ସିଏମସି ୨୧ ନମ୍ବର କର୍ପୋରେଟଙ୍କ ଅକାଳ ବିୟୋଗ

କଟକ(ଏନ୍‌.ଏମ୍‌.): କଟକ ମହାନଗର ନିଗମ ୨୧ନମ୍ବର ୱାର୍ଡର କର୍ପୋରେଟର ଅଶୋକ ଶର୍ମାଙ୍କର ହୃଦଘାତ ଜନିତ ମୃତ୍ୟୁ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି। ତାଙ୍କର ପରଲୋକଗତ ଖବର ଶୁଣିବା ପରେ ସହଜରେ କେହି ଗ୍ରହଣ କରିପାରୁନାହାନ୍ତି। ସେ ଜଣେ ଯୁବ ସମାଜସେବୀ, ସଫଳ କୁସ୍ତି ବିଶାରଦ ଏବଂ ଓଡ଼ିଶାରୁ ପ୍ରତିନିଧିତ୍ୱ କରି ବ୍ରୋଞ୍ଜ ପଦକ ହାସଲ କରିବା ସହ ଓଡ଼ିଶାର ନାମକୁ ଶୀର୍ଷରେ ପହଞ୍ଚାଇଥିଲେ। ସ୍ୱର୍ଗତ ଶର୍ମା ବିଗତ ୨୦୦୯ ମସିହା ଏବଂ ୨୦୨୨ ମସିହାରେ କଟକ ମହାନଗର ନିଗମର ୱାର୍ଡ ନମ୍ବର -୨୧ରୁ କର୍ପୋରେଟର ଭାବେ ପ୍ରତିଦ୍ୱନ୍ଦ୍ୱିତା କରି ନିର୍ବାଚିତ ହେବା ସହ ନିଜର କାର୍ଯ୍ୟଦକ୍ଷତା ଯୋଗୁଁ ସିଏମସିର ଯୋଜନା ଓ ଉନ୍ନୟନ ଷ୍ଟାଣ୍ଡିଂ କମିଟି ର ଅଧ୍ୟକ୍ଷ ଭାବେ ମନୋନୀତ ହୋଇଥିଲେ। କଟକ ନୟାସଡକର ସଫଳ ବ୍ୟବସାୟୀ ସ୍ୱର୍ଗତ ହେମରାଜ ଶର୍ମା ଓ ସାବିତ୍ରୀ ଶର୍ମାଙ୍କ ୪ର୍ଥ ପୁତ୍ର ଭାବେ କୋଳ ମଣ୍ଡନ କରିଥିବା ସ୍ୱର୍ଗତ ଶର୍ମା ମାରୱାଡି ପଟ୍ଟି ପୁଜା କମିଟି ସମ୍ପାଦକ ଭାବେ ମଧ୍ୟ ଦାୟିତ୍ୱ ତୁଲାଇଥିଲେ। ସିଏମସି ୨୧ ନମ୍ବର ୱାର୍ଡର ସର୍ବାଙ୍ଗୀନ ଉନ୍ନତି ନିମନ୍ତେ ସଦାସର୍ବଦା ଚିନ୍ତା କରୁଥିବା ଏହି ଦିବଂଗତ କର୍ପୋରେଟରଙ୍କ ମୃତଶରୀର ନୂଆ ଦିଲ୍ଲୀରୁ ତାଙ୍କ ବାସଭବନରେ ପହିଞ୍ଚିବାପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଥିଲା। ବହୁ ବିଶିଷ୍ଟ ବ୍ୟକ୍ତି, ରାଜନେତା ଓ ସ୍ଥାନୀୟ ଅଞ୍ଚଳର ବହୁ ବ୍ୟକ୍ତି ଏହି ଉଦାରଚେତା, ସମାଜସେବୀଙ୍କୁ ଅଶ୍ରୁଳ ