ଆନ୍ଦୋଳନ ସ୍ଥଗିତ ରଖିଲା ଓଡିଶା ଅଭିଭାବକ ମହାସଂଘ
ଆଡ଼ମିସନକୁ ମନା କରୁଥିବା ସ୍କୁଲକୁ ପ୍ରାଥମିକ ଶିକ୍ଷା ନିର୍ଦ୍ଦେଶକଙ୍କ ସ୍ୱୀକୃତି ପ୍ରତ୍ୟାହାର ଚିଠି
ଭୁବନେଶ୍ୱର(ଏନ୍.ଏମ୍.): ୨୦୦୯ଶିକ୍ଷା ଅଧିକାର ଆଇନ ଅନୁଯାଇ ଅବହେଳିତ ଶ୍ରେଣୀର ପିଲାଙ୍କ ପାଇଁ ସବୁ ସ୍କୁଲରେ ୨୫ପ୍ରତିଶତ ସିଟ ସଂରକ୍ଷଣ ବ୍ୟବସ୍ଥା ରହିଛି । ହେଲେ ଓଡିଶା ଅଭିଭାବକ ମହାସଂଘର ବହୁ ବାର ଧାରଣା, ଧର୍ମଘଟ, ଅନଶନ ପରେ ଗତବର୍ଷ ଏହି ଆଇନ କାର୍ଯ୍ୟକାରୀ ହୋଇ ମାତ୍ର ୫ ହଜାର ପିଲା ଆଡ଼ମିସନ କରିଥିଲେ । ଏହି ଆଇନ ସଠିକ କାର୍ଯ୍ୟକାରୀ ହେଲେ ପାଖାପାଖି ବର୍ଷକୁ ୭୦ହଜାରରୁ ଅଧିକ ଗରିବ ପିଲା ଏହି ସୁବିଧା ପାଇବେ । ଏବର୍ଷ ମଧ୍ୟ ପ୍ରାୟ ୧୫ ହଜାର ପିଲା ଆଡ଼ମିସନ ପାଇଁ ପୋର୍ଟାଲରେ ଆବେଦନ କରି ଯୋଗ୍ୟ ବିବେଚିତ ହୋଇଛନ୍ତି । ଏହି ଯୋଜନାରେ ତିନିରୁ ସାତ ବର୍ଷ ମଧ୍ୟରେ ପିଲା ଉଭୟ ନର୍ସରୀ ଓ ପ୍ରଥମ ଶ୍ରେଣୀରେ ଆଡ଼ମିସନ ପାଇଁ ବ୍ୟବସ୍ଥା ରହିଛି । ହେଲେ ପ୍ରାଇଭେଟ ସ୍କୁଲ ମାନେ ଏହି ସ୍କିମରେ ଆଡ଼ମିସନ ପାଇଁ ଅଭିଭାବକ ଓ ପିଲାଙ୍କୁ ମନା କରୁଛନ୍ତି । ସରକାର ପାଗଳ, ଆମଠୁଁ ସବୁ ସାହାଯ୍ୟ ନେଲେ ପୁଣି କଣ ପାଇଁ ପିଲା ପଠାଉଛନ୍ତି, ଏପରି ମନ୍ତବ୍ୟ ଦେଇ ଅଭିଭାବକମାନଙ୍କୁ ନିରୁତ୍ସାହିତ କରି ଫେରେଇଦେଉଛନ୍ତି । ଭୁବନେଶ୍ୱରରେ ଏଥିପାଇଁ କିଛି ଅଭିଭାବକ ଘେରାଓ କରିଥିଲେ । ପୂର୍ବରୁ ବିଭାଗ ମଧ୍ୟ ସବୁ ଜିଲ୍ଲା ଶିକ୍ଷା ଅଧିକାରୀ ଏବଂ ବ୍ଲକ ଶିକ୍ଷା ଅଧିକାରୀମାନଙ୍କୁ ଯେଉଁ ସ୍କୁଲ ନିୟମ ମାନୁନି ତା ବିରୁଦ୍ଧରେ କାର୍ଯ୍ୟାନୁଷ୍ଠାନ ନେଇ ତାର ସ୍ୱୀକୃତି ପ୍ରତ୍ୟାହାର ପାଇଁ ପଦକ୍ଷେପ ନେବାକୁ କୁହାଯାଇଛି । ଭୁବନେଶ୍ୱର ବିଜେଇଏମ, ଖଣ୍ଡଗିରିର ଜାଭିୟାର ସ୍କୁଲ, ନାରାୟଣା, ଡି ଏ ଭି, ଓଡ଼ିଏମ ପରି ବହୁତ ସ୍କୁଲ ପିଲାଙ୍କୁ ଏହି ସ୍କିମରେ ଆଡ଼ମିସନ କରିବାକୁ ସଫା ସଫା ମନକରିଦେଇଛି । ତେଣୁ ସେହି ସ୍କୁଲ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ସହ ତାର