ସେଲିବ୍ରିଟି ବିବାହ ବିଚ୍ଛେଦ ମାମଲା: ହାଇକୋର୍ଟ ଗଲେ ଅନୁଭବ

#କଟକ (ଏନ୍‌.ଏମ୍‌.): ଓଡ଼ିଶାରେ ସେଲିବ୍ରିଟି ବିବାହ ବିଚ୍ଛେଦ ଘଟଣା ଦିନକୁ ଦିନ ଭିନ୍ନ ମୋଡ଼ ନେବାରେ ଲାଗିଛି । ଫଳରେ ଏହାର ଅନ୍ତ କେବେ କେମିତି ହେଉଛି ତାହା ଦେଖିବାକୁ ରାଜ୍ୟବାସୀ ଅପେକ୍ଷା କରିଛନ୍ତି । ସମ୍ପ୍ରତି ବେଶ ଚର୍ଚ୍ଚାରେ ରହିଛି ଅନୁଭବ ଓ ବର୍ଷାଙ୍କ ବିବାହ ବିଚ୍ଛେଦ ମାମଲା । ଏନେଇ ହାଇକୋର୍ଟରେ ଦ୍ୱାରସ୍ଥ ହୋଇଛନ୍ତି ଅଭିନେତା ତଥା ବିଜେଡି ସାଂସଦ ଅନୁଭବ ମହାନ୍ତି । ଅନୁଭବ ପତ୍ନୀ ବର୍ଷାଙ୍କ ସହ ବିବାହ ବିଚ୍ଛେଦ ମାମଲାରେ ହାଇକୋର୍ଟରେ ଅପିଲ କରିଛନ୍ତି । ତେବେ ଫ୍ୟାମିଲି କୋର୍ଟର ରାୟକୁ ଚ୍ୟାଲେଞ୍ଜ କରି ଅନୁଭବ ହାଇକୋର୍ଟ ଯାଇଛନ୍ତି । ବିବାହ ବିଚ୍ଛେଦ ନେଇ ଫ୍ୟାମିଲି କୋର୍ଟରେ ଅନୁଭବ ଅବେଦନ କରିଥିବା ବେଳେ କୋର୍ଟ ମାମଲାକୁ ଖାରଜ କରିଥିଲେ । ପ୍ରଥମେ ଅନୁଭବ ବିବାହ ବିଚ୍ଛେଦ ମାମଲା ଦିଲ୍ଲୀ ପଟିଆଲା କୋର୍ଟରେ କରିଥିଲେ । ଏହି ମାମଲା କଟକରେ ବିଚାର କରାଯାଉ ବୋଲି ବର୍ଷା ସୁପ୍ରିମକୋର୍ଟରେ ଦ୍ୱାରସ୍ଥ ହୋଇଥିଲେ । ତେବେ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ମାମଲା କଟକକୁ ଆସିଥିଲା । କଟକ ଫ୍ୟାମିଲି କୋର୍ଟରେ ଏହି ମାମଲା ବିଚାରାଧିନ ଥିଲା । ଗତ ୨୨ ତାରିଖରେ କୋର୍ଟ ଏହି ମାମଲାକୁ ଖାରଜ କରି ଦେଇଥିଲେ । ଏହା ସହିତ ତାଙ୍କ ପତ୍ନୀ ତଥା ଅଭିନେତ୍ରୀ ବର୍ଷା ପ୍ରିୟଦର୍ଶିନୀ କରିଥିବା ଆବେଦନକୁ ମଧ୍ୟ ଖାରଜ କରି ଦେଇଥିଲେ କୋର୍ଟ । ସ୍ୱାମୀ-ସ୍ତ୍ରୀ ଭାବେ ରହିବା ପାଇଁ ବର୍ଷା ଆବେଦନ କରିଥିଲେ । ଅନୁଭବ ତାଙ୍କ ସ୍ତ୍ରୀ ବର୍ଷା ପ୍ରିୟଦର୍ଶିନୀଙ୍କ ମଧ୍ୟରେ ପାରିବାରିକ ବିବାଦ ଦୀର୍ଘ ଦିନ ଧରି ଚାଲିଛି । ବିଭିନ୍ନ ସମୟରେ ଅନୁଭବ ବର୍ଷାଙ୍କୁ ଟ୍ୟାଗ କରି ଅନେକ କଥା ପୋଷ୍ଟ କରୁଥିବାରୁ ଏହାକୁ ନେଇ ସୋସିଆଲ ମିଡିଆରେ ବର୍ଷା ଓ ଅନୁଭବ ମୁହିଁମୁହିଁ ହୋଇଥାନ୍ତି ।