ଗାନ୍ଧୀ ଓ ଶାସ୍ତ୍ରୀ ଜୟନ୍ତୀ: ଗାନ୍ଧୀ ଭବନରେ “ଗାନ୍ଧୀଙ୍କ ସ୍ୱପ୍ନର ଭାରତ ଓ ଆଜି’ ଶୀର୍ଷକ ଗାନ୍ଧୀ ସ୍ମାରକୀ ବକ୍ତୃତା

#କଟକ(ଏନ୍‌.ଏମ୍‌.): ରାଜନୀତିକ ସ୍ୱାଧୀନତା ମିଳିଥିଲେ ମଧ୍ୟ ଏବେ ବି ଆମ ଦେଶ ସାମାଜିକ, ଅର୍ଥନୈତିକ ସ୍ୱାଧୀନତାକୁ ହାସଲ କରିପାରୁନାହୁଁ। ସାମନ୍ତବାଦୀ ଓ ଗୋଲାମୀ ମାନସିକତାରୁ ମୁକୁଳି ଗାନ୍ଧୀଙ୍କ ସ୍ୱପ୍ନର ଭାରତର ସ୍ୱରୂପକୁ ଦେଖି ପାରୁନାହୁଁ। ପୁଞ୍ଜିପତିଙ୍କ ହାତରେ ଆଜି ଦେଶରେ ଗଣତନ୍ତ୍ରର ନିୟନ୍ତ୍ରଣ। ଦେଶରେ ଆମେ ଯେଉଁ ଗଣତନ୍ତ୍ର କହୁଛୁ, ସେଠି ତନ୍ତ୍ର ଅଛି ହେଲେ ଲୋକ ନାହାଁନ୍ତି। ତେଣୁ ପୁଣି ଥରେ ଆମକୁ ଚରମ ଅବ୍ୟବସ୍ଥା ବିରୁଦ୍ଧରେ ଲଢେଇ କରିବାକୁ ହେବ। ସେହି ଲଢେଇ ଗାନ୍ଧୀଜୀଙ୍କ ସତ୍ୟ ଅଂହିସା ଓ ଗାନ୍ଧୀ ବିଚାରଧାରାର ପୃଷ୍ଠଭୂମିରେ ସମ୍ଭବ ବୋଲି କଟକ ଗାନ୍ଧୀ ଭବନ ପରିସରରେ ଗାନ୍ଧୀବାଦୀ ଗଣ ସଙ୍ଗଠନ ସମୁହଙ୍କ ପକ୍ଷରୁ ଜାତିର ଜନକ ମହାତ୍ମା ଗାନ୍ଧୀଙ୍କ ୧୫୫ତମ ଜୟନ୍ତୀ ଅବସରରେ “ଗାନ୍ଧୀଙ୍କ ସ୍ୱପ୍ନର ଭାରତ ଓ ଆଜି’ ଶୀର୍ଷକ ଗାନ୍ଧୀ ସ୍ମାରକୀ ବକ୍ତୃତାରେ ଉପସ୍ଥିତ ବ୍ୟକ୍ତିବିଶେଷ ବକ୍ତବ୍ୟ ପ୍ରଦାନ କରିଥିଲେ। ବରିଷ୍ଠ ସାମ୍ବାଦିକ ଡ. ସତ୍ୟ ରାୟଙ୍କ ଅଧ୍ୟକ୍ଷତାରେ ଆୟୋଜିତ ସ୍ମାରକୀ ବକ୍ତୃତାରେ ଗାୟତ୍ରୀ ଦାସ, ଜୟନ୍ତ କୁମାର ଦାସ, ଡ. ଜୟନ୍ତୀ ରଥ, ଚିତ୍ତରଞ୍ଜନ ମହାନ୍ତି, ଦେବପ୍ରସାଦ ରାୟ, ଅକ୍ଷୟ କୁମାର ଷଡ଼ଙ୍ଗୀ, ଅନ୍ତର୍ଯ୍ୟାମୀ ବରାଳ, ଲକ୍ଷ୍ମୀପ୍ରକାଶ ମହାପାତ୍ର, ଖଗେଶ୍ୱର ସେଠୀ, ହରିହର ସେନ, କବିର ଜେନା, ଅନ୍ନପୂର୍ଣ୍ଣା ସାହୁ, କିଶୋର ଜେନା, ଯୁଗଳ କିଶୋର ନାୟକ, ବିଶ୍ୱଜିତ ସୂର୍ଯ୍ୟବଂଶୀ, ଡ. ଅଜୟ କୁମାର ପତି, ସବ୍ୟସାଚୀ ମହାନ୍ତି, ମହମ୍ମଦ ସନାଉଲ୍ଲା, ପ୍ରସନ୍ନ କୁମାର ମହାପାତ୍ର, ବିଶ୍ୱଜିତ ପାଣି ପ୍ରମୁଖ ଉପସ୍ଥିତ ରହି ନିଜ ମତ ପ୍ରଦାନ କରିଥିଲେ। ଏଠାରେ ସୂଚନାଯୋଗ୍ୟ ଯେ, ଜାତିର ଜନକ ମହାତ୍ମା ଗାନ୍ଧୀଙ୍କ ୧୫୫ତମ ଜୟନ୍ତୀ ଅବସରରେ ଗାନ୍ଧୀ ଶାନ୍ତି ପ୍ରତିଷ୍ଠାନ ତରଫରୁ ରାଜ୍ୟବ୍ୟାପୀ ଅନୁଷ୍ଠିତ ହୋଇଥିବା ବିଦ୍ୟାଳୟସ୍ତରୀୟ ଗାନ୍ଧୀ ପ୍ରଶ୍ନୋତ୍ତରୀ ପ୍ରତିଯୋଗିତାର ପୁରସ୍କାର ଉତ୍ସବ ଅନୁଷ୍ଠିତ କରାଯାଇ କଟକ ଜିଲ୍ଲାର ବିଭିନ୍ନ ବିଦ୍ୟାଳୟର କୃତ୍ତି ଛାତ୍ରଛାତ୍ରୀଙ୍କୁ ପୁରସ୍କାର ପ୍ରଦାନ କରାଯାଇଥିଲା। ଅନିମା ରାୟ ଧନ୍ୟବାଦ ଅର୍ପଣ କରିଥିଲେ।