ସ୍ୱୀକୃତି ପ୍ରତ୍ୟାହାର ପାଇଁ ବ୍ୟବସ୍ଥା କରିବାକୁ ଓଡିଶା ଅଭିଭାବକ ମହାସଂଘ ଦାବି କରିଛି । ଏପରି ସ୍କୁଲ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ପୂର୍ବରୁ ମଧ୍ୟ ଶିକ୍ଷା ମନ୍ତ୍ରୀ ଓ ପ୍ରମୁଖ ସଚିବଙ୍କୁ ଦାବି ଜଣାଇସାରିଛି ଓଡିଶା ଅଭିଭାବକ ମହାସଂଘ । ଏହି ସ୍କିମ ରେ ନାମ ଲେଖା ହେଲେ ସାରା ଓଡ଼ିଶାରେ ଥିବା ଗରିବ ଓ ନିମ୍ନ ମଧ୍ୟବିତ୍ତ ପରିବାର ଏହାର ଭରପୁର ସୁଯୋଗ ନେଇପାରିବେ ବୋଲି ଏହି ଯୋଜନା ରାଜ୍ୟ ସରକାର କରିଥିଲେ । ତେଣୁ ସ୍କୁଲ ମାନେ ଆଡ଼ମିସନ କରିବାକୁ ମନା କରିବାରୁ ବାଧ୍ୟ ହୋଇ ଆଜି (ଜୁଲାଇ ୨୬ରେ) ଓଡିଶା ଅଭିଭାବକ ମହାସଂଘ ଗଣଶିକ୍ଷା ମନ୍ତ୍ରୀ ସମୀର ଦାସ ଓ ସଚିବ ବିଷ୍ଣୁପଦ ସେଠୀଙ୍କ ସରକାରୀ ବାସଭବନ ଆଗରେ ଧାରଣା ଓ ଅନଶନ କରିବ ବୋଲି ପୂର୍ବରୁ ଘୋଷଣା କରିଥିଲା । ହେଲେ ପ୍ରାଥମିକ ଶିକ୍ଷା ନିର୍ଦ୍ଦେଶକ ବୃନ୍ଦାବନ ଶତପଥୀ ଖିଲାପକାରୀ ସ୍କୁଲ ମାନଙ୍କୁ ସ୍ୱୀକୃତି ପ୍ରତ୍ୟାହାର ପାଇଁ ଚିଠି କରିଛନ୍ତି । ଆଜି ବୃନ୍ଦାବନ ଶତପଥୀ, ନିର୍ଦେଶକ ଓ ଏହି ସ୍କିମ ଦାୟିତ୍ୱରେ ଥିବା ଉପ ନିର୍ଦେଶକ ଚିତ୍ତରଞ୍ଜନ ପାଣିଗ୍ରାହୀଙ୍କ ସହିତ ଓଡିଶା ଅଭିଭାବକ ମହାସଂଘ ଅଧକ୍ଷ ବାସୁଦେବ ଭଟ୍ଟ, ସହ ଅଧ୍ୟକ୍ଷ ପ୍ରସନ୍ନ ବିଷୋୟୀ, କୋଷାଧ୍ୟକ୍ଷ ସତ୍ୟଜିତ ଦାସଙ୍କ ସହିତ କିଛି ଅଭିଭାବକଙ୍କ ଆଲୋଚନା ପରେ ସେମାନଙ୍କୁ ୭ ଦିନର ମହଲତ ଦିଆଯାଇଛି । ଆଜି ମନ୍ତ୍ରୀ ଓ ସଚିବଙ୍କ ଘର ସମୁଖରେ ହେବାକୁ ଥିବା ଆନ୍ଦୋଳନ ସ୍ଥଗିତ ରଖା ଯାଇଛି । ଯଦି ସ୍କୁଲରେ ଏହି ସ୍କିମରେ ଅଭିଭାବକମାନଙ୍କୁ ଆଡ଼ମିସନରେ ଅସୁବିଧା ହୁଏ ପୁଣି ଆନ୍ଦୋଳନ କରାଯିବ । ପ୍ରକାଶ ଥାଉ କି ଆଜି ଏହି ସ୍କିମରେ କ୍ଷତିଗ୍ରସ୍ତ ଶତାଧିକ ଅଭିଭାବକ ମାନେ ଓଡିଶା ଅଭିଭାବକ ମହାସଂଘ ସହିତ ଅଭିଯୋଗ ଫର୍ଦ୍ଦ ଧରି ନତାଲା ଠାରେ ରୁଣ୍ଡ ହୋଇ ଥିଲେ । ଏହାକୁ ଦୁଷ୍ଟିରେ ରଖି ପୋଲିସ ଶାନ୍ତି ସହ ଆଲୋଚନା କରି ଆନ୍ଦୋଳନକୁ ମହାସଂଘ ସ୍ଥଗିତ ରଖିବାକୁ ନିଷ୍ପତି ନେଇଥିଲେ ।
