ମହାନଦୀରୁ ଅଚିହ୍ନା ମହିଳାଙ୍କ ମୃତ ଦେହ ଉଦ୍ଧାର
ଚୌଦ୍ୱାର(ଏନ୍.ଏମ୍.): ଚୌଦ୍ୱାର ଅଞ୍ଚଳର ମହାନଦୀରେ ଭାସୁଥିବା ଜଣେ ଅଚିହ୍ନା ମହିଳାଙ୍କ ମୃତଦେହକୁ ପୁଲିସ ଜବତ କରିଛି। ଚୌଦ୍ୱାର ଥାନା ଟିପିଏମ ଫାଣ୍ଡି ଅର୍ନ୍ତଗତ ଡିହସାହି ଗ୍ରାମ ପାଶ୍ୱର୍ ଶନିମନ୍ଦିର ନିକଟ ମହାନଦୀରେ ଏହି ଅଚିହ୍ନା ମୃତ ଦେହ ଭାସୁଥିବା ସ୍ଥାନୀୟ ଅଞ୍ଚଳବାସୀ ଦେଖିବାକୁ ପାଇଥିଲେ। ଅଞ୍ଚଳବାସୀ ସଙ୍ଗେ ସଙ୍ଗେ ସ୍ଥାନୀୟ ଟିପିଏମ୍ ଫାଣ୍ଡି ଅଧିକାରୀଙ୍କୁ ଖବର ଦେବା ପରେ ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ଯାଞ୍ଚ କରିଥିଲେ। ତେବେ ଏହି ମୃତଦେହ ପାଣିରେ ଭାସୁଥିବା ଦେଖିବା ପରେ ଫାଣ୍ଡି ପକ୍ଷରୁ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା। ତେବେ ଅଗ୍ନିଶମ ବିଭାଗ କର୍ମଚାରୀମାନେ ପହଞ୍ଚି ନଦୀରୁ ମୃତଦେହକୁ ଉଦ୍ଧାର କରି କୂଳକୁ ଆଣିଥିଲେ। ମୃତଦେହକୁ କୂଳକୁ ଆଣିବା ପରେ ଏହା ଜଣେ ବିବାହିତା ମହିଳାଙ୍କ ଶବ ବୋଲି ଜଣାପଡିଥିଲା। ମୃତ ମହିଳାଙ୍କ ପରିଚୟ ମିଳିପାରିନଥିବା ବେଳେ ତାଙ୍କ ବୟସ ପାଖାପାଖି ୩୨ବର୍ଷ ବୋଲି ଅନୁମାନ କରାଯାଉଛି। ମୃତ ଦେହକୁ ଆମ୍ବୁଲାନ୍ସ ସାହଯ୍ୟରେ ଶବ ବ୍ୟବଚ୍ଛେଦ ପାଇଁ କଟକ ବଡ ମେଡିକାଲକୁ ପଠାଇ ପୁଲିସ ଅଧିକ ତଦନ୍ତ କରୁଛି। ଶବ ବ୍ୟବଛେଦ ପରେ ଚିହ୍ନଟ ନିମନ୍ତେ ୩ଦିନ ଶବାଗାରରେ ମୃତଦେହକୁ ସଂରକ୍ଷିତ କରାଯିବ; ଯଦି ତାଙ୍କର ପରିଚୟ ମିଳେ ତେବେ ଶବ ହସ୍ତାନ୍ତର କରାଯିବ ବୋଲି ଫାଣ୍ଡି ପକ୍ଷରୁ ସୂଚନା ଦିଆଯାଇଛି।