ତିଗିରିଆ ଅଞ୍ଚଳରେ ଦିନ ଦ୍ୱିପ୍ରହରରେ ଲୁଟ: ଫିଲ୍ମ ଷ୍ଟାଇଲରେ ମୁଖାପିନ୍ଧି ଟଙ୍କା ଭର୍ତ୍ତି ଭ୍ୟାନରୁ ଲୁଟିନେଲେ ୧କୋଟି ୭୦ ଲକ୍ଷ

#ଆଠଗଡ଼(ଏନ୍‌.ଏମ୍‌.): ସମ୍ପ୍ରତି ରାଜ୍ୟରେ ସୁରକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହୋଇ ପଡ଼ିଛି । ଏଟିଏମକୁ ଯାଉଥିବା ଭ୍ୟାନରୁ ଦିନ ଦ୍ୱିପ୍ରହରରେ ବନ୍ଧୁକ ମୁନରେ କୋଟିଏରୁ ଅଧିକ ଟଙ୍କା ଲୁଟ୍ ହୋଇଛି । କଟକ ଜିଲ୍ଲା ଆଠଗଡ଼ ଉପଖଣ୍ଡ ଅନ୍ତର୍ଗତ ତିଗିରିଆ ଥାନା ଅଞ୍ଚଳରେ ଶୁକ୍ରବାର ଅପରାହ୍ନରେ କିଛି ମୁଖାପିନ୍ଧା ଦୁର୍ବୃତ୍ତ ଏଭଳି କାଣ୍ଡ କରିଛନ୍ତି । ତେବେ ଟଙ୍କା ଲୁଟ୍ କରି ଅଭିଯୁକ୍ତମାନେ ଘଟଣାସ୍ଥଳରୁ ଚମ୍ପଟ ମାରିଛନ୍ତି । ପ୍ରାପ୍ତ ସୂଚନା ଅନୁସାରେ ଅପରାହ୍ଣ ପ୍ରାୟ ୨ଟା ବେଳେ ଏକ ଟଙ୍କା ଭର୍ତ୍ତି ଭ୍ୟାନ୍ ଆଠଗଡ଼ରୁ ବାହାରି ଥିଲା । ଟଙ୍କା ଭର୍ତ୍ତି ଭ୍ୟାନର କର୍ମଚାରୀମାନେ ପ୍ରଥମେ ଗୋଡ଼ିଝରିଆସ୍ଥିତ ଭାରତୀୟ ଷ୍ଟେଟ୍ ବ୍ୟାଙ୍କ (ଏସବିଆଇ)ର ଏଟିଏମରେ ଟଙ୍କା ଭର୍ତ୍ତି କରିଥିଲେ । ଏହା ପରେ ସେଠାରୁ ଟଙ୍କା ଭର୍ତ୍ତି ଭ୍ୟାନଟି ତିଗିରିଆ, ନୂଆପାଟଣା ସମେତ ମୋଟ ୧୩ଟି ଏଟିଏମରେ ଟଙ୍କା ଭର୍ତ୍ତି କରିବା ପାଇଁ ଆଗକୁ ବଢ଼ିଥିଲା । ଭ୍ୟାନରେ ଥିବା ଘରୋଇ କମ୍ପାନିର କର୍ମଚାରୀମାନେ ଲୁଟ୍ ପୂର୍ବରୁ ୪ଟି ଏଟିଏମରେ ଟଙ୍କା ଭର୍ତ୍ତି ସାରିଥିଲେ । ତେବେ ଗୋଡ଼ିଝରିଆ ଠାରୁ ନୂଆସଡ଼କ ଅଭିମୁଖେ ଯିବା ରାସ୍ତାରେ ଥିବା ଏକ ରାଇସମିଲ ନିକଟରେ ଟଙ୍କା ଭର୍ତ୍ତି ଭ୍ୟାନ୍ ଉପରକୁ ଟେକା ମାଡ଼ ହୋଇଥିଲା । ଫଳରେ ଚାଳକ ଭ୍ୟାନର ଗତି ଧିମାଇବା କ୍ଷଣି ଏହି ସମୟରେ ଟଙ୍କା ଭର୍ତ୍ତି ଭ୍ୟାନ୍ ସାମ୍ନାକୁ ଏକ ନମ୍ବର ବିହୀନ ଧଳା ସ୍କୋର୍ପିଓ ସାମ୍ନାକୁ ଆସିଥିଲା । ଏହାର ଅଳ୍ପ ସମୟ ମଧ୍ୟରେ ଏକ ସ୍କୁଟି ସମେତ ୨ଟି ବାଇକରେ ମୁଖାପିନ୍ଧା ଦୁର୍ବୃତ୍ତମାନେ ପହଞ୍ଚିଥିଲେ । ମୋଟ ୩ଟି ଗାଡ଼ିରେ ୮ରୁ ୯ ଜଣ ମୁଖାପିନ୍ଧା ଦୁର୍ବୃତ୍ତ ଟଙ୍କା ଭ୍ୟାନ୍ ସାମ୍ନାରେ ପହଞ୍ଚିଲା ପରେ ବନ୍ଧୁକ ଦେଖାଇ ଭ୍ୟାନର ୪ଜଣ କର୍ମଚାରୀଙ୍କୁ ଭୟଭୀତ କରାଇଥିଲେ । ଏଥି ସହିତ ଗାଡ଼ିରେ ଥିବା ପ୍ରାୟ ୧ କୋଟି ୭୦ ଲକ୍ଷ ଟଙ୍କା ଭର୍ତ୍ତି ଥିବା ବାକ୍ସକୁ ଲୁଟ୍ କରି ଘଟଣାସ୍ଥଳରୁ ଫେରାର ହୋଇ ଯାଇଥିଲେ । ଲୁଟ୍ ସମ୍ପର୍କରେ ସୂଚନା ପାଇ ଘଟଣାସ୍ଥଳରେ କଟକ ଏସପି (ଗ୍ରାମାଞ୍ଚଳ) ମିହିର କୁମାର ପଣ୍ଡା, ଆଠଗଡ଼ ଏସଡିପିଓ ରବୀନ୍ଦ୍ର କୁମ।।ର ମଲ୍ଲିକ, ତିଗିରିଆ ଆଇଆଇସି ଜ୍ଞାନ ରଞ୍ଜନ ସାମଲ ପହଞ୍ଚି ତଦନ୍ତ ଚଳାଇଛନ୍ତି । ପୁଲିସ ଭ୍ୟାନର କର୍ମଚାରୀମାନଙ୍କୁ ପଚରାଉଚରା କରୁଛି । ପାରିପାର୍ଶ୍ୱିକ ପରିସ୍ଥିତି ଅନୁସାରେ ଘଟଣାସ୍ଥଳର ତଦନ୍ତ ଜାରି ରହିଛି ।