ଚୌଦ୍ୱାର ପୌରାଞ୍ଚଳରେ ମେହେନ୍ତରଙ୍କ ଧାରଣା
୧୨ ଦିନ ପରେ ଆଲୋଚନାକୁ ଆସିଲେ ପୌର କର୍ତ୍ତୃପକ୍ଷ
ଚୌଦ୍ୱାର(ଏନ୍.ଏମ୍.): କଥାରେ ଅଛି କମାର କହୁଛି ଛାଡ଼ିବିନି କି ଲୁହା କହୁଛି ବଢ଼ିବିନି। ଏମିତି ଅମିଂମାସିତ ଭାବେ ଅଟକି ରହିଛି ଠିକାସଂସ୍ଥା କର୍ତ୍ତୃପକ୍ଷଙ୍କ ସହ ମେହେନ୍ତରଙ୍କ ଦାବି। ମେହେନ୍ତରମାନଙ୍କ ନ୍ୟାଯ୍ୟ ଦାବି ପାଇଁ ବିକ୍ଷୋଭ ପ୍ରଦର୍ଶନ ତଥା ପ୍ରତୀକ ଧାରଣାକୁ ଦୀର୍ଘଦିନ ଧରି ନିଦାବିଷ୍ଣୁ ପାଲଟି ଯାଇଛନ୍ତି ଚୌଦ୍ୱାର ପୌର କର୍ତ୍ତୃପକ୍ଷ। ଏହା ଦ୍ୱାରା ପୌର କର୍ତ୍ତୃପକ୍ଷ ଓ ପାରିଷଦଙ୍କ ସହ ଠିକା ସଂସ୍ଥାର ମଧୁଚନ୍ଦ୍ରିକା ଥିବା ସ୍ପଷ୍ଟ ହୋଇଛି ବୋଲି ଅଭିଯୋଗ କରିଛନ୍ତି ଧାରଣାରତ ମେହେନ୍ତରମାନେ। ସମ୍ପୂର୍ଣ୍ଣ ସହରକୁ ସ୍ୱଚ୍ଛ ରଖିବା କ୍ଷେତ୍ରରେ ପ୍ରତିଦିନ ନର୍କ କାର୍ଯ୍ୟ କରୁଥିଲେ ମଧ୍ୟ ଏମାନଙ୍କ ପାଇଁ ଚୌଦ୍ୱାର ପୌରପାଳିକା ମଧ୍ୟ ବୈମାତୃକ ମନୋଭାବ ପୋଷଣ କରିଛି। ତେବେ ମେହେନ୍ତରମାନଙ୍କ ଦୀର୍ଘ ୧୨ ଦିନର ଧାରଣା ପରେ ମୁଣ୍ଡ ନୁଆଁଇବାକୁ ବାଧ୍ୟ ହୋଇଛି ଚୌଦ୍ୱାର ପୌରପାଳିକା। ସେମାନଙ୍କ ଦ୍ୱାରା ଦିଆଯାଇଥିବା ୯ଦଫା ଦାବି ସମ୍ପର୍କରେ ପୌର କର୍ତ୍ତୃପକ୍ଷ ଆଲୋଚନା କରିବା ପରେ ଆଜି ଆନ୍ଦୋଳନ ପ୍ରତ୍ୟାହୃତ ହୋଇଛି। ତେବେ ମେହେନ୍ତରମାନଙ୍କ ଗୁହାରି ଶୁଣିବା ପାଇଁ ଚୌଦ୍ୱାର ପୌରପାଳିକାକୁ ୧୨ଦିନ ସମୟ ଲାଗିବା ଦୁର୍ଭାଗ୍ୟ ଜନକ ବୋଲି ଚର୍ଚ୍ଚା ମଧ୍ୟ ହୋଇଛି। ମିଳିଥିବା ସୂଚନା ଅନୁଯାୟୀ, ଚୌଦ୍ୱାର ପୌରପାଳିକାର ସଫେଇ ଠିକାଦାରଙ୍କ ବିରୋଧରେ ସଫେଇ କର୍ମଚାରୀମାନେ ଗତ ୧୨ ଦିନଧରି ଆନ୍ଦୋଳନକୁ ଓହ୍ଲାଇଥିଲେ। ଠିକାଦାର ମାନଙ୍କର ମନମାନିକୁ ବିରୋଧ ସମେତ ୯ ଦଫା ଦାବି ନେଇ ପୌରପାଳିକାର ସମ୍ମୁଖରେ ଧାରଣା ଦେଇଥିଲେ। ଆଜି ପୌର ନିର୍ବାହୀ ଅଧିକାରୀ ସୌମ୍ୟରଞ୍ଜନ ମିଶ୍ର, ନଗରପାଳ ମାନସୀ ସ୍ୱର୍ଣ୍ଣପ୍ରଭା ସାମଲ, ଉପନଗରପାଳ ଶୁଭେନ୍ଦୁ ସାମଲ, ଶ୍ରମିକ ନେତା ବିଷ୍ଣୁ ଚରଣ ପରିଡା, ପାରିଷଦ ଓ ସଂଘର କର୍ମକର୍ତ୍ତା ସହିତ ଆଲୋଚନା କରିଥିଲେ। ଏହାସହିତ ୯ଦଫା ଦାବିକୁ ନେଇ ସରକାରଙ୍କୁ ଅବଗତ କରାଇବା ସହ ଠିକାଦାର ସହିତ ଆଲୋଚନା କରି ୩ ଜଣ ମହିଳାଙ୍କୁ ପୁନଃ ନିଯୁକ୍ତି ସହିତ ଏଗ୍ରିମେଣ୍ଟରେ ଥିବା ସୁବିଧା କିପରି ମିଳିବ ପଦକ୍ଷେପ ନେବେ ବୋଲି କହିଥିଲେ। ଅନ୍ୟ ପକ୍ଷରେ ମାର୍ଚ୍ଚ ପରେ ନୂତନ ଠିକାଦାରଙ୍କୁ ଦାୟିତ୍ୱ ଦିଆଯିବ ବୋଲି ଆଲୋଚନା ହୋଇଥିଲା। ଏହି ଆଲୋଚନାରେ ଅନ୍ୟମାନଙ୍କ ମଧ୍ୟରେ ଲକ୍ଷ୍ମୀଧର ସାହୁ, ମିଥୁନ ନାୟକଙ୍କ ସମେତ ଠିକାଦାରର ଜଣେ ସୁପରଭାଇଜର ଉପସ୍ଥିତ ଥିଲେ। ମେହେନ୍ତରମାନଙ୍କୁ ନ୍ୟାୟ ଦେବା କ୍ଷେତ୍ରରେ ଚୌଦ୍ୱାର ପୌରପାଳିକାର କାଳକ୍ଷେପଣ ନୀତି ସମ୍ପର୍କରେ ଉପନଗରପାଳ ଶ୍ରୀ ସାମଲଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଏହାକୁ ଟାଳି ଦେଇଥିଲେ।