ଚୌଦ୍ୱାର ବିଜେଡି କାଉନସିଲଙ୍କ ଇସ୍ତଫା ଘଟଣା: ନଗର ସଭାପତିଙ୍କ ହସ୍ତକ୍ଷେପ ଫଳରେ ପ୍ରତ୍ୟାହାର କଲେ ବିଜୟ ମଲ୍ଲିକ
#ଚୌଦ୍ୱାର (ଏନ୍.ଏମ୍.): ଚୌଦ୍ୱାର ପୌର ପରିଷଦରେ ୧୦ନମ୍ବର କାଉନସିଲର ଭାବେ ନିର୍ବାଚିତ ହୋଇଥିବା ବିଜୟ ମଲ୍ଲିକ ଗତକାଲି ନଭେମ୍ବର ୧୪ତାରିଖରେ ଇସ୍ତଫା ଦେଇଥିବାବେଳେ ଆଜି ତାହାକୁ ପ୍ରତ୍ୟାହାର କରିଛନ୍ତି । ତେବେ ଦଳ ପକ୍ଷରୁ ଏବଂ ପୌର କର୍ତ୍ତୃପକ୍ଷଙ୍କ ଅବହେଳା ତଥା ତାଙ୍କୁ କୋଣଠେସା କରାଯିବା ଅଭିଯୋଗରେ ସେ ଇସ୍ତଫା ପତ୍ର ଦେଇଥିଲେ । ଏହା ଆଗାମୀ ଦିନରେ ଦଳ ପାଇଁ ବିପଦ ଥିବା ଯୋଗୁଁ ଏଥିରେ ଚୌଦ୍ୱାର ନଗର ବିଜେଡି ସଭାପତି ବିଷ୍ଣୁଚରଣ ପରିଡା ହସ୍ତକ୍ଷେପ କରିଥିଲେ । ତେବେ ଶ୍ରୀ ମଲ୍ଲିକଙ୍କୁ ବୁଝାଇବା ସହ ତାଙ୍କୁ କୋଣଠେସା କରାଯିବ ନାହିଁ ବୋଲି ଶ୍ରୀ ପରିଡା ପ୍ରତିଶ୍ରୁତି ଦେବା ସହିତ ସମସ୍ତ ପାରିଷଦ ବୃନ୍ଦ ଇସ୍ତଫାପତ୍ର ପ୍ରତ୍ୟାହାର କରିବାକୁ ଅନୁରୋଧ କରିଥିଲେ । ତେଣୁ ସମସ୍ତଙ୍କ ଅନୁରୋଧକୁ ସମ୍ମାନ ଦେଇ ଶ୍ରୀ ମଲ୍ଲିକ ଆଜି ଇସ୍ତଫାପତ୍ର ପ୍ରତ୍ୟାହାର କରିଥିବା ପ୍ରକାଶ କରିଛନ୍ତି । ପୁନଶ୍ଚ ଆଗକୁ ଏଭଳି ବିଶୃଙ୍ଖଳା ନହେବା ନେଇ ନଗର ସଭାପତି ଶ୍ରୀ ପରିଡା ସମସ୍ତ ନିର୍ବାଚିତ ଦଳୀୟ କାଉନସିଲରଙ୍କୁ ଚେତାଇ ଦେଇଛନ୍ତି ।
ଅନ୍ୟପକ୍ଷରେ ସମ୍ପ୍ରତି ରାଜ୍ୟରେ ସାଧାରଣ ନିର୍ବାଚନ ନିମନ୍ତେ ବିଭିନ୍ନ ଦଳୀୟ ଶିବରରେ ପ୍ରସ୍ତୁତି ଆରମ୍ଭ ହୋଇଥିବାବେଳେ ଚୌଦ୍ୱାର ପୌର ପରିଷଦରେ ଜଣେ ଶାସକ ଦଳର କାଉନସିଲର ଇସ୍ତଫା ଦେବା ବିଭିନ୍ନ ମହଲରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲା । ଚୌଦ୍ୱାର ଅଞ୍ଚଳରେ ଶାସକ ଦଳର କିଛି ସଂଗଠନର କର୍ମକର୍ତ୍ତା ଏବଂ ହାତଗଣତି କିଛି ନିର୍ବାଚିତ ପ୍ରତିନିଧି ଏଠାରେ ଏକଛତ୍ରବାଦ ଶାସନ ଚଳାଇବା ଆରମ୍ଭ କରି ଦେଇଥିଲେ । ଚୌଦ୍ୱାର ପୌର ପରିଷଦରେ କଂଗ୍ରେସର ଜଣେ କାଉନସିଲର ନିର୍ବାଚିତ ହୋଇଥିବାବେଳେ ବିଜେପି ଜଣେ ଓ ସ୍ୱାଧୀନ ପ୍ରାର୍ଥୀ ଜଣେ ନିର୍ବାଚିତ ହୋଇଥିଲେ । ଏଥି ସହିତ ପୌରପାଳିକାର ୧୬ ଟି ୱାର୍ଡ଼ରେ ବିଜେଡି ପ୍ରାର୍ଥୀ ଜୟଯୁକ୍ତ ହେବା ସହ ବିଜେଡିର ପୌରାଧ୍ୟକ୍ଷା ମଧ୍ୟ ନିର୍ବାଚିତ ହୋଇଥିଲେ । ତେବେ ପାରିଷଦରେ ଶାସକ ଦଳର ବହୁ ସଂଖ୍ୟା ଥାଇ ମଧ୍ୟ ଜଣେ କାଉନସିଲର ଅସନ୍ତୁଷ୍ଟ ରହିବା ଦଳୀୟ ସଂଗଠନର ଦୃଢ଼ତା ଉପରେ ଆଶଙ୍କା ସୃଷ୍ଟି ହୋଇଛି । ଅନ୍ୟପକ୍ଷରେ ଚୌଦ୍ୱାର ଅଞ୍ଚଳରେ ବିଧାୟକ ଓ ପୂର୍ବତନ ବିଧାୟକ ସଂଗଠନର ନେତୃତ୍ୱ ନେଉଥିବାବେଳେ ଦଳୀୟ ଅସନ୍ତୋଷ ବଢ଼ୁଥିବା ଏଭଳି କେତୋଟି ଘଟଣାରୁ ଦେଖିବାକୁ ମିଳୁଛି । ବର୍ତ୍ତମାନ କୁହୁଳୁଥିବା ଅସନ୍ତୋଷ ଆଗାମୀ ଦିନରେ ଦଳ ଭିତରେ ବିରାଟ ବିସ୍ପୋରଣ କରିବାର ସମ୍ଭାବନା ସୃଷ୍ଟି କରିପାରେ ରାଜନୈତିକ ସମୀକ୍ଷକଙ୍କ ମହଲରେ ଚର୍ଚ୍ଚା ହେଉଛି । ତେଣୁ ଏବେ ଶାସକ ଦଳକୁ ଶୃଙ୍ଖଳିତ ଭାବେ ବେଳଥାଉ ବନ୍ଧ ବାନ୍ଧିବା ଆବଶ୍ୟକ ବୋଲି ବିଭିନ୍ନ ମହଲରେ ମତ ପ୍ରକାଶ ପାଉଛି ।