ଆଳୁ ଓଜନରେ ଠକେଇ, କ୍ଷତି ସହୁଛନ୍ତି ସହରର ଖୁଚୁରା ବିକ୍ରେତା!

କଟକ (ଏନ୍‌.ଏମ୍‌.): ଗତ କିଛିଦିନ ହେବ ରାଜ୍ୟରେ ଆଳୁ ଦର ହୁ ହୁ ହୋଇ ବଢ଼ି ଚାଲିଥିଲା। ଏହାକୁ ନିୟନ୍ତ୍ରଣରେ ଆଣିବା ପାଇଁ ସରକାର ଓ ଯୋଗାଣ ବିଭାଗ ର ସମସ୍ତ ଉଦ୍ୟମ ସତ୍ତ୍ୱେ ନିୟନ୍ତ୍ରଣକୁ ନଆସିବାରୁ ଶେଷରେ ଆଳୁ ଏକ ନିର୍ଦ୍ଧାରିତ ଦରରେ ଗତ ତିନିଦିନ ହେଲା ସରକାରୀ ଖୁଚୁରା ବିକ୍ରୟ କେନ୍ଦ୍ର ଗୁଡିକରେ ଖୁଚୁରା ବିକ୍ରେତା ମାନଙ୍କ ମାଧ୍ୟମରେ ଯୋଜନା କରାଯାଇ ୩ କିଲୋ କୁ ଶହେ ଟଙ୍କା ଦରରେ ବିକ୍ରୀ ଆରମ୍ଭ କରାଯାଇଥିଲା। ଖୁଚୁରା ବିକ୍ରୟ କେନ୍ଦ୍ର ରେ ନିର୍ଦ୍ଧାରିତ ଦରରେ ପର୍ଯ୍ୟାପ୍ତ ଆଳୁ କାର୍ଡ ଧାରୀ ବିନା କାର୍ଡଧାରୀ ସମସ୍ତଙ୍କ ପାଇଁ ଉପଲବ୍ଧ ହେବାର ୨୪ ଘଣ୍ଟା ମଧ୍ୟରେ ଆଳୁ ଦର ଓ ବଜାର ରେ ପର୍ଯ୍ୟାପ୍ତ ଆଳୁ ଉପଲବ୍ଧ ହେବା ଆରମ୍ଭ ହୋଇଯାଇଥିଲା। ଧିରେ ଧିରେ ଉପର ମୁହାଁ ଆଳୁ ଦର ନିମ୍ନଗାମୀ ହୋଇ ଆଜି ସହରର ବିଭିନ୍ନ ପରିବା ମାର୍କେଟ ରେ ୩ କିଲୋକୁ ୯୦ ଟଙ୍କା ଦରରେ ପର୍ଯ୍ୟାପ୍ତ ପରିମାଣର ଆଳୁ ଉପଲବ୍ଧ ହୋଇପାରିଛି। ହେଲେ ପରିତାପର ବିଷୟ ସରକାର ଓ ଯୋଗାଣ ବିଭାଗର ଏହି ଆଳୁ ଦର ନିୟନ୍ତ୍ରଣ ମିଶନକୁ ସଫଳ କରିବାକୁ ଯାଇ ଖୁଚୁରା ବିକ୍ରେତା ମାନେ ବ୍ୟାପକ ଭାବେ ଆର୍ôଥକ କ୍ଷତିର ସମ୍ମୂଖୀନ ହୋଇଛନ୍ତି। ଏହାର ମୁଖ୍ୟ କାରଣ ହେଲା ପାଇକାରି ଆଳୁ ବେପାରୀ ମାନଙ୍କ ବିନା ଓଜନ ବିନା ବଛା ବଛିରେ ଯୋଗାଣ ବିଭାଗ ପ୍ରୋତ୍ସାହନରେ ଖୁଚୁରା ବିକ୍ରେତା ମାନଙ୍କୁ ଧାର୍ଯ୍ୟ ଓଜନ ଠାରୁ କମ୍ ଅର୍ଥାତ୍ ପ୍ରତ୍ୟେକ ଆଳୁ ପ୍ୟାକେଟରେ ଦେଢ କିଲୋରୁ ଦୁଇ କିଲୋ କମ୍ ଓ ଦୁଇ କିଲୋରୁ ତିନି କିଲୋ ପଚାସଢା ଖାଦ୍ୟ ଅନୁପଯୋଗୀ ଆଳୁ ଯୋଗାଣ ବୋଲି କଟକ ରିଟେଲ ଡିଲର୍ସ ଆସୋସିଏସନ୍ ପକ୍ଷରୁ ଗୁରୁତର ଅଭିଯୋଗ କରାଯାଇଛି। ଆଶ୍ଚର୍ଯ୍ୟର କଥା ଏ ସମ୍ପର୍କରେ ଯୋଗାଣ ବିଭାଗ ର ଅଧିକାରୀ ଙ୍କୁ ଖୁଚୁରା ବିକ୍ରେତା ମାନେ ଅଭିଯୋଗ କଲେ ଯୋଗାଣ ଅଧିକାରୀମାନେ କୌଣସି ପଦକ୍ଷେପ ଗ୍ରହଣ କରିବା ପରିବର୍ତ୍ତେ ଓଲଟା ଏକ ନିର୍ଦ୍ଧିଷ୍ଟ ହାରାହାରି ଓଜନ ଆକଳନ କରି ବିନା ଓଜନ ବିନା ରସିଦରେ ଆଳୁ ନେବାକୁ କୁହାଯାଉଛି। କଟକ ରିଟେଲ ଡିଲର୍ସ ଆସୋସିଏସନ୍‌ର କାର୍ଯ୍ୟକାରୀ ସଭାପତି ସୈୟଦ ଏକ୍ରାମ ହୁସେନ ଆଜି ଏକ ପ୍ରେସ ଇସ୍ତାହାରରେ ଦର୍ଶାଇଛନ୍ତି ଯେ, ଓଡିଶା ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗର ମନ୍ତ୍ରୀ ରାଜ୍ୟର ଖୁଚୁରା ବିକ୍ରେତା ମାନଙ୍କୁ ସାମଗ୍ରୀ ଯୋଗାଣ ରେ କିଭଳି ଦାନାଏ ହେଲେ କମ୍ ପରିମାଣର ସାମଗ୍ରୀ ଯୋଗାଣ ନହେବ ସେ ଦିଗରେ ବିହିତ ପଦକ୍ଷେପ ନେବାକୁ ଯୋଗାଣ ବିଭାଗକୁ କଡ଼ା ନିର୍ଦ୍ଦେଶ ଦେଇଥିବା କଥା ଗଣମାଧ୍ୟମରେ ପ୍ରସାରଣ ହୋଇଥିଲା। ମାତ୍ର ମନ୍ତ୍ରୀଙ୍କ ଏପରି ନିର୍ଦ୍ଦେଶ ଯେତେବେଳେ କଟକ ମହାନଗର ଭଳି ଅଞ୍ଚଳରେ କାର୍ଯ୍ୟକାରୀ ହେବା ବଦଳରେ ପରୋକ୍ଷରେ ଯୋଗାଣ ବିଭାଗ ଯୋଗାଣ ଅଧିକାରୀଙ୍କ ଉପସ୍ଥିତିରେ ଧାର୍ଯ୍ୟ ଓଜନ ଠାରୁ କମ୍ ପରିମାଣର ଆଳୁ ପାଇକାରି ଆଳୁ ବେପାରୀମାନେ ଖୁଚୁରା ବିକ୍ରେତାମାନଙ୍କୁ ନେବାକୁ ବାଧ୍ୟ କରୁଛନ୍ତି, ସେଠାରେ ରାଜ୍ୟର ଅନ୍ୟାନ୍ୟ ଅଞ୍ଚଳ ଓ ଗ୍ରାମାଞ୍ଚଳ କଥା ସହଜରେ ଅନୁମାନ କରାଯାଇପାରେ। ଏ ଦିଗରେ ବିଧିବଦ୍ଧ ତଦନ୍ତ କରାଯାଇ ଦୋଷୀ ଅଧିକାରୀ ଓ ଆଳୁ ପାଇକାରି ବେପାରୀମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଖୁଚୁରା ବିକ୍ରେତାମାନଙ୍କୁ ଆର୍ôଥକ କ୍ଷତିରୁ ରକ୍ଷା କରିବା ସହ ଓଜନ କରାଯାଇ ଉପଯୁକ୍ତ ମାନ ଓ ପରିମାଣର ଆଳୁ ଯୋଗାଇ ଦେବାର ବ୍ୟବସ୍ଥା କରିବା ପାଇଁ ଶ୍ରୀ ହୁସେନ ଯୋଗାଣ ମନ୍ତ୍ରୀଙ୍କ ନିକଟରେ ଦାବି କରିଛନ୍ତି।