ହାଇକୋର୍ଟରେ ଜେଲ୍ ସଂସ୍କାର ମାମଲା: ମାସିକିଆ ରିପୋର୍ଟ ଦେବାକୁ ଆଇନସେବା ପ୍ରାଧିକରଣ ସଚିବଙ୍କୁ ନିର୍ଦ୍ଦେଶ
#କଟକ(ଏନ୍.ଏମ୍.): ଜେଲ୍ ସଂସ୍କାର ମାମଲାରେ ଆଜି ହାଇକୋର୍ଟ ଭିନ୍ନ ଭିନ୍ନ ସମୟରେ ଜେଲ୍ ପରିଦର୍ଶନ କରି ଉପଯୁକ୍ତ ପଦକ୍ଷେପ ନେବାକୁ ଆଇନସେବା ପ୍ରାଧିକରଣ ସଚିବମାନଙ୍କୁ ଆଦେଶ ଦେଇଛନ୍ତି । ଏଥିସହିତ କୋର୍ଟଙ୍କୁ ମାସକୁ ମାସ ଜେଲ୍ରେ ବିଚାରଧିନ କଏଦୀଙ୍କୁ କର୍ତ୍ତୃପକ୍ଷ କିପରି ବ୍ୟବହାର କରୁଛନ୍ତି ସେ ସମ୍ପର୍କରେ ଅବଗତ କରାଇବାକୁ ଆଦେଶ ଦେଇଛନ୍ତି । ବିଶେଷ କରି ଜେଲ୍ରେ ସେମାନଙ୍କୁ ସର୍ବନିମ୍ନ ସୁବିଧା ଯଥା ଖାଦ୍ୟପେୟ, ବସ୍ତ୍ର, ପାଇଖାନା, ଗାଧୁଆଘର, ପାନୀୟଜଳ ଏବଂ ସେମାନଙ୍କର ଉପଯୁକ୍ତ ଯତ୍ନ ନିଆଯାଉଛି କି ନାହିଁ ସେ ସମ୍ପର୍କରେ ମଧ୍ୟ ତଥ୍ୟ ପ୍ରଦାନ କରିବାକୁ ହାଇକୋର୍ଟ ଆଦେଶ ଦେଇଛନ୍ତି । ସେହିପରି ଏହି ମାମଲାରେ ପ୍ରତି ଜେଲ୍ରେ ବିଚାରଧିନ କଏଦୀଙ୍କ ସ୍ୱାସ୍ଥ୍ୟବସ୍ଥା ପରୀକ୍ଷା କରିବା ସହ ଉପଯୁକ୍ତ ପଦକ୍ଷେପ ନେବାକୁ ହାଇକୋର୍ଟ ରାଜ୍ୟ ସରକାରଙ୍କ ସ୍ୱାସ୍ଥ୍ୟ ବିଭାଗକୁ ଆଦେଶ ଦେଇଛନ୍ତି । ଏହି ପ୍ରସଙ୍ଗରେ ମଧ୍ୟ ସତ୍ୟପାଠ ଦାଖଲ କରିବାକୁ ହାଇକୋର୍ଟ ମଧ୍ୟ ବିଭାଗକୁ ଆଦେଶ ଦେଇଛନ୍ତି । ଅନ୍ୟପକ୍ଷରେ ଜେଲ୍ରେ ଥିବା ଉପଳବ୍ଧ ବ୍ୟବସ୍ଥା ସମ୍ପର୍କରେ ଅବଗତ କରିବା ସହ ପଦକ୍ଷେପ ନେବାକୁ ହାଇକୋର୍ଟ ଗୃହ ବିଭାଗକୁ ଆଦେଶ ଦେଇଛନ୍ତି । ବିଚାରଧିନ କଏଦୀମାନେ କିପରି ପ୍ରତିଦିନ ଯୋଗ କରିବେ ଓ ସୁନ୍ଦର ପରିବେଶରେ ରହିବେ ସେଥିପ୍ରତି ଯତ୍ନବାନ ହେବାକୁ ଅଦାଲତ ବିଭାଗକୁ ଆଦେଶ ଦେଇଛନ୍ତି । ପୂର୍ବରୁ ମୁଖ୍ୟ ବିଚାରପତିଙ୍କ ଖଣ୍ଡପୀଠ ମାମଲାର ଶୁଣାଣି କରି ସମସ୍ତ ଜିଲ୍ଲା ଆଇନସେଦବା ପ୍ରାଧିକରଣ ସଚିବମାନଙ୍କୁ ଆସନ୍ତା ଦୁଇ ମାସ ମଧ୍ୟରେ ତାଙ୍କ ଜିଲ୍ଲା ମଧ୍ୟରେ ଥିବା ଜେଲ୍ ଓ ସବ୍ଜେଲ୍ ପରିଦର୍ଶନ କରି ରିପୋର୍ଟ ଦେବାକୁ ହାଇକୋର୍ଟ ଆଦେଶ ଦେଇଥିଲେ । ରାଜ୍ୟରେ ଜେଲ୍ ସଂସ୍କାର ସମ୍ପର୍କିତ ମାମଲାରେ ପୂର୍ବରୁ ହାଇକୋର୍ଟ ଜେଲ୍ରୁ ଭିଡ କମାଇବା ଉପରେ ହାଇକୋର୍ଟ ଗୁରୁତ୍ୱ ଆରୋପ କରିଥିବାବେଳେ ରାଜ୍ୟରେ ଯେଉଁଠି ନୂଆ ଜେଲ୍ ପ୍ରକଳ୍ପ କରାଯାଉଛି ସେଠାରେ ଜେଲ୍ ତିଆରି ସହିତ ଏକାସାଙ୍ଗେ ପାଚେରୀ ମଧ୍ୟ ତିଆରି କରିବାକୁ ହାଇକୋର୍ଟ ଆଦେଶ ଦେଇଥିଲେ । ଆସନ୍ତା ୨୧ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ ବୋଲି ହାଇକୋର୍ଟ ଆଦେଶ ଦେଇଛନ୍ତି ।