କଟକ ମଧୁସୂଦନ ସେତୁରେ ଦୁର୍ଘଟଣା ୨ ମୃତ ଜଣେ ଗୁରୁତର
କଟକ(ଏନ୍.ଏମ୍.): ବିଳମ୍ବିତ ରାତିରେ କଟକ ନୂଆପାଟଣା ସ୍ଥିତ ମଧୁସୂଦନ ସେତୁ ଉପରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ଗୋଟିଏ ବାଇକରେ ଥିବା ୨ଜଣଙ୍କ ମୃତ୍ୟୁ ହୋଇଥିବାବେଳେ ଅନ୍ୟଜଣଙ୍କ ଅବସ୍ଥା ଗୁରୁତର ରହିଛି । ମୃତାହତମାନଙ୍କୁ ପୁଲିସ କଟକ ବଡ଼ମେଡ଼ିକାଲ ପଠାଇ ଦୁର୍ଘଟଣାଗାଡ଼ିକୁ ଜବତ କରିବା ସହ ତଦନ୍ତ ଜାରି ରଖିଛି । ମିଳିଥିବା ସୂଚନା ମୁତାବକ ଓଡ଼ି ୦୨ ସିଏସ ୮୫୯୨ ଏକ ବାଇକ୍ରେ ତିନିଜଣ ବ୍ୟକ୍ତି କଟକ ସିଡିଏ ପଟରୁ ଧବଳେଶ୍ୱର ଆଡ଼କୁ ଯାଉଥିଲେ । ଏହି ସମୟରେ ଆଗରୁ ଏକ ମାଲ୍ ବୋଝେଇ ଟ୍ରକ ଖରାପ ହୋଇ ରାସ୍ତା କଡ଼ରେ ଛିଡ଼ା ହୋଇଥିବା ବେଳେ ବାଇକଟି ହଠାତ ଭାରସାମ୍ୟ ହରାଇ ଟ୍ରକର ପଛପଟେ ପିଟି ହୋଇଯାଇଥିଲା । ତେବେ ଖବର ପାଇ ସିଡିଏ ଫେଜ-୨ ଥାନା ଓ ଚୌଦ୍ୱାର ଥାନା ପୁଲିସ ଘଟଣାସ୍ଥଳରେ ପହଞ୍ଚି ମୃତାହତଙ୍କୁ ଡାକ୍ତରଖାନା ପଠାଇ ତଦନ୍ତ ଆରମ୍ଭ କରିଛନ୍ତି । ମୃତାହତମାନଙ୍କ ପରିଚୟ ମିଳିପାରିନାହିଁ ।