ଆଇପିଏଲ: ଏଲଏସଜି ଠାରୁ ହାରିଲା ମୁମ୍ବାଇ
#ଲକ୍ଷ୍ନୌ(ଏନ୍.ଏମ୍.): ଆଇପିଏଲର ୬୩ତମ ମ୍ୟାଚରେ ଆଜି ଲକ୍ଷ୍ନୌ ସୁପର ଜ୍ୟାଣ୍ଟସ ବିଜୟୀ ହୋଇଛି । ଏହି ମ୍ୟାଚରେ ଏଲଏସଜି ମାତ୍ର ୫ରନରେ ମୁମ୍ବାଇକୁ ମାତ ଦେଇଛି । ଯାହାଫଳରେ ଏଲଏସଜି ଟପ ୩ରେ ପହଞ୍ଚି ଥିବାବେଳେ ମୁମ୍ବାଇ ୪ର୍ଥ ସ୍ଥାନକୁ ଖସି ଆସିଛି । ଏହି ମ୍ୟାଚରେ ଏଲଏସଜି ପ୍ରଥମେ ବ୍ୟାଟିଂ କରି ୧୭୭ରନ କରିଥିବାବେଳେ ମୁମ୍ବାଇ ୧୭୨ରନରେ ସୀମତ ରହିଥିଲା ।
ମୁମ୍ବାଇର ଦୁଇ ଓପନର ଅଧିନାୟକ ରୋହିତ ଶର୍ମା ଓ ଈଶାନ କିଶାନ ପ୍ରଥମ ୱିକେଟ ପାଇଁ ୯ ଓଭରରୁ ୯୦ରନ ସଂଗ୍ରହ କରିବା ଫଳରେ ଦଳ ବିଜୟୀ ହେବା ନେଇ ଆଶା ରହିଥିଲା । ମାତ୍ର ଏହାପରେ ଏଲଏସଜିର ବୋଲରଙ୍କ ମାପଚୁପ ବୋଲିଂ ଓ ଚମତ୍କାର ଫିଲ୍ଡିଂ ଯୋଗୁ ମୁମ୍ବାଇ ଲକ୍ଷ୍ୟ ଠାରୁ ପଛରେ ରହି ଯାଇଥିଲା । ମୁମ୍ବାଇ ପକ୍ଷରୁ ଈଶାନ ସର୍ବାଧିକ ୫୯ରନ କରିଥିବାବେଳେ ରୋହିତ ୩୭ରନ କରିଥିଲେ । ତେବେ ପରବର୍ତ୍ତୀ ସମୟରେ ମୁମ୍ବାଇ ୱିକେଟ ହରାଇବାରୁ ରନ ହାରରେ ମନ୍ଥର ରହିଥିଲା । ଶେଷ ଭାଗରେ ଟିମ ଡେଭିଡ ୧୯ ବଲରୁ ଅପରାଜିତ ୩୨ରନ ସଂଗ୍ରହ କରିଥିଲେ ମଧ୍ୟ ତାହା ଦଳ ବିଜୟ ପାଇଁ ଯଥେଷ୍ଟ ହୋଇ ନଥିଲା । ଏପରିକି ଶେଷ ଓଭରରେ ମୁମ୍ବାଇ ପାଇଁ ମାତ୍ର ୧୧ରନ ଆବଶ୍ୟକ ଥିବାବେଳେ ଦୁଇ ଅପରାଜିତ ବ୍ୟାଟ୍ସମ୍ୟାନ ଡେଭିଡ଼ ଓ କ୍ୟାମରନ ଗ୍ରୀନ ଏଲଏସଜି ବୋଲର ମୋହସିନ ଖାନଙ୍କ ଏହି ଓଭରରୁ ୬ରନ ସଂଗ୍ରହ କରି ପାରିଥିଲେ । ବ୍ୟାଟିଂରେ ୪୭ବଲରୁ ୮୯ରନ ସଂଗ୍ରହ କରି ଏଲଏସଜିକୁ ବିପର୍ଯ୍ୟୟରୁ ଉଦ୍ଧାର କରିଥିବା ମାର୍କସ ଷ୍ଟୋଇନିସଙ୍କୁ ମ୍ୟାନ ଅଫ ଦି ମ୍ୟାଚ ଘୋଷିତ କରାଯାଇଥିଲା । ଏହି ମ୍ୟାଚରେ ମୁମ୍ବାଇ ଟସ ଜିତି ଫିଲ୍ଡିଂ ନିଷ୍ପତି ନେଇଥିଲା । ଏଲଏସଜିକୁ ୧୨ରନରେ ଡବଲ ଝଟକା ଲାଗିଥିଲା । ଏହାପରେ ୩୫ରନରେ ଦଳ ତୃତୀୟ ୱିକେଟ ହରାଇଥିଲା । ମାତ୍ର ଅଧିନାୟକ କ୍ରୁନାଲ ପାଣ୍ଡ୍ୟା ଓ ଷ୍ଟୋଇନିସ ଦମଦାର ବ୍ୟାଟିଂ କରି ଚତୁର୍ଥ ୱିକେଟ ପାଇଁ ୮୨ରନ ଯୋଗ କରିଥିଲେ । ଦଳୀୟ ସ୍କୋର ୧୧୭ ବେଳେ କ୍ରୁନାଲ ୪୨ ବଲରୁ ୪୯ରନ କରି ରିଟାର୍ଡ଼ ହର୍ଟ ଆଉଟ ହୋଇଥିଲେ । ତେବେ ଷ୍ଟୋଇନିସ ଗୋଟିଏ ପଟେ ଜବଦସ୍ତ ବ୍ୟାଟିଂ କରି ଶେଷ ପର୍ଯ୍ୟନ୍ତ ୮୯ରନ କରି ଅପରାଜିତ ରହିଥିଲେ । ଏହି ମ୍ୟାଚରେ ଏଲଏସଜି ୨ ପଏଣ୍ଟ ହାସଲ କରି ନିଜ ପଏଣ୍ଟକୁ ୧୫ରେ ପହଞ୍ଚାଇବା ସହ ତୃତୀୟ ସ୍ଥାନରେ ପହଞ୍ଚିଛି ।