ଚୌଦ୍ୱାର ଡିହସାହିରେ ଶେଷ ହେଲା କାର୍ତ୍ତିକେଶ୍ୱର ଭସାଣି ଉତ୍ସବ

ଚୌଦ୍ୱାର(ଏନ୍‌.ଏମ୍‌.): ଚୌଦ୍ୱାର ଥାନା ଅନ୍ତର୍ଗତ ଡିହସାହି ଗ୍ରାମରେ ୧୬ ତମ କାର୍ତ୍ତିକେଶ୍ୱର୍ ଭସାଣି ଉତ୍ସବ ଶାନ୍ତି ଶୃଙ୍ଖଳାର ସହ ଶେଷ ହୋଇଛି। ଦୁଇ ଦିନ ଧରି ଆୟୋଜିତ ଏହି ଉତ୍ସବରେ ଅଞ୍ଚଳର ବିଭିନ୍ନ ସାହିରୁ ୧୩ଖଣ୍ଡ ମେଢ଼ ଆସି ଏକାଠି ହୋଇଥିଲେ। ଯାତ୍ରାର ପ୍ରଥମ ଦିନ ବିଭିନ୍ନ ସାହିରୁ ମେଢ଼ଗୁଡ଼ିକ ରୋଷଣି କରି ଯାତ୍ରା ପଡିଆକୁ ଆସିଥିବା ବେଳେ ପରଦିନ ଭସାଣ ଯାତ୍ରା ହୋଇଥିଲା। ତେବେ ଉଦଯାପନୀ ଦିନ ମୁଖ୍ୟଅତିଥି ଭାବେ ସ୍ଥାନୀୟ ଟିପିମ୍ ଫାଣ୍ଡି ଅଧିକାରୀ ନିରଞ୍ଜନ ଭୋଇ ଯୋଗ ଦେଇ ଏହି କାର୍ଯ୍ୟକ୍ରମ ପାଇଁ ସମସ୍ତ କର୍ମକର୍ତ୍ତାଙ୍କୁ ସାଧୁବାଦ ଜଣାଇବା ସହ ଶାନ୍ତି ଶୃଙ୍ଖଳାର ସହ ଏହା ପାଳନ ହୋଇଥିବାରୁ ସମସ୍ତଙ୍କୁ କୃତଜ୍ଞତା ଜ୍ଞାପନ କରିଥିଲେ। ଏହି ଅବସରରେ ଉପସ୍ଥିତ ଅତିଥିମାନଙ୍କ ଉପସ୍ଥିତିରେ ଆୟୋଜିତ ସାଧାରଣ ସଭାରେ ବାଲୁଙ୍କେଶ୍ୱର ବିଦ୍ୟାପୀଠର ଚଳିତ ବର୍ଷ ଦଶମ ଶ୍ରେଣୀରେ ଭଲମାର୍କ ରଖି ଉତ୍ତୀର୍ଣ୍ଣ ହୋଇଥିବା ୫ଜଣ କୃତି ଛାତ୍ରଛାତ୍ରୀମାନଙ୍କୁ ଅତିଥିମାନଙ୍କ ଦ୍ୱାରା ମାନପତ୍ର ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା। ତେବେ ମେଳଣ ପଡ଼ିଆରେ ସାମିଲ ହୋଇଥିବା ମେଢ଼ ମାନଙ୍କ ମଧ୍ୟରୁ ଥାନପତି ଭାବେ ପୂଝାରୀ ସାହି ମେଢ଼କୁ ଏକ ନମ୍ବର୍ ଭାବେ କମିଟି ତରଫରୁ ଛନ୍ଦା ଦିଆଯିବା ପରେ ହରିଜନ ସାହି, ମଲ୍ଲିକ ସାହି, ମଳୀକ ସାହି, ଉପର ସାହି, ଭୁଆସୁଣୀ ଛକ,ଦଧିବାମନ ସାହି, ମଠ ସାହି, ବଗିଚା ସାହି, ମଙ୍ଗଳା ସାହି, ଚୌଧୂରୀ ସାହି, ପାଟଣାସାହି, ଛକ ସାହି ପ୍ରମୁଖ ମେଢ଼ଗୁଡ଼ିକୁ ପୂଜା କମିଟି ତରଫରୁ ଛନ୍ଦା ଦିଆଯାଇଥିଲା। ଏହାପରେ ମେଢ଼ଗୁଡ଼ିକ କ୍ରମାନ୍ୱୟରେ ଯାତ୍ରା ପଡ଼ିଆରୁ ବାହାରି ସମସ୍ତ ସାହି ପରିକ୍ରମା କରିଥିଲେ। ସାହି ପରିକ୍ରମା ବେଳେ ପାରମ୍ପରିକ ବାଦ୍ୟ, ଆଦିବାସୀ ନାଚ ସାଙ୍ଗକୁ ଦୁଲ୍ ଦୁଲି ବାଜାରେ ଗଗନ ପବନ ମୁଖରିତ ହୋଇ ଉଠିଥିଲା। ବିଭିନ୍ନ ବାଦ୍ୟର ତାଳେ ତାଳେ ଅଞ୍ଚଳର ଯୁବକମାନଙ୍କ ମନଖୋଲା ନାଚ ଦର୍ଶକଙ୍କୁ ଅଧିକ ଆମୋଦିତ କରିଥିଲା। ଭସାଣି ଶୋଭାଯାତ୍ରାରେ ମେଢ଼ମାନଙ୍କୁ କ୍ରମାନ୍ୱୟରେ ନିଆଯାଇ ଶେଷରେ ଶନି ମନ୍ଦିର ନିକଟସ୍ଥ ଅସ୍ଥାୟୀ ଜଳାଶୟରେ ବିସର୍ଜନ କରାଯାଇଥିଲା। ଅନ୍ୟପକ୍ଷରେ ମେଢ଼ମାନଙ୍କୁ ଏକତ୍ରିତ ଅବସ୍ଥାରେ ଦର୍ଶନ କରିବା ପାଇଁ ଚୌଦ୍ୱାର ତଥା ଆଖପାଖ ଅଞ୍ଚଳର ହଜାର ହଜାର ଲୋକଙ୍କ ସମାଗମ ହୋଇଥିଲା। ଏହି ଅବସରରେ ମେଳଣ ପଡିଆରେ ମିନାବଜାର ଦେଖିବାକୁ ମିଳିଥିଲା। ରାଜ୍ୟ ତଥା ରାଜ୍ୟ ବାହାରୁ ବିଭିନ୍ନ ବ୍ୟବସାୟୀମାନେ ଏଠାରେ ନିଜ ନିଜର ବ୍ୟବସାୟ କରିଥିଲେ। ଘରକରଣା ଜିନିଷ ଠାରୁ ଆରମ୍ଭ କରି ଦୋଳି, ଛୋଟ ପିଲମାନଙ୍କ କଣ୍ଢେଇ, ବିଭିନ୍ନ ମନୋରଞ୍ଜନ ଭିତ୍ତିକ ଉପକରଣ, ପୂଜା ସାମଗ୍ରୀ ସହ ଚଟପଟି ଖାଦ୍ୟ ଯଥା ଚାଟ୍‌, ଆଇସକ୍ରିମ, ଦହିବରା, ପାମ୍ପଡ, ମୋମୋ, ରସାବଳି, ମଥୁରା କେକ୍ ବିଭିନ୍ନ ପ୍ରକାର ଖାଦ୍ୟର ପସରାରେ ପ୍ରବଳ ଜନଗହଳି ଦେଖୁବାକୁ ମିଳିଥିଲା। ଚୌଦ୍ୱାର ତଥା ଆଖ ପାଖ ଅଞ୍ଚଳରୁ ବହୁ ଲୋକ ଆସି ଏକାଠି ହୋଇ ଏହି ଯାତ୍ରାର ମଜା ଉଠାଇଥିଲେ। ତେବେ ଶୃଙ୍ଖଳା ଦୃଷ୍ଟିରୁ ପ୍ରଶାସନ ପକ୍ଷରୁ ଯାତ୍ରା ପଡିଆରେ ଏକ ଅସ୍ଥାୟୀ ପୁଲିସ କ୍ୟାମ୍ପ ସହ ବିଦ୍ୟୁତ୍ ବିଭାଗ ଏବଂ ଅନ୍ୟାନ୍ୟ ବିଭାଗ ସଜାଗ ରହିଥିଲେ। ଚୌଦ୍ୱାର ଥାନାର ଭାରପ୍ରାପ୍ତ ଅଧିକାରୀ ବିଶ୍ୱରଞ୍ଜନ ସାହୁଙ୍କ ତତ୍ତ୍ୱାବଧାନରେ ଟିପିଏମ୍ ଫାଣ୍ଡି ଅଧିକାରୀ ନିରଞ୍ଜନ ଭୋଇଙ୍କ ସମେତ ୨୦ଜଣ ଅଫିସର, ୪ଫ୍ଲାଟୁନ ରିଜର୍ଭ ପୁଲିସ ଓ ଅନ୍ୟାନ୍ୟ ପୁଲିସ ଅଧିକାରୀ ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କରିଥିଲେ। ଶାନ୍ତି ଶୃଙ୍ଖଳାର ସହ ଏହି ମେଳଣ ସମାପନ ହୋଇଥିବାରୁ କମିଟି ମୁଖ୍ୟ ଉପଦେଷ୍ଟା ଶ୍ରୀଧର ରାଉଳ, ସଂପାଦକ ନରେଶ ମହାରଣା, ସଭାପତି ମନମୋହନ ପରିଡା, ଉପସଭାପତି ଦୀପକ ବରାଳ, କୋଷାଧ୍ୟକ୍ଷ ତ୍ରିନାଥ ସ୍ୱାଇଁ ସମସ୍ତ ଅଞ୍ଚଳବାସୀଙ୍କୁ କୃତଜ୍ଞତା ଜଣାଇଛନ୍ତି।