହି ଦଲାଲଙ୍କ ସହ ସିଏମସିର କର୍ମଚାରୀ ସାମିଲ ଥିବା ଯୋଗୁଁ ସିଏମସି କର୍ତ୍ତୃପକ୍ଷ ନୀରବ ରହୁଥିବା ମନେହେଉଛି। ଦଲାଲମାନେ ନିର୍ଭୟରେ ବେଆଇନ କାର୍ଯ୍ୟ କରୁଛନ୍ତି। ଏହାଦ୍ୱାରା ଅନେକ ଲୋକ ଦଲାଲର ଶିକାର ହୋଇ ଅସୁବିଧାର ସମ୍ମୁଖୀନ ହେଉଛନ୍ତି। ଏହି ଦଲାଲମାନେ ଦୀର୍ଘବର୍ଷ ହେବ ଏଠାରେ ରହି ଲୋକଙ୍କ ଠାରୁ ଅର୍ଥଶୋଷଣ କରୁଥିବା ଦେଖାଯାଉଛି। ଜେପିଏନ ଠିକା ସଂସ୍ଥାର ଶତାଧିକ କର୍ମଚାରୀ ସିଏମସିରେ କାର୍ଯ୍ୟ କରୁଥିବା ବେଳେ ସେମାନଙ୍କ କାର୍ଯ୍ୟକଳାପ ଉପରେ ସନ୍ଦେହ ସୃଷ୍ଟି ହୋଇଛି। ସିଏମସି ବିକାଶ ଭବନରେ କାର୍ଯ୍ୟରତ ଜେପିଏନ ଠିକାସଂସ୍ଥାର ସୁରକ୍ଷା କର୍ମୀ ଜଗନ୍ନାଥ ପଣ୍ଡା ଦଲାଲ ସାଜି ଦେବଗଡର ପ୍ରିୟଦର୍ଶିନୀ ସାହୁଙ୍କ ସ୍ୱାମୀ ୰ମନୋଜ ସାହୁଙ୍କ ମୃତ୍ୟୁ ପଞ୍ଜିକରଣ ସାର୍ଟିଫିକେଟ୍ କରାଇଦେବା ପାଇଁ ମୃତକଙ୍କ ସମ୍ପର୍କୀୟ ଭାଇ ଗୁରୁଚରଣ ସାହୁଙ୍କ ଠାରୁ ୧୩ଶହ ଟଙ୍କା ନେଇଥିଲେ। ଟଙ୍କା ଦେଇ ସାର୍ଟିଫିକେଟ୍ ପାଇଁ ବାରମ୍ବାର ଦୌଡି ଦୌଡି ଗୁରୁଚରଣ ନିରାଶ ହୋଇଥିଲେ। ମୃତ୍ୟୁର ଏକମାସ ବିତିଗଲା ପରେ ସାର୍ଟିଫିକେଟ୍ ନପାଇବାରୁ ଗୁରୁଚରଣ ଓ ପରିବାର ସୁଦୂର ଦେବଗଡରୁ ଆସି ଅଗଷ୍ଟ ୯ତାରିଖରେ ବିକାଶ ଭବନ ଜନ୍ମମୃତ୍ୟୁ ପଞ୍ଜିକରଣ କାଉଣ୍ଟରରୁ ଜାଣିବାକୁ ପାଇଥିଲେ କି କୌଣସି ସାର୍ଟିଫିକେଟ୍ ପାଇଁ ଆବେଦନ ହୋଇନାହିଁ। ଏହାପରେ ଗୁରୁଚରଣ ବିକାଶ ଭବନର ଜନ୍ମମୃତ୍ୟୁ ପଞ୍ଜିକରଣ କାଉଣ୍ଟରରେ ଆବେଦନ କରିବା ସହ ଉକ୍ତ ଦଲାଲ ଜଗନ୍ନାଥ ପଣ୍ଡା ଓ ସହଯୋଗୀ ସାର୍ଟିଫିକେଟ୍ କରାଇଦେବା ପାଇଁ ଟଙ୍କା ନେଇ ସାର୍ଟିଫିକେଟ୍ ନଦେଇ ଠକିଥିବା ନେଇ ସିଏମସି ପରିମଳ ବିଭାଗ ଅଧିକାରୀ, କମିଶନରଙ୍କୁ ଅଭିଯୋଗ କରିଥିବା ଜଣାପଡିଛି। ଏହି ପରିପ୍ରେକ୍ଷୀରେ ଆଜି ମୋ କଟକ ସୁରକ୍ଷା ମଞ୍ଚ ସମ୍ପାଦକ ଜିତେନ୍ଦ୍ର ସାହୁଙ୍କ ନେତୃତ୍ୱରେ ସ୍ଥାନୀୟ ବାଦାମବାଡି ଥାନା ଅଧିକାରୀଙ୍କୁ ଘଟଣାର ସତ୍ୟାସତ୍ୟ ଅନୁସନ୍ଧାନ କରି ଉକ୍ତ ଦଲାଲ ଓ ସହଯୋଗୀଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ବିକାଶ ଭବନରେ ଦଲାଲଙ୍କ ଶୋଷଣରୁ ମୁକ୍ତିପାଇଁ ସଠିକ ପଦକ୍ଷେପ ଗ୍ରହଣ କରିବାପାଇଁଁ ଏକ ଦାବିପତ୍ର ଦେଇଛନ୍ତି। ଦାବିପତ୍ର ଦେବା ସମୟରେ ମଞ୍ଚ ସଭାପତି ଅକ୍ଷୟ ପଣ୍ଡା, ସହ-ସମ୍ପାଦକ ତଥା ୩୫ନମ୍ବର ୱାର୍ଡର କର୍ପୋରେଟର ଜେ.କାମେଶ୍ୱର ରାଓ ପ୍ରମୁଖ ଉପସ୍ଥିତ ଥିଲେ। ଦୂରଦୂରାନ୍ତରୁ ଆସୁଥିବା ଲୋକ ଜନ୍ମମୃତ୍ୟୁ ପଞ୍ଜିକରଣ ସାର୍ଟିଫିକେଟ୍ ପାଇବା ପାଇଁ ବିକାଶ ଭବନରେ ଦଲାଲର ଶିକାର ହୋଇଥିବା ବିଷୟରେ ବାରମ୍ବାର କାଉନସିଲ ବୈଠକରେ ଉଠିଥିଲେ ମଧ୍ୟ ଜେପିଏନ ସଂସ୍ଥା ଓ ସିଏମସି କର୍ମଚାରୀଙ୍କ ପ୍ରତି କମିଶନର, ମେୟର ନୀରବ ରହୁଥିବା ଦୁର୍ଭାଗ୍ୟ ଜନକ ବୋଲି ମଞ୍ଚ ପକ୍ଷରୁ କୁହାଯାଇଛି।