ମନୋରମା ମହାପାତ୍ରଙ୍କର ତୈଳ ଚିତ୍ର ଉନ୍ମୋଚନ

କଟକ(ଏନ୍‌.ଏମ୍‌.): ଓଡିଶାର ସର୍ବ ପ୍ରାଚୀନ ସାହିତ୍ୟ ସଂସ୍କୃତି ଅନୁଷ୍ଠାନ ଉତ୍କଳ ସାହିତ୍ୟ ସମାଜ ପକ୍ଷରୁ ଶ୍ରୀରାମଚନ୍ଦ୍ର ଭବନ ଠାରେ ବିଶିଷ୍ଟ ସାରସ୍ୱତ ସାଧିକା ମନୋରମା ମହାପାତ୍ରଙ୍କର ଜୀବନୀ ଓ ସାରସ୍ୱତ କୃତି ଉପରେ ଏକ ବୃତ୍ତ ଚିତ୍ର ସହିତ ପ୍ରଖ୍ୟାତ ଆଧ୍ୟାତ୍ମିକ ଗୁରୁ ପରମହଂସ ସ୍ୱାମୀ ପ୍ରଜ୍ଞାନା ନନ୍ଦ ଗିରିଙ୍କର ସନ୍ଦେଶ ସହିତ ତୈଳ ଚିତ୍ର ଉନ୍ମୋଚିତ କରାଯାଇଛି। ସାହିତ୍ୟ ସମାଜର ସଭାପତି ଡ. ଗୋବିନ୍ଦ ଚନ୍ଦ୍ର ଚାନ୍ଦଙ୍କର ଅଧ୍ୟକ୍ଷତାରେ ତୈଳଚିତ୍ର ଉନ୍ମୋଚିତ ହୋଇଥିଲା। ସାଂସଦ ଭର୍ତ୍ତୃହରି ମହତାବ ବିଶିଷ୍ଟ ସରସ୍ୱତ ସାଧକ ଦାସ ବେନହୁର ଏବଂ ଡ. ସତ୍ୟ ରାୟ କାର୍ଯ୍ୟକ୍ରମରେ ଅତିଥି ଭାବରେ ଯୋଗଦେଇ ଶ୍ରୀମତୀ ମହାପାତ୍ରଙ୍କର ସାହିତ୍ୟ କୃତି ଉପରେ ବିଭିନ୍ନ ଦିଗ ଆଲୋକପାତ କରି କହିଲେ ଯେ, ଓଡ଼ିଆ ସାହିତ୍ୟ ପ୍ରତି ଶ୍ରୀମତୀ ମହାପାତ୍ରଙ୍କର ଅବଦାନ ଅତୁଳନୀୟ। ତାଙ୍କର ସାହିତ୍ୟରେ ଏକ ସ୍ୱତନ୍ତ୍ରତା ରହିଛି କି ଯାହାକି ସମାଜକୁ ସାହିତ୍ୟ ମାଧ୍ୟମରେ ମାର୍ଗ ଦର୍ଶନ ଦେଉଛି। ପ୍ରାରମ୍ଭରେ ସାହିତ୍ୟ ସମାଜର ସଂଗଠନ ସମ୍ପାଦକ ଡ. ସୁନାମଣୀ ରାଉତ ସ୍ୱାଗତ ଭାଷଣ ଦେଇ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ। ସାଧାରଣ ସମ୍ପାଦକ, ପ୍ରାଧ୍ୟାପକ ଆଦିତ୍ୟ ପ୍ରତାପ ଧଳ ଅତିଥି ମାନଙ୍କର ପରିଚୟ ପ୍ରଦାନ କରିଥିଲେ। ଶେଷରେ ଜୀବନା ନନ୍ଦ ଅଧିକାରୀ ଧନ୍ୟବାଦ ଦେଇଥିଲେ।