ବାରବାଟୀ-କଟକରେ କଂଗ୍ରେସ ପ୍ରାର୍ଥୀ ସୋଫିଆ ଫିର୍ଦୋଷଙ୍କ ମାରାଥନ ପ୍ରଚାର
କଟକ(ଏନ୍.ଏମ୍.): ବାରବାଟୀ-କଟକରୁ କଂଗ୍ରେସ ପ୍ରାର୍ଥୀ ସୋଫିଆ ଫିର୍ଦ୍ଦୋଷଙ୍କ ପ୍ରଚାର ଘନେଇବାରେ ଲାଗିଛି । ସିଏମସି ଅନ୍ତର୍ଗତ ବିଭିନ୍ନ ୱାର୍ଡରେ ପଦଯାତ୍ରା କରି ସେ ପ୍ରଚାର କରିଥିଲେ । ପ୍ରାରମ୍ଭରୁ ଶ୍ରୀମତୀ ସୋଫିଆ ସ୍ଥାନୀୟ ମସ୍ତାନ ଦରଘାରେ ଚାଦର ଚଢାଇ ପଦଯାତ୍ରା ଆରମ୍ଭ କରିଥିଲେ । ବିଧାୟକ ତଥା ତାଙ୍କର ପିତା ଇଂ. ମହମ୍ମଦ ମୋକିମଙ୍କ ସହିତ ମିଶି ୱାର୍ଡର ବିଭିନ୍ନ ଅଞ୍ଚଳର ଘରକୁ ଘର ବୁଲି ଭୋଟରଙ୍କୁ ଭେଟି ବିଗତ ପାଞ୍ଚ ବର୍ଷରେ କଟକ ସହରରେ ହୋଇଥିବା ଉନ୍ନତିମୂଳକ କାର୍ଯ୍ୟ ସଂପର୍କରେ ଜନସାଧାରଣଙ୍କୁ ଅବଗତ କରାଇବା ସହ କଟକ ସହର ସର୍ବବିଧ ବିକାଶଧାରକୁ ଆହୁରି ଅଗ୍ରଗତି କରିବା ପାଇଁ ଆଗାମୀ ମେ’୨୫ ତାରିଖରେ ହେବାକୁ ଥିବା ନିର୍ବାଚନରେ କଂଗ୍ରେସକୁ ବିପୁଳ ସଂଖ୍ୟାରେ ପୁଣି ଠାରେ ଜିତାଇବା ପାଇଁ ସୋଫିଆ ଫିର୍ଦ୍ଦୋଷ ଜନସାଧାରଣଙ୍କୁ ନିବେଦନ କରିଥିଲେ । ବିଧାୟକ ମୋକିମଙ୍କ ଦ୍ୱାରା କଟକ ସହରରେ ବିଗତ ପାଞ୍ଚ ବର୍ଷରେ ହୋଇଥିବା ବିଭିନ୍ନ କାର୍ଯ୍ୟର ଏକ ରିପୋର୍ଟ କାର୍ଡ ଜନସାଧାରଣମାନଙ୍କୁ କଂଗ୍ରେସ କର୍ମୀମାନେ ବାଣ୍ଟିଥିଲେ । ଏହି ଅବସରରେ ବିଧାୟକ ମୋକିମଙ୍କ ଉନ୍ନୟନ ପାଣ୍ଠିରୁ ନବୀକରଣ ହୋଇଥିବା ସୂତାହାଟ ମହଲ୍ଲା କମିଟି କମ୍ୟୁନିଟି ଗୃହ ପାଇଁ ମହଲ୍ଲା କମିଟି ସଭାପତି ଓ ସଂପାଦକ ବିଧାୟକ ମୋକିମଙ୍କୁ ଧନ୍ୟବାଦ ଜଣାଇବା ସହ ସମ୍ବର୍ଦ୍ଧନା ଦେଇଥିଲେ । ସେହିପରି ବିଭିନ୍ନ ଅଞ୍ଚଳରେ ହୋଇଥିବା ଉନ୍ନୟମ ମୂଳକ କାର୍ଯ୍ୟ ପାଇଁ ବିଭିନ୍ନ ସାହି ମୁରବୀମାନେ ଶୁଭେଚ୍ଛା ଜଣାଇଥିଲେ । ଆଗାମୀ ଦିନରେ ବାକି ରହିଥିବା ବିଭିନ୍ନ କାର୍ଯ୍ୟକୁ ସଂପୂର୍ଣ୍ଣ କରାଯିବ ବୋଲି ବିଧାୟକ ପ୍ରାର୍ଥୀ ସୋଫିଆ ଫିର୍ଦ୍ଦୋଷ ପ୍ରତିଶ୍ରୁତି ଦେଇଥିଲେ । ଅନ୍ୟମାନଙ୍କ ମଧ୍ୟରେ ନଗର କଂଗ୍ରେସ ପୂର୍ବତନ ସଭାପତି ଗିରିବାଳା ବେହେରା, କର୍ପୋରେଟର ଲିଜାରାଣୀ ରାଉତ, ସେକ ଲିଆକତଉଦ୍ଦୀନ ଉଦ୍ଦୀନ ଅହମ୍ମଦ, ସେକ ଅସଲମ, ଜାକିର ହୁସେନ, ଫୟାଜ ରିଜବୀ, ମହମ୍ମଦ ନଜିର, ସେକ ଗୁଲାମମୋଇଦ୍ଦିନ, ସେକ ମିନାଜଉଦ୍ଦୀନ, ସେକ ସେକୁ, ସେକ ଆବିଦ, ହାକିମ ଖାନ, ସେକ ସମିମ, ଜି ଭାସ୍କର ରାଓ ପ୍ରମୁଖ ଉପସ୍ଥିତ ଥିଲେ ।