୧୦ ଦିନ ହେବ ନିଖୋଜ ଯୁବକଙ୍କ ମିଳୁନି ସନ୍ଧାନ

କେନ୍ଦ୍ରାପଡ଼ା(ଏନ୍‌.ଏମ୍‌.): ପେଟପାଇଁ କାମ କରିବାକୁ ଯାଇ ନିଖୋଜ ହୋଇଗଲେ ଯୁବକ। ତେବେ କିଭଳି ନିଖୋଜ ହେଲେ ସେ ନେଇ ଚାଲିଛି କଳ୍ପନା ଜଳ୍ପନା। ୧୦ଦିନ ଧରି ଯୁବକ ଜଣକ ନିଖୋଜ ହୋଇଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ତାଙ୍କର କୌଣସି ପତ୍ତା ମିଳୁନାହିଁ। ଫଳରେ ପରିବାର ଲୋକେ ଅବସାଦରେ ଭାଙ୍ଗି ପଡ଼ିଛନ୍ତି। ମିଳିଥିବା ସୂଚନା ଅନୁଯାୟୀ କେନ୍ଦ୍ରାପଡ଼ା ଜିଲ୍ଲା ଡେରାବିଶ ବ୍ଲକ ଲକ୍ଷ୍ମୀନାରାୟଣପୁର ପଞ୍ଚାୟତ ଅନ୍ତର୍ଗତ ବରାହିଲୋ ଗ୍ରାମର କେଶବ ମଳିକ (୩୨) ନାମକ ଜଣେ ଯୁବକ ନିଖୋଜ ହେବାର ୧୦ ଦିନି ବିତିଯାଇଥିଲେ ବି ତାଙ୍କର ଏପର୍ଯ୍ୟନ୍ତ କୌଣସି ପତ୍ତା ମିଳିପାରିନାହିଁ। କେଶବ ଦୁଇ ସପ୍ତାହ ପୂର୍ବରୁ ଅନୁଗୁଳ ଜିଲ୍ଲା ପରଙ୍ଗ ଠାରେ ଏକ ଠିକାଦାର ନିକଟରେ କାର୍ଯ୍ୟ କରୁଥିଲେ। ତେବେ ଗତ ଜାନୁଆରୀ ୧୨ ତାରିଖ ଦିନ ସେ ଠିକାଦାରଙ୍କ କ୍ୟାମ୍ପରୁ କୁଆଡ଼େ ପଳାଇଯାଇଥିବା ତାଙ୍କ ସାଥୀମାନେ ସୂଚନା ଦେଇଥିଲେ। ଏ ନେଇ ସୂଚନା ପାଇବା ପରେ ପରିବାର ଲୋକେ ଓ ସାଙ୍ଗସାଥି ଅନୁଗୋଳ ଅଞ୍ଚଳର ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ କୌଣସି ସୁଫଳ ପାଇନଥିଲେ। ପରେ ଗତ ୧୩ ତାରିଖ ଦିନ ଏ ସମ୍ପର୍କରେ ଅନୁଗୋଳ ଜିଲ୍ଲା ନିଶା ଥାନାରେ କେଶବଙ୍କ ବଡଭାଇ ବୀରବର ମଳିକ ଏକ ଲିଖତ ଅଭିଯୋଗ କରିଥିଲେ। ଅଭିଯୋଗ ପାଇ ପୁଲିସ କେସ ନମ୍ବର ୦୨/ ୨୦୨୫ ରୁଜ୍ଜୁ କରି ଘଟଣାର ଅନୁସନ୍ଧାନ ଚଳାଇଛି। ତେବେ କେଶବ ଜଣେ ମାନସିକ ବିକାର ଗ୍ରସ୍ତ ବ୍ୟକ୍ତି ବୋଲି ପରିବାର ଲୋକେ କହିଛନ୍ତି। ଏପର୍ଯ୍ୟନ୍ତ କେଶବଙ୍କ ସମ୍ପର୍କରେ କୌଣସି ସନ୍ଧାନ ମିଳିନଥିବାରୁ ପରିବାର ଲୋକେ ଅବସାଦରେ ଭାଙ୍ଗି ପଡିଛନ୍ତି। ଯଦି କୌଣସି ଲୋକ ତାଙ୍କ ବିଷୟରେ କୌଣସି ସୂଚନା ପାଆନ୍ତି ତେବେ ନିକଟସ୍ଥ ଥାନାରେ ଜଣାଇବାକୁ ପରିବାରଲୋକେ ନିବେଦନ କରିଛନ୍ତି।