ବିନା ଟେଣ୍ଡରରେ ସିଏମସିର ନିମ୍ନମାନର ମଶାତେଲ କିଣା ନେଇ ରାଷ୍ଟ୍ରୀୟ ପଛୁଆବର୍ଗ ମହାସଂଘ ପକ୍ଷରୁ ଦୁର୍ନୀତି ନିବାରଣ ବିଭାଗକୁ ଦାବିପତ୍ର
କଟକ(ଏନ୍.ଏମ୍.): କଟକ ମହାନଗର ନିଗମରେ ଗୋଟିଏ ପରେ ଗୋଟିଏ ଦୁର୍ନୀତି ଖୋଲୁଛି । ସିଏମସି ଦୁର୍ନୀତିର ଗନ୍ତାଘର ପାଲଟି ଯାଇଥିବା ଅଭିଯୋଗ ଉଠିଛି । ଅତୀତରେ ବହୁ ଦୁର୍ନୀତିର ପର୍ଦ୍ଦାଫାସ ହୋଇଥିବାବେଳେ ଏବେ ବିନା ଟେଣ୍ଡରରେ ନିମ୍ନମାନର ମଶା ତେଲ ପକାଯାଉଥିବା ଅଭିଯୋଗ କରି ଏହାର ତଦନ୍ତ କରିବାକୁ ରାଷ୍ଟ୍ରୀୟ ପଛୁଆବର୍ଗ ମହାସଂଘ ପକ୍ଷରୁ ଦୁର୍ନୀତି ନିବାରଣ ବିଭାଗକୁ ଦାବିପତ୍ର ପ୍ରଦାନ କରାଯାଇଛି ।
ଅଭିଯୋଗ ଅନୁଯାୟୀ, ସିଏମସି ପକ୍ଷରୁ ଏବେ ନାଳରେ ପକାଯାଉଥିବା ଏମଏଲ ତେଲ କିଣାରେ ବ୍ୟାପକ ଅନିୟମିତତା ହୋଇଛି । ସିଏମସି ସ୍ୱାସ୍ଥ୍ୟ ବିଭାଗର ଅଧିକାରୀଙ୍କ ସମେତ ଏକାଧିକ କର୍ମଚାରୀ ବହୁମୂଖି ସ୍ୱାସ୍ଥ୍ୟ କର୍ମୀଙ୍କ ସମ୍ପୃକ୍ତି ରହିଛି ବୋଲି ମହାସଂଘ ପକ୍ଷରୁ ଅଭିଯୋଗ କରାଯାଇଛି । ସିଏମସି ପକ୍ଷରୁ କିଣା ଯାଉଥିବା ଏହି ତେଲର ପରୀକ୍ଷା ବିବରଣୀକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏହାର ବ୍ୟବହାର ପୂର୍ବରୁ ନମୁନା ସଂଗ୍ରହ ଏବଂ କେଉଁ ଅଧିକାରୀଙ୍କ ଉପସ୍ଥିତିରେ ନମୁନା ସଂଗ୍ରହ ଓ ମୁଦ ଦିଆଯାଇ ପରୀକ୍ଷା ପାଇଁ ପଠାଯାଇଥିଲା ବୋଲି ପ୍ରଶ୍ନ କରାଯାଇଛି । ସେହିଭଳି ତେଳର ମୂଲ୍ୟ ନିର୍ଦ୍ଧାଣ, ସମସ୍ତ ୱାର୍ଡରେ ତେଳ ପକାଯିବା ପୂର୍ବରୁ କ୍ଷେତ୍ର ପରୀକ୍ଷା (ଫିଲ୍ଡ ଟ୍ରାଏଲ) କରାଯାଇଛି କି ନା, ଯଦି କରାଯାଇଛି ତେବେ କେଉଁ ଲାର୍ଭା ସ୍ଥାନରେ ଏହାକୁ ପ୍ରୟୋଗ କରାଯାଇଛି ଓ ଏହି ତେଲ ପାଣିରେ ଘାଣ୍ଟିଲେ ଇନ୍ଦ୍ରଧନୁ ପରି ସାତରଙ୍ଗ ସୃଷ୍ଟି ହେଉ ନଥିବାରୁ ତେଲ ଅତ୍ୟନ୍ତ ନିମ୍ନମାନର ବୋଲି ଅଭିଯୋଗ କରାଯାଇଛି । ସମ୍ପ୍ରତି କଟକ ସହରରେ ମଶାର ଘନତ୍ୱ ପ୍ରାୟ ୬୫ ପ୍ରତିଶତରୁ ୭୫ ପ୍ରତିଶତ ପର୍ଯ୍ୟନ୍ତ ବୃଦ୍ଧି ପାଇଛି । ତେଣୁ ଏହି ଦୁର୍ନୀତି ଅଭିଯୋଗର ତୁରନ୍ତ ତଦନ୍ତ କରିବାକୁ ସମ୍ପାଦକ ସୁଧାଂଶୁ ପରିଡ଼ା, ସଙ୍ଗଠନ ସମ୍ପାଦକ ଦିଲୀପ ଜେନା, ସଦର ସଙ୍ଗଠନ ଉଗ୍ରସେନ ଭୂୟାଁ, ରାଜ୍ୟ ପ୍ରଭାରି ସଞ୍ଜିତ ସାମଲ, ସର୍ବେଶ୍ୱର ମହାନ୍ତି, ମନୋଜ କାହାଳୀ ପ୍ରମୁଖ ଦାବି କରିଛନ୍ତି ।
