ଜଗତପୁରରେ ସିଏମସି ଉଚ୍ଛେଦର ଦ୍ୱିତୀୟ ଦିନ: ପ୍ରଶାସନିକ ପକ୍ଷପାତିତା ନେଇ କୁହୁଳୁଛି ଅସନ୍ତୋଷ !

#ଜଗତପୁର(ଏନ୍‌.ଏମ୍‌.): ସିଏମସି ୪୮ନମ୍ବର ୱାର୍ଡ ଜଗତପୁର ଅଞ୍ଚଳରେ ଆଜି ୨ୟ ଦିନରେ ଉଚ୍ଛେଦ ପ୍ରକିୟା ଚାଲିଛି । ମାତ୍ର ଏହି ଉଚ୍ଛେଦ କାର୍ଯ୍ୟ ପରିଚାଳନା କରୁଥିବା ପ୍ରଶାସନିକ ଅଧିକାରୀ ଏଥିରେ ପକ୍ଷପାତିତା ପ୍ରଦର୍ଶନ କରୁଥିବା ଅଭିଯୋଗ କରି ଅଞ୍ଚଳବାସୀ ତିବ୍ର ଅସନ୍ତୋଷ ପ୍ରକାଶ କରିଛନ୍ତି । ଉଚ୍ଛେଦ ସମୟରେ ସମାନ ସୀମାରେ ଥିବା ବହୁ ଗରିବ ଲୋକଙ୍କ ଘର ଉଚ୍ଛେଦ କରାଯାଇ ଥିବାବେଳେ ଅନେକ ପ୍ରଭାବଶାଳୀ ବ୍ୟକ୍ତିଙ୍କର ଜବର ଦଖଲ ଉଚ୍ଛେଦ କରାନଯାଇ ନଥିବା ଚର୍ଚ୍ଚା ହେଉଛି ।
ଅଭିଯୋଗ ଅନୁଯାୟୀ ଜଗତପୁର ଶବରସାହି କେନାଲ ବନ୍ଧ ଠାରୁ ପୁରୁଣା ଶିଳ୍ପାଞ୍ଚଳ ପର୍ଯ୍ୟନ୍ତ ରାସ୍ତା ପ୍ରଶସ୍ତିକରଣ ନିମନ୍ତେ ସିଏମସି ପକ୍ଷରୁ ଜବରଦଖଲ ଉଚ୍ଛେଦ କରାଯାଉଛି । ତେବେ ଉଚ୍ଛେଦର ଯଥେଷ୍ଟ ପୂର୍ବରୁ ନୋଟିସ ଦିଆ ନଯାଇ ଅଚାନକ ଭଙ୍ଗାରୁଜା ଆରମ୍ଭ ହୋଇଥିବାବେଳେ ନିର୍ଦ୍ଧିଷ୍ଟ କିଛି ପ୍ରଭାବଶାଳୀ ବ୍ୟକ୍ତିଙ୍କ ଜାଗାକୁ ଉଚ୍ଛେଦ କରାଗଲା ନାହିଁ; ଅନ୍ୟପକ୍ଷରେ ରାଜ୍ୟସରକାରଙ୍କ ଜାଗାମିଶନ ଯୋଜନାରେ ସର୍ଭେ ପରେ କୁପନ ପାଇଥିବା ଭୂମିହୀନ ଯୋଗ୍ୟ ହିତାଧିକାରୀଙ୍କୁ ଥଇଥାନ କରାନଯାଇ ଅଚନାକ ଉଚ୍ଛେଦ କରାଯାଇଛି । ଫଳରେ ଉକ୍ତ ବ୍ୟକ୍ତିଜଣକ ପରିବାର ସହ ଖୋଲା ଆକାଶ ତଳେ ପଡ଼ି ରହିବାବେଳେ ସରକାରୀ ଯୋଜନା କେବଳ ଲୋକଦେଖାଣିଆ ବୋଲି ଚର୍ଚ୍ଚା ହେଉଛି । ସୂଚନା ଅନୁଯାୟୀ, ରାଜ୍ୟ ସରକାର ଯୋଜନା ଉପରେ ଯୋଜନା ପ୍ରସ୍ତୁତ କରୁଛନ୍ତି । ଏମିତିକି ବହୁ ଯୋଜନା ମଧ୍ୟରୁ ଭୂମିହିନ ଲୋକଙ୍କ ପାଇଁ ଜାଗା ମିଶନ ଯୋଜନା ମଧ୍ୟ ପ୍ରସ୍ତୁତ କରାଗଲା । ଯେ ଓଡିଶାରେ କେହି ଭୂମିହୀନ ରହିବେ ନାହିଁ । ସମସ୍ତଙ୍କ ପାଖରେ ଜାଗା, ଘର ଓ ରାସନ କାର୍ଡ ଇତ୍ୟାଦି ସବୁ କିଛି ସୁବିଧା ସୁଯୋଗ ମିଳିବ । କିନ୍ତୁ ଏହି ଯୋଜନାର ସୁଫଳ ଦେବା ପରିବର୍ତ୍ତେ ପ୍ରଶାସନିକ ଅଧିକାରୀ ଜନସାଧାରଣଙ୍କ ମୌଳିକ ଅଧିକାର ଛଡ଼ାଇ ନେବା କେତେଦୂର ଯୁକ୍ତିଯୁକ୍ତ ବୋଲି ଅଞ୍ଚଳର ବୁଦ୍ଧିଜୀବୀମାନେ ପ୍ରଶ୍ନ କରିଛନ୍ତି । ଏପରିକି୨୦୨୩ ମସିହା ଫ୍ରେବୃଆରୀ ମାସରେ ସୁରେନ୍ଦ୍ର ନାୟକଙ୍କୁ ଏକ ଜାଗା ମିଶନ କାର୍ଡ ମିଳିଥିଲା । ଯେ ଜାଗାଖଣ୍ଡେ ପାଇବେ ବୋଲି ଯେଉଁ ଆଶା କରିଥିଲେ ଆଜିର ଉଚ୍ଛେଦ ପରେ ସେ ପ୍ରଶାସନ ଓ ସରକାରଙ୍କ ଠାରୁ ଭରସା ହରାଇଥିବା କ୍ଷୋଭର ସହ କହିଛନ୍ତି । ଅନ୍ୟପକ୍ଷରେ ଉକ୍ତ ଅଞ୍ଚଳରେ ଏକ ସିକୁରିଟି ସଂସ୍ଥା ମଧ୍ୟ ଜବରଦଖଲରେ ଛାତ ଘର କରିଥିଲେ ମଧ୍ୟ ତାହାକୁ ଭଙ୍ଗାନଯାଇ ଜଣେ ଖଟିଖିଆ ଭୂମିହିନ ଗରିବ ଲୋକର ଚାଳଝୁପୁଡି ଉପରେ ବୁଲଡୋଜର ବୁଲାଇବା ପ୍ରଶାସନିକ ଅଧିକାରୀଙ୍କ ସ୍ୱଚ୍ଛତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି ।