ଓଡ଼ିଆ ଭାଷାର ଶ୍ରେଷ୍ଠ ପ୍ରୁଫ୍-ସଂଶୋଧକଙ୍କୁ ପ୍ରତିବର୍ଷ ପୁରସ୍କୃତ କରାଯିବ
#କଟକ(ଏନ୍.ଏମ୍.): ଓଡ଼ିଆ ଭାଷାର ଶ୍ରେଷ୍ଠ ପ୍ରୁଫ୍-ସଂଶୋଧକଙ୍କୁ ଚୟନ କରି ପ୍ରତ୍ୟେକ ବର୍ଷ ଅଧ୍ୟାପିକା ନୀହାରିକା ଦାସ ସ୍ମୃତି ନ୍ୟାସ ପକ୍ଷରୁ ପୁରସ୍କୃତ କରାଯିବ ବୋଲି ଆଜି ସ୍ଥାନୀୟ ଗାନ୍ଧି ଭବନଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ନ୍ୟାସର ଆବାହକ ଦୀପକ କୁମାର ମହାନ୍ତ ଘୋଷଣା କରିଛନ୍ତି । ସାମ୍ବାଦିକ ସମ୍ମିଳନୀରେ ଶ୍ରୀ ମହାନ୍ତ କହିଥିଲେ ଯେ, ସମ୍ପ୍ରତି ମୁଦ୍ରଣ ପ୍ରଯୁକ୍ତିବିଦ୍ୟାର ଯଥେଷ୍ଟ ଉନ୍ନତି ଘଟିଥିବାରୁ ଓଡ଼ିଆ ଭାଷାରେ ଅଧିକ ସଂଖ୍ୟକ ପୁସ୍ତକ ପ୍ରକାଶିତ ହେଉଛି । ମାତ୍ର ପ୍ରକାଶିତ ପୁସ୍ତକଗୁଡ଼ିକରେ ବନାନଗତ ତଥା ବ୍ୟାକରଣଗତ ତ୍ରୁଟି ଭରିରହୁଥିବା ଦେଖିବାକୁ ମିଳୁଛି । ଏଥିଯୋଗୁଁ ଓଡ଼ିଆ ଭାଷା ଓ ସାହିତ୍ୟ ବିକୃତ ଓ ବିକଳାଙ୍ଗ ହୋଇ ଯାଉଛି । ଗୁରୁତ୍ୱ ସହକାରେ ପ୍ରୁଫ୍-ଦେଖା ହେଉ ନଥିବାରୁ ତ୍ରୁଟିସବୁ ସଂଶୋଧନ ହୋଇପାରୁ ନାହିଁ । ଉର୍ଣ୍ଣତ ଦେଶଗୁଡ଼ିକରେ ପ୍ରୁଫ୍-ସଂଶୋଧନ ଉପରେ ଅଧିକ ଗୁରୁତ୍ୱ ଦିଆଯାଉଥିବାବେଳେ ଆମ ଦେଶରେ ଆଜିକାଲି ତାହାକୁ ହାଲୁକା ଭାବରେ ନିଆଯାଉଛି । ଏପରିକି ଆଦୌ ପ୍ରୁଫ୍-ସଂଶୋଧକଙ୍କ ସାହାଯ୍ୟ ନନେଇ ମଧ୍ୟ ପୁସ୍ତକ ଛପାଯାଉଛି । ଉପଯୁକ୍ତ ପ୍ରୁଫ୍-ସଂଶୋଧନର ଅଭାବ ହିଁ ସମ୍ପ୍ରତି ଓଡ଼ିଆ ଭାଷା ଓ ସାହିତ୍ୟ କ୍ଷେତ୍ରରେ ସବୁଠାରୁ ବଡ଼ ସଂକଟ ରୂପେ ଉଭା ହୋଇଛି । ଏହି ପରିପ୍ରେକ୍ଷୀରେ ପ୍ରୁଫ୍-ସଂଶୋଧନର ଗୁରୁତ୍ୱକୁ ସମାଜ ଆଗରେ ଉପସ୍ଥାପନ କରିବା ସଙ୍ଗେସଙ୍ଗେ ଉଚ୍ଚଶିକ୍ଷିତ ଯୁବକଙ୍କୁ ଏ ଦିଗରେ ଆକର୍ଷିତ କରିବା ଲକ୍ଷ୍ୟ ନେଇ ଅଧ୍ୟାପିକା ନୀହାରିକା ଦାସ ସ୍ମୃତି ନ୍ୟାସ ତରଫରୁ ପ୍ରତିବର୍ଷ ଶ୍ରେଷ୍ଠ ପ୍ରୁଫ୍-ସଂଶୋଧକଙ୍କୁ ଅର୍ଥରାଶି ସହ ପୁରସ୍କୃତ କରିବା ପାଇଁ ନିଷ୍ପତ୍ତି ନିଆଯାଉଛି । ଚୟନବେଳେ ଉଭୟ ପେସାଦାର ଓ ସୌଖୀନ ପ୍ରୁଫ୍-ସଂଶୋଧକଙ୍କ କଥା ବିଚାରକୁ ନିଆଯିବ ବୋଲି ଶ୍ରୀ ମହାନ୍ତ ଘୋଷଣା କରିଥିଲେ । ଏହି ସାମ୍ବାଦିକ ସମ୍ମିଳନୀରେ ନ୍ୟାସର ସଦସ୍ୟ ଡକ୍ଟର ଶଙ୍କର୍ଷଣ ମିଶ୍ର, ଡକ୍ଟର ନାରାୟଣ ମହାନ୍ତି ଓ ଡକ୍ଟର ସୁଶାନ୍ତ କୁମାର ଦାସ ଉପସ୍ଥିତ ଥିଲେ ।