ଚୌଦ୍ୱାର-କଟକରେ ବଢ଼ୁଛି ନିର୍ବାଚନ ଅଡ଼ୁଆ: ସ୍ୱାଧିନ ପାର୍ôଥ ଏବେ ପ୍ରମୁଖ ଦଳ ପାଇଁ ମୁଣ୍ଡ ବିନ୍ଧାର କାରଣ

#କଟକ(ଏନ୍‌.ଏମ୍‌.): ଚଳିତ ସାଧାରଣ ନିର୍ବାଚନ ପାଇଁ ଆରମ୍ଭ ହୋଇଛି ମହା ସଂଗ୍ରାମ । ଏହି ସଂଗ୍ରାମରେ କିଏ ପିନ୍ଧିବ ମୁକୁଟ ସେ ନେଇ ଚାଲିଛି ଅଙ୍କକଷା । ପ୍ରାର୍ଥୀମାନଙ୍କ ଠାରୁ ଆରମ୍ଭ କରି ଭୋଟରମାନଙ୍କ ପର୍ଯ୍ୟନ୍ତ ଅଙ୍କ କଷିବାରେ ବ୍ୟସ୍ତ । ଚା’ ଦୋକାନରୁ ଆରମ୍ଭ କରି ସେଲୁନ ପର୍ଯ୍ୟନ୍ତ ସବୁଠି ଚାଲିଛି ନିର୍ବାଚନୀ ଚର୍ଚ୍ଚା । ତେବେ ବିଭିନ୍ନ ନିର୍ବାଚନ ମଣ୍ଡଳୀରେ ସ୍ୱାଧୀନ ପ୍ରାର୍ଥୀମାନେ ଏବେ ଦଳୀୟ ପ୍ରାର୍ଥୀଙ୍କ ମୁଣ୍ଡବିନ୍ଧା ବଢ଼ାଇ ଦେଇଥିବା ଦେଖିବାକୁ ମିଳିଛି । ଅନ୍ୟପକ୍ଷରେ ଗତ ସାଧାରଣ ନିର୍ବାଚନରେ ବିଜୟ ମୁକୁଟ ପିନ୍ଧିଥିବା ପ୍ରାର୍ଥୀମାନେ ଏଥର ନିଜ ଆତ୍ମବିଶ୍ୱାସ ହରାଇବା ଭଳି ପରିସ୍ଥିତି ସୃଷ୍ଟି ହୋଇଛି । ନିର୍ବାଚନରେ ବହୁ ପ୍ରାର୍ଥୀ ଜନମତକୁ ପୁଞ୍ଜିକରି ନିଜର ଭାଗ୍ୟ ପରୀକ୍ଷା ନିମନ୍ତେ ପ୍ରସ୍ତୁତ ଚଳାଇ ଥିବା ବେଳେ ସ୍ୱାଧୀନ ପ୍ରାର୍ଥୀମାନେ ମଧ୍ୟ କୌଣସି ଦଳ ଠାରୁ କମ ନାହାନ୍ତି । ବିଶେଷ କରି ଚୌଦ୍ୱାର-କଟକ ନିର୍ବାଚନ ମଣ୍ଡଳରେ ଅନେକ ପାର୍ଥୀ ନିଜର ଭାଗ୍ୟ ପରୀକ୍ଷା ନିମନ୍ତେ ନିଜ ନିଜର ରଣ କୌଶଳ ପ୍ରଦର୍ଶନ କରିଥିବାର ଦେଖିବାକୁ ମିଳିଛି । ସୂଚନା ମୁତାବକ ଚୌଦ୍ୱାର-କଟକ ନିର୍ବାଚନ ମଣ୍ଡଳୀରୁ ବିଧାୟକ ହେବା ପାଇଁ ସମୁଦାୟ ୧୨ଜଣ ପ୍ରାର୍ଥୀ ନିଜ ନିଜର ଭାଗ୍ୟ ପରୀଷା ଦେଉଥିବାବେଳେ ସେମାନଙ୍କ ମଧ୍ୟରୁ ୩ ଜଣ ପ୍ରମୁଖ ଦଳ ରହିଛନ୍ତି । ୪ ଜଣ ବାମପନ୍ଥୀ ତଥା ଅନ୍ୟ ଦଳରୁ ଥିବାବେଳେ ୫ ଜଣ ସ୍ୱାଧିନ ଭାବେ ନିଜର ଭାଗ୍ୟ ପରୀକ୍ଷା ନିମନ୍ତେ ପ୍ରସ୍ତୁତ ଚଳାଇଛନ୍ତି । ବିଶେଷ କରି ଚୌଦ୍ୱାର-କଟକ ନିର୍ବାଚନ ମଣ୍ଡଳୀରୁ ଶାସକ ଦଳର ପକ୍ଷରୁ ବିଧାୟକ ପ୍ରାର୍ଥୀ ସୌଭିକ ବିଶ୍ୱାଳ ଲଢ଼ୁଥିବା ବେଳେ ତାଙ୍କ ସହ ବିଜେପି ଦଳ ପକ୍ଷରୁ ନୟନ ମହାନ୍ତି ନିଜର ଦବଦବା ଜାରି ରଖିଛନ୍ତି । ସେହିପରି ନୂତନ ପାର୍ଥୀ ଭାବେ କଂଗ୍ରେସ ମୀର ମଲ୍ଲିକଙ୍କୁ ପ୍ରାର୍ଥୀ କରିଥିବାବେଳେ ଭୋଟ କାହା ପାଖକୁ ଯିବ ସେନେଇ ଏବେ ଆଲୋଚନାର ବିଷୟ ହୋଇଛି । ତେବେ ଏହାରି ଭିତରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି ସ୍ୱାଧୀନ ପ୍ରାର୍ଥୀ । ଅସନ୍ତୁଷ୍ଠ ଭୋଟରଙ୍କ ଭୋଟକୁ ପୁଞ୍ଜି କରି ଏହି ନିର୍ବାଚନରେ ଭୋଟ ବ୍ୟାଙ୍କକୁ ମଜଭୁତ କରିବାରେ ଲାଗିପଡ଼ିଛନ୍ତି ସ୍ୱାଧୀନ ପ୍ରାର୍ଥୀ । ବିଶେଷ କରି ଚୌଦ୍ୱାର-କଟକର ସ୍ୱାଧୀନ ପ୍ରାର୍ଥୀ ରୂପାଲି ଲେଙ୍କାଙ୍କ ଜନ ସମର୍ଥକ ବଢ଼ୁଥିବା ସାଧାରଣରେ ଆଲୋଚନା ହେଉଛି । ଏକଦା ମୁଖ୍ୟମନ୍ତ୍ରୀ ଓ ଫାଇଭ-ଟି ଅଧ୍ୟକ୍ଷଙ୍କ ଫଟୋକୁ ନିଜ ବ୍ୟାନରେ ସ୍ଥାନିତ କରି ସଂଗଠନ ବୃଦ୍ଧି କରିଥିବା ଶ୍ରୀମତୀ ଲେଙ୍କା ଏବେ ସ୍ୱାଧୀନ ଭାବେ ନିର୍ବାଚନ ରଣାଙ୍ଗନକୁ ଓହ୍ଲାଇଛନ୍ତି । ତେଣୁ ସେ ନିଜର ରଣ କୌଶଳ ମାଧ୍ୟମରେ ବିଜେଡି ଓ ବିଜେପିର ଅସନ୍ତୁଷ୍ଟ କର୍ମୀ ଓ ଭୋଟରଙ୍କୁ ନେଇ ନିର୍ବାଚନ ବୈତରଣୀ ପାର କରିବା ପାଇଁ ଉଦ୍ୟମ ଚଳାଇଛନ୍ତି । ଯାହା ଫଳରେ ଶାସକ ଦଳ ପ୍ରତି ଏହାର ପ୍ରଭାବ ଧିରେ ଧିରେ ବଢୁଥିବା ନିର୍ବାଚନ ସମୀକ୍ଷକଙ୍କ ମହଲରେ ଚର୍ଚ୍ଚା ହେଉଛି । ଚୌଦ୍ୱାର-କଟକ ନିର୍ବାଚନ ମଣ୍ଡଳୀରେ କଟକ ମହାନଗର ସମେତ ଚୌଦ୍ୱାର ଓ ଏହି ନିର୍ବାଚନ ମଣ୍ଡଳୀ ଅନ୍ତର୍ଗତ ୫ଟି ପଞ୍ଚାୟତରେ ଏବେ ଶ୍ରୀମତୀ ଲେଙ୍କାଙ୍କ ପ୍ରତି ସାଧାରଣ ଲୋକଙ୍କ ସମର୍ଥନ ବଢ଼ୁଥିବା ଆଲୋଚନା ହେଉଛି । ଗତ ୨ ଦିନ ତଳେ କିଛି ପଞ୍ଚାୟତର ବିଜେପି କର୍ମୀମାନେ ନିଜ ଦଳର ପ୍ରାର୍ଥୀଙ୍କ ପ୍ରତି ଅସନ୍ତୁଷ୍ଟ ରହି ସ୍ୱାଧୀନ ପ୍ରାର୍ଥୀ ରୂପାଲି ଲେଙ୍କାଙ୍କ ପ୍ରତି ପୂର୍ଣ୍ଣ ସହଯୋଗ କରିବା ଲାଗି ପ୍ରତିଶ୍ରୁତି ଦେଇଛନ୍ତି । ସେହିଭଳି ବିଜେଡିରେ ଦୀର୍ଘ ଦିନ ଧରି କୋଣଠେସା ରହିଥିବା ଅନେକ କର୍ମୀ ଏବେ ସ୍ୱାଧୀନ ପ୍ରାର୍ଥୀଙ୍କ ପ୍ରତି ଭିତିରିଆ ସମର୍ଥନ ରହିଥିବା ଜଣାପଡ଼ିଛି । ଏହାକୁ ଏନେଇ ଶାସକ ଦଳ ପ୍ରତି ଏବେ ମୁଣ୍ଡ ବିନ୍ଧାର କାରଣ ପାଲଟିଛି । ଏହି ନିର୍ବାଚନ ସମୟରେ ଅସନ୍ତୁଷ୍ଟ କର୍ମୀମାନଙ୍କୁ କିଭଳି ବୁଝେଇ ନିଜ ସପକ୍ଷକୁ ଆଣିବାକୁ ପଡ଼ିବ ସେ ନେଇ ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳ ଖୁବ ଜୋରରେ ଉଦ୍ୟମ କରୁଥିବା ଦେଖିବାକୁ ମିଳିଛି । ଏପରିକି ଦିନରାତି ଏକାଠି କରି ପୁଅ ସୌଭିକ ବିଶ୍ୱାଳଙ୍କୁ ଜିତାଇବା ପାଇଁ ବିଭିନ୍ନ ରଣନୀତି ଚଳାଇଛନ୍ତି । ତେବେ ନିର୍ବାଚନ ଯେତିକି ପାଖେଇ ପାଖେଇ ଆସୁଛି ସ୍ୱାଧୀନ ପ୍ରାର୍ଥୀଙ୍କ ସମର୍ଥନ ବଢ଼ିବା ଦଳୀୟ ପ୍ରାର୍ଥୀଙ୍କ ମୁଣ୍ଡବିନ୍ଧା ବଢ଼ାଇ ଦେଇଥିବା ଆଲୋଚନା ହେଉଛି । ତେବେ ଦେଖାଯାଉ ଭୋଟର କାହାକୁ ନିଜର ନେତା ଭାବେ ବାଛିବେ ତାହା ଦେଖିବାକୁ ବାକି ରହିଲା ।