କଟକ ଜିଲ୍ଲା ସର୍ବୋଦୟ ମଣ୍ଡଳ ପକ୍ଷରୁ ସନ୍ଥ ବିନୋବାଙ୍କ ୧୩୦ତମ ଜୟନ୍ତୀ

#କଟକ(ଏନ୍‌.ଏମ୍‌.) : ଛୁଞ୍ଚି ମୁନରେ ମୁନେ ଜମି ନଦେବାରୁ ଯେଉଁ ଦେଶରେ ମହାଭାରତ ଯୁଦ୍ଧ ହୋଇଥିଲା, ସେହି ଦେଶରେ ମହାତ୍ମା ଗାନ୍ଧୀଙ୍କ ଆଧ୍ୟାତ୍ମିକ ଉତ୍ତରାଧିକାରୀ ସନ୍ଥ ବିନୋବା ଭାବେ ୮୦ହଜାର କିଲୋମିଟର ପଦଯାତ୍ରା କରି ୪୭ଲକ୍ଷ ଏକର ଜମି ଦାନ ସଂଗ୍ରହ କରି ଭୂମିହୀନ ଲୋକଙ୍କ ମଧ୍ୟରେ ବଣ୍ଟନ କରିଥିଲେ। ସେହିଭଳି ଓଡ଼ିଶା ପାଇଁ ଲୌହ ମାନବୀ ସରଳା ଦେବୀଙ୍କୁ ପ୍ରଥମ ବ୍ୟକ୍ତିଗତ ସତ୍ୟାଗ୍ରହୀ ରୂପେ ମହାତ୍ମା ଗାନ୍ଧୀ ବାଛିଥିଲେ। ଗାନ୍ଧୀଙ୍କ ଗ୍ରାମସ୍ୱରାଜ୍ୟ ସ୍ୱପ୍ନକୁ ସଫଳ କରିବା ପାଇଁ ସେ ଦେଶରେ ୧ଲକ୍ଷ ୧୦ହଜାର ଗାଁରେ ଗ୍ରାମଦାନ କରାଇଥିଲେ। ଯେଉଁଠି ଭୂମିର ମାଲିକାନା ବ୍ୟକ୍ତିର ନହୋଇ ଗ୍ରାମର ହେବ। ସମସ୍ତେ ସମୂହ କୃଷିକରି ସମୂହ ଗୁଜରାଣ ମେଣ୍ଟାଇବେ। ଗ୍ରାମର କଳିତକରାଳ ଗାଁରେ ସମାଧାନ ହେବ ଓ ଥାନା, କୋର୍ଟ କଚେରୀକୁ ଯିବ ନାହିଁ। ହିନ୍ଦୁ ଧର୍ମରେ ମହିଳାମାନଙ୍କର ବେଦ ବେଦାନ୍ତ ଅଧ୍ୟୟନ କରିବାର ଅଧିକାର ନଥିବା ଧର୍ମାଧୀଶମାନେ କହୁଥିବା ବେଳେ ବିନୋବା ଏହା ବିରୋଧରେ ସଂଗ୍ରାମ କରି ବ୍ରହ୍ମବିଦ୍ୟା ମନ୍ଦିର ସ୍ଥାପନ ମାଧ୍ୟମରେ ମହିଳାମାନଙ୍କୁ ଅଧିକାର ଦିଆଇଥିଲେ। ଚମ୍ବଲ ଡାକୁ ଲୋକମାନ ଓ ତାଙ୍କର ଦଳଙ୍କୁ ସେ ମୁଖ୍ୟ ସ୍ରୋତକୁ ଫେରାଇ ଆଣିଥିଲେ। ପ୍ରଥମ ପଞ୍ଚବାର୍ଷିକୀ ଯୋଜନା କାଳରେ ସରକାର ବୃହତ ଶିଳ୍ପକୁ ପ୍ରାଧାନ୍ୟ ଦେଇଥିବାବେଳେ ବିନୋବା ଏହାର ବିରୋଧ କରି ଦେଶ କୁଟୀର ଶିଳ୍ପ ଓ କ୍ଷୁଦ୍ର ଶିଳ୍ପକୁ ପ୍ରାଧାନ୍ୟ ଦେଇ ଏ ଦେଶର କୋଟି କୋଟି ହାତକୁ କାମ ଯୋଗାଇବା ଜରୁରୀ ବୋଲି ସେ ଯୁକ୍ତି ଉପସ୍ଥାପନ କରିଥିଲେ। ରାଷ୍ଟ୍ରପିତା ମହାତ୍ମା ଗାନ୍ଧୀ ତାହାଙ୍କୁ ତାଙ୍କର ପ୍ରଥମ ବ୍ୟକ୍ତିଗତ ସତ୍ୟାଗ୍ରହୀ ରୂପେ ଘୋଷଣା କରିଥିଲେ। ସେ ଗୀତା ପ୍ରବଚନ, ବେଦ ଅନୁଚିନ୍ତନ, ସ୍ଥିତପ୍ରଜ୍ଞ ଦର୍ଶନ, କୋରାନ ସାର ଭଳି ଅନେକ ପୁସ୍ତକର ରଚନା କରିଥିଲେ ବୋଲି କଟକ ଜିଲ୍ଲା ସର୍ବୋଦୟ ମଣ୍ଡଳ ପକ୍ଷରୁ ସନ୍ଥ ବିନୋବା ଭାବେଙ୍କ ୧୩୦ତମ ଜୟନ୍ତୀ ଉତ୍ସବରେ ଚିତ୍ତରଞ୍ଜନ ମହାନ୍ତିଙ୍କ ଅଧ୍ୟକ୍ଷତାରେ ଉପସ୍ଥିତ ବ୍ୟକ୍ତିବିଶେଷ ମତପ୍ରକାଶ କରିଥିଲେ। ସ୍ଥାନୀୟ ଗାନ୍ଧୀ ଭବନଠାରେ ଆୟୋଜିତ ଏହି ସଭାରେ ଡଃ ବିଶ୍ୱଜିତ, ବିଶ୍ୱଜିତ ପାଣି, ବିଶ୍ୱଜିତ ସୂର୍ଯ୍ୟବଂଶୀ, ଜଗନ୍ନାଥ ମହାନ୍ତି, ଡ. ଦୀପାୟନ ପଟ୍ଟନାୟକ, ସୁସ୍ମିତା ପଟ୍ଟନାୟକ, ପ୍ରସନ୍ନ ମହାପାତ୍ର, ଦେବୀପ୍ରସନ୍ନ ମହାପାତ୍ର, ସବିତା ବେହେରା, ହେମନ୍ତ ଭରଦ୍ୱାଜ, କାଶୀନାଥ ସ୍ୱାଇଁ ପ୍ରମୁଖ ଉପସ୍ଥିତ ରହି ମତାମତ ରଖିବା ସହ ବିନୋବାଙ୍କ ପ୍ରତି ଶ୍ରଦ୍ଧା ସୁମନ ଅର୍ପଣ କରିଥିଲେ। ଉଲ୍ଲେଖଯୋଗ୍ୟ ଯେ, ସର୍ବସେବା ସଂଘ ପକ୍ଷରୁ ବାରାଣସୀ ସ୍ଥିତ ସର୍ବୋଦୟ ସାଧନା କେନ୍ଦ୍ର ଧ୍ୱଂସ ପ୍ରତିବାଦରେ ଅନୁଷ୍ଠିତ ୧୦୦ ଦିନ ସତ୍ୟାଗ୍ରହକୁ ସମର୍ଥନ କରିବା ସହ ଆଗାମୀ ଦିନରେ ବ୍ୟାପକ କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି ଘୋଷଣା କରାଯାଇଥିଲା।କାର୍ଯ୍ୟକ୍ରମକୁ ସରଳା ଦେବୀ – ଭାଗିରଥି ମହାପାତ୍ର ଫାଉଣ୍ଡେସନ ଟ୍ରଷ୍ଟ ସହଯୋଗ କରିଥିଲେ। ଶେଷରେ କଟକ ଜିଲ୍ଲା ସର୍ବୋଦୟ ମଣ୍ଡଳର ସମ୍ପାଦକ ଲକ୍ଷ୍ମୀପ୍ରକାଶ ମହାପାତ୍ର ଧନ୍ୟବାଦ ଅର୍ପଣ କରିଥିଲେ।