ଆତଙ୍କିତ କରୁଛି ବାତ୍ୟା ଦାନା: କାହାର ସର୍ବନାସ କାହାର ପୁଷମାସ
#ଚୌଦ୍ୱାର(ଏନ୍.ଏମ୍.): ସାମୁଦ୍ରିକ ଝଡ଼ ଦାନା, ବାତ୍ୟାର ରୂପ ନେବା ପରେ ସମଗ୍ର ରାଜ୍ୟରେ ଏବେ ଆତଙ୍କ ସୃଷ୍ଟି ହୋଇଛି। ସମୁଦ୍ର ଭିତରୁ ଭୁପୃଷ୍ଟ ଆଡ଼କୁ ଯେତିକି ପାଖେଇ ଆସୁଛି ବାତ୍ୟା ଏହାର ପ୍ରଭାବରେ ପାଗର ପରିବର୍ତ୍ତନ ହେବାରେ ଲାଗିଛି। ବାତ୍ୟା କେଉଁଠି ଲ୍ୟାଣ୍ଡଫଳ କରିବ ସଠିକ ସୂଚନା ମିଳୁନଥିଲେ ମଧ୍ୟ କେନ୍ଦ୍ରାପଡ଼ାର ତାଳଚୁଆ ଅଞ୍ଚଳରେ ଏହା ଲ୍ୟାଣ୍ଡଫଲ କରିବାର ଆଶଙ୍କା ରହିଥିବା ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ତେବେ ଏହି ବାତ୍ୟା ମୁକାବିଲା ପାଇଁ ସରକାର ଯୁଦ୍ଧକାଳୀନ ଭିତ୍ତିରେ ପଦକ୍ଷେପ ନେଉଥିବାବେଳେ ସ୍ଥାନୀୟ ପ୍ରଶାସନ କିନ୍ତୁ ଏହାକୁ ଲୋକଙ୍କ ପାଖରେ ପହଞ୍ଚାଇବାରେ ବିଫଳ ହୋଇଥିବା ଚର୍ଚ୍ଚା ହେଉଛି। ଏପରିକି ଅତୀତରେ ହେଉଥିବା ବାତ୍ୟା ମୁକାବିଲା ସମୟରେ ସ୍ଥାନୀୟ ପ୍ରଶାସନ ଯେତିକି ତତ୍ପର ଥିଲା ବର୍ତ୍ତମାନ ସରକାର ପରିବର୍ତ୍ତନ ପରେ ସେତିକି ତତ୍ପରତା ଦେଖାଉ ନାହାନ୍ତି ଅଧିକାରୀ ଓ ସ୍ଥାନୀୟ ଲୋକ ପ୍ରତିନିଧି। ଯାହା ସରକାରଙ୍କୁ ବଦନାମ କରିବାକୁ ଏକ ଷଡଯନ୍ତ୍ର ବୋଲି ମଧ୍ୟ ଚର୍ଚ୍ଚା ହେଉଛି। ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କଟକ ଜିଲ୍ଲା ଚୌଦ୍ୱାର ପୌରାଞ୍ଚଳରେ। ଏଠାରେ ବାତ୍ୟା ମୁକାବିଲା ପାଇଁ ବସ୍ତି ଅଞ୍ଚଳରେ କିମ୍ବା କଚା ଘରେ ବସବାସ କରୁଥିବା ପରିବାରକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ସରକାରୀସ୍ତରରେ ନିର୍ଦ୍ଦେଶ ଦିଆଯାଇଥିବାବେଳେ ଚୌଦ୍ୱାର ପୌର କର୍ତ୍ତୃପକ୍ଷ ଏ ଯାଏ ଥଇଥାନ ବ୍ୟବସ୍ଥା କରୁନାହାନ୍ତି। ଏପରିକି ବାତ୍ୟା ସମୟରେ ରନ୍ଧା ଖାଦ୍ୟ ବଣ୍ଟନ ପାଇଁ ଯେଉଁ ବ୍ୟବସ୍ଥା କରାଯାଇଥିଲା ତାହାକୁ ବାଟମାରଣା କରାଯାଉଥିବା ଦେଖିବାକୁ ମିଳିଛି। ଏପରିକି ୫କ୍ୱିଣ୍ଟାଲ ଚୁଡ଼ା, ଗୁଅ ସବୁ କିଛି କାଉନସିଲରଙ୍କ ସମେତ କିଛି ପୌର ଅଧିକାରୀ ଓ କର୍ମଚାରୀ ଖାଇ ଯାଇଥିବା ଭଳି ସଂଗୀନ ଅଭିଯୋଗ ଉଠିଛି। ତେଣୁ ଏଭଳି ବିପର୍ଯ୍ୟୟ କାହାର ସର୍ବନାସ ତ ଆଉ କାହାର ପୁଷମାସ ବୋଲି ଚୌଦ୍ୱାର ଅଞ୍ଚଳରେ ଚର୍ଚ୍ଚା ହେଉଛି। ଏସବୁର ତୁରନ୍ତ ତଦନ୍ତ କରାଯାଇ ବିପର୍ଯ୍ୟୟ ସମୟରେ ଏଭଳି ହରିଲୁଟ କରୁଥିବା ବ୍ୟକ୍ତିଙ୍କୁ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।