କଟକ ଜିଲ୍ଲା ଆଇନସେବା ପ୍ରାଧିକରଣ ପକ୍ଷରୁ ବରିଷ୍ଠ ନାଗରିକଙ୍କୁ ନେଇ ସଚେତନତା ଶିବିର
କଟକ (ଏନ୍.ଏମ୍.): କଟକ ଜିଲ୍ଲା ଆଇନସେବା ପ୍ରାଧିକରଣ ପକ୍ଷରୁ ବରିଷ୍ଠ ନାଗରିକମାନଙ୍କ ନିମନ୍ତେ ଏକ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ବରିଷ୍ଠ ନାଗରିକମାନେ କିଭଳି ସମସ୍ତ ପ୍ରକାର ସରକାରୀ ସୁବିଧା ସୁଯୋଗ ପାଇ ପାରିବେ, ସେମାନେ ବିଭିନ୍ନ କାର୍ଯ୍ୟରେ ଠକାମୀର ଶିକାର ହେଉଥିବାବେଳେ କିଭଳି ଏଥିରୁ ମୁକୁଳି ପାରିବେ, ନିଜ ସନ୍ତାନ ସନ୍ତତିଙ୍କ ଠାରୁ ପାଉଥିବା ନିର୍ଯ୍ୟାତନାରୁ କିଭଳି ସୁରକ୍ଷିତ ରହି ପାରିବେ, ସେମାନଙ୍କ ପାଇଁ କ’ଣ ଆଇନ ରହିଛି ସେ ନେଇ ବିସ୍ତୃତ ଆଲୋଚନା କରାଯାଇଥିଲା। ବିଶେଷ କରି ବରିଷ୍ଠ ନାଗରିକମାନଙ୍କ ନିମନ୍ତେ ରହିଥିବା ମାଗଣା ଆଇନ ସହାୟତା କିଭଳି ଭାବେ ପାଇପାରିବେ, ସେମାନଙ୍କ ପାଇଁ ପ୍ରତ୍ୟେକ ଥାନାରେ ଜଣେ ଜଣେ ନୋଡ଼ାଲ ଅଧିକାରୀ ରହିଥିବା ବିଷୟରେ ମଧ୍ୟ ଅବଗତ କରାଯାଇଥିଲା। ସ୍ଥାନୀୟ ଜଗତପୁରସ୍ଥିତ ଜେମାମଣୀ ମଣ୍ଡପରେ ଆୟୋଜିତ ଏହି କାର୍ଯ୍ୟକ୍ରମରେ ଆଇନଜୀବୀ ତଥା ପିଏଲଏ ସଦସ୍ୟ ବିପିନ କୁମାର ଚୌଧୁରୀଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ କଟକ ଜିଲ୍ଲା ଆଇନସେବା ପ୍ରାଧିକରଣ ସଚିବ ଜଗଦୀଶ ଚନ୍ଦ୍ର ଜେନା ଯୋଗଦେଇ ବରିଷ୍ଠ ନାଗରିକମାନଙ୍କୁ ବହୁ ହିତୋପଦେଶ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଆଇନଜୀବୀ ବିଦୁଲତା ମହାନ୍ତି, ବରିଷ୍ଠ ନାଗରିକ ମହାସଂଘ ସମ୍ପାଦକ ପଦ୍ମଲାଭ ବେହେରା ପ୍ରମୁଖ ଯୋଗଦେଇ ଆଗାମୀ ଦିନରେ ଏ ନେଇ ବରିଷ୍ଠ ନାଗରିକମାନେ ସଚେତନ ହେବାକୁ ପରାମର୍ଶ ଦେଇଥିଲେ।