ସ୍ମାର୍ଟ ମିଟର ବାତିଲ ଦାବିରେ ବିଦ୍ୟୁତ ଉପଭୋକ୍ତା ମିଳିତ ମଞ୍ଚ ପକ୍ଷରୁ ଗଣ ବିକ୍ଷୋଭ

କଟକ(ଏନ୍‌.ଏମ୍‌.): ବିଦ୍ୟୁତ ଉପଭୋକ୍ତା ମିଳିତ ମଞ୍ଚ ପକ୍ଷରୁ ରାଣୀହାଟ ବିଦ୍ୟୁତ ନିର୍ବାହୀ ଯନ୍ତ୍ରୀଙ୍କ ଅଫିସ୍ ସମ୍ମୁଖରେ ବିକ୍ଷୋଭ ଅନୁଷ୍ଠିତ ହୋଇଯାଇଛି। ଶତାଧିକ ଉପଭୋକ୍ତା କଲେଜ ଛକ ଠାରୁ ଏକ ଶୋଭାଯାତ୍ରାରେ ଆସି ବିକ୍ଷୋଭ ପ୍ରଦର୍ଶନ କରିଥିଲେ। ଏହି ଗଣ ବିକ୍ଷୋଭରେ ବିଦ୍ୟୁତ ଉପଭୋକ୍ତା ମିଳିତ ମଞ୍ଚ ପକ୍ଷରୁ ଖଗେଶ୍ୱର ସେଠୀ, ରାଜକିଶୋର ମଲ୍ଲିକ, ବସନ୍ତ ନାୟକ, ସୌଭାଗ୍ୟ ସାମଲ, ଦିପକ ଦାସ, ଅକ୍ଷୟ ରାଉଳ, ଆଇନଜୀବୀ ପ୍ରତାପ ମିଶ୍ର, ସୁକାନ୍ତ ନାୟକ, ବ୍ରଜବନ୍ଧୁ ପୃଷ୍ଟି, ଇଶ୍ୱର ଚନ୍ଦ୍ର ପଣ୍ଡା, ପ୍ରମୋଦ କୁମାର ମୁଖି, ଶୋଭା ଦେହୁରୀ,ସିପ୍ରା ମହାନ୍ତି, ଝରଣା ଦାସ, ଉଦୟ ଟୁଡୁ, ଲକ୍ଷ୍ମୀ ସିଂ, ଶିବ ବେହେରା, ଟୁନି ମହାକୁଡ଼, ସାବିତ୍ରୀ ହେମ୍ବ୍ରମ ପ୍ରମୁଖ ନେତୃତ୍ୱ ନେଇଥିଲେ। ବିକ୍ଷୋଭକାରୀମାନଙ୍କ ପକ୍ଷରୁ ୧୦ ଦଫା ଦାବିପତ୍ର ନିର୍ବାହୀ ଯନ୍ତ୍ରୀଙ୍କୁ ଦିଆଯାଇଛି। ବସ୍ତି ଓ ଅନ୍ୟାନ୍ୟ ଉପଭୋକ୍ତାଙ୍କ ଘରୁ ବଳପୂର୍ବକ ଡିଜିଟାଲ ମିଟର କାଢି ସ୍ମାର୍ଟ ମିଟର ଲଗେଇବା ବନ୍ଦ କରାଯିବା ସହ ଯେଉଁ ଲୋକମାନଙ୍କ ଘରେ ଜବରଦସ୍ତ ସ୍ମାର୍ଟ ମିଟର ଲଗା ଯାଉଛି ତୁରନ୍ତ ତାକୁ ବଦଳେଇବା, ସମସ୍ତ ଗରିବ ଲୋକମାନଙ୍କୁ ବିନା ସିକ୍ୟୁରିଟି ଡିପୋଜିଟ ଓ ବିନା କଟକଣାରେ ବିଦ୍ୟୁତ ସଂଯୋଗ ଦେବା, ସୌଭାଗ୍ୟ ଯୋଜନାରେ ବିଦ୍ୟୁତ ସଂଯୋଗ ଥିବା ବସ୍ତି ଲୋକଙ୍କ ଠାରୁ ପ୍ରତି ମାସରେ ମିଟର ରିଡିଙ୍ଗ ଦେୟ ସହ ସ୍କିମ ଆଦାୟ ବନ୍ଦ ଓ ମିଟର ବାବଦ ୪୦ ଟଙ୍କା ଆଦାୟ ବନ୍ଦ କରିବା, ପ୍ରିପେଡ୍ ସ୍ମାର୍ଟ ମିଟର ବାତିଲ କରିବା, ଦିନର ବିଭିନ୍ନ ସମୟ ପାଇଁ ଭିନ୍ନ ଭିନ୍ନ ଶୁଳ୍କ ବାତିଲ କରିବା, ୩୦୦ ୟୁନିଟ୍ ପର୍ଯ୍ୟନ୍ତ ବିଦ୍ୟୁତ ଶୁଳ୍କ ଛାଡ କରିବା, ବିଦ୍ୟୁତ ଶୁଳ୍କ ବୃଦ୍ଧି ପ୍ରସ୍ତାବ ପ୍ରତ୍ୟାହାର କରିବା, ସମଗ୍ର ବିଦ୍ୟୁତ କ୍ଷେତ୍ରକୁ ସରକର ହାତକୁ ନେବା, ବିଦ୍ୟୁତ ଉପଭୋକ୍ତା ଉପରେ ଜୁଲମ ଓ ବିଭିନ୍ନ ଆଳରେ ବିଦ୍ୟୁତ ସଂଯୋଗ କାଟିବା ବନ୍ଦ କରିବା ଓ ଘନ ଘନ ବିଦ୍ୟୁତ କାଟ ବନ୍ଦ କରିବା ପ୍ରମୁଖ ଦାବି ବିକ୍ଷୋଭକାରୀମାନଙ୍କ ପକ୍ଷରୁ କାରାଯାଇଛି। ଦାବି ପୁରଣ ନହେଲେ ଆଗକୁ ଦୀର୍ଘସ୍ଥାୟୀ ଜୋରଦାର ଆନ୍ଦୋଳନ କରାଯିବ ବୋଲି ମଞ୍ଚ ପକ୍ଷରୁ କୁହାଯାଇଛି।