ଓଡିଶା ଯୁବ ସାମ୍ବାଦିକ ସଂଘର ପ୍ରତିଭା ଓ ଗୌରବ ସମ୍ମାନ
#କଟକ(ଏନ୍.ଏମ୍.): ସମାଜର ସ୍ଥିତି, ଅବସ୍ଥିତି ଆଉ ଭଲମନ୍ଦକୁ ନେଇ ଜନସାଧାରଣଙ୍କ ଠାରୁ ପ୍ରଶାସନ ଓ ସରକାରଙ୍କ ପର୍ଯ୍ୟନ୍ତ ସୂଚନା ଦେଇଥାଏ ସାମ୍ବାଦିକ। ସମ୍ବିଧାନ ପରିଚାଳନା ପାଇଁ ୩ଟି ସ୍ତମ୍ଭ ରହିଥିବାବେଳେ ଏହାକୁ ସମନ୍ୱୟର ରଜୁରେ ବାନ୍ଧିରଖିଥାଏ ଗଣମାଧ୍ୟମ। ତେଣୁ ଗଣମାଧ୍ୟମର ଦାୟିତ୍ୱବୋଧତାକୁ ନେଇ କେହି କେହି ଚତୁର୍ଥ ସ୍ତମ୍ଭବୋଲି କହିଥାନ୍ତି। ତେଣୁ ସମ୍ବାଦ ସଂଗ୍ରହ ଠାରୁ ଆରମ୍ଭ କରି ପରିବେଷଣ ପର୍ଯ୍ୟନ୍ତ ସାମ୍ବାଦିକ ଯେଉଁ ପରିଶ୍ରମ କରିଥାନ୍ତି ତାହାର ପ୍ରକୃତ ମୂଲ୍ୟ କେହିବି ବୁଝିପାରିବେନି ଯଦି ନିଜେ ଜଣେ ସାମ୍ବାଦିକ ହୋଇନଥିବେ। ସରକାର ଆଜିର ଦିନରେ ସାମ୍ବାଦିକଙ୍କ ପାଇଁ ବହୁ ଯୋଜନା କରିଛନ୍ତି। ତଥାପି କେଉଁଠି ନା କେଉଁଠି ଟିକେ ସମସ୍ୟା ରହିଯାଇଛି। ତେବେ ସରକାରୀସ୍ତରରେ ସାମ୍ବାଦିକଙ୍କୁ ମୌଳିକ ସୁବିଧା ସୁଯୋଗ ଯୋଗାଇ ଦେବା ପାଇଁ ଓଡ଼ିଶା ଯୁବ ସାମ୍ବାଦିକ ସଂଘ ସର୍ବଦା ପ୍ରୟାସ ଜାରି ରଖିଛି ବୋଲି ଓଡିଶା ଯୁବ ସାମ୍ବାଦିକ ସଂଘର ଚତୁର୍ଦଶ ଓ ପଞ୍ଚଦଶ ଓଡିଶା ପ୍ରତିଭା ଓ ଗୌରବ ସମ୍ମାନ କାର୍ଯ୍ୟକ୍ରମରେ ବକ୍ତାମାନେ ମତପୋଷଣ କରିଥିଲେ। ସ୍ଥାନୀୟ ଯୋବ୍ରା ସ୍ଥିତ ନୌବାଣିଜ୍ୟ ସଂଗ୍ରହାଳୟରେ ଆୟୋଜିତ ଏହି କାର୍ଯ୍ୟକ୍ରମର ମୁଖ୍ୟ ଲକ୍ଷ୍ୟ ଥିଲା ସୁସ୍ଥ ଓ ସମୃଦ୍ଧ ସମାଜ ଗଠନରେ ସାମାଜିକ ଅନୁଷ୍ଠାନର ଭୂମିକା। ତେବେ ଏହି ଅବସରରେ କାର୍ଯ୍ୟରତ ସାମ୍ବାଦିକଙ୍କର ଯଦି କୌଣସି ଦୁର୍ଘଟଣା ଘଟେ ତେବେ ଓଡିଶା ଯୁବ ସାମ୍ବାଦିକ ସଂଘ ପକ୍ଷରୁ ପ୍ରଥମେ ୫ ହଜାର ଟଙ୍କା ଏବଂ ପରେ କାର୍ଯ୍ୟରେ ଯୋଗଦେବା ପର୍ଯ୍ୟନ୍ତ ମାସିକ ୩ ହଜାର ଟଙ୍କା ଆର୍ôଥକ ସହାୟତା ରାଶି ପ୍ରଦାନ କରାଯିବ ବୋଲି ସଂଘ ପକ୍ଷରୁ ଘୋଷଣା କରାଯାଇଥିଲା। ଏହି କାର୍ଯ୍ୟକ୍ରମର ଉଦ୍ଘାଟନୀ ଉତ୍ସବରେ ମାନ୍ୟଗଣ୍ୟ ଅତିଥିମାନଙ୍କ ମଧ୍ୟରେ ଦୟାନନ୍ଦ ମହାପାତ୍ର, ଜଷ୍ଟିସ ବିଶ୍ୱନାଥ ରଥ, ଡାକ୍ତର ସୁରେନ୍ଦ୍ର କୁମାର ମହାନ୍ତି, ମାନସ ପଣ୍ଡା, ମଞ୍ଜୁଶ୍ରୀ ସ୍ୱପ୍ନାମୟୀ ସାହୁ, ବିଧାୟକ ପ୍ରକାଶ ଚନ୍ଦ୍ର ସେଠୀ, ଶରତ କୁମାର ଦାସ, ଜଷ୍ଟିସ ବିଦ୍ୟୁତ ରଞ୍ଜନ ଷଢଙ୍ଗି, ଡାକ୍ତର ଉମେଶ ରାଏ, ସିଏମସି ମେୟର ସୁବାସ ସିଂହ, ପୂର୍ବତନ ବିଧାୟକ ଇଂ. ମହମ୍ମଦ ମୋକିମ, ପ୍ରଭାତ ରଞ୍ଜନ ବିଶ୍ୱାଳ ପ୍ରମୁଖ ଉପସ୍ଥିତ ଥିଲେ। ସଭାପତି ପଦ୍ମଲୋଚନ ମିଶ୍ର, ଡକ୍ଟର ଦୁର୍ଗାଚରଣ ଦାସ, ଉଲ୍ଲାସ ସେନ, ପ୍ରାର୍ଥ ସ୍ୱାଇଁ, ଜିତେନ୍ଦ୍ର ଦାସ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିବାବେଳେ ସାଧାରଣ ସମ୍ପଦକ ଦୀପେଶ ମହାପାତ୍ର ଧନ୍ୟବାଦ ଦେଇଥିଲେ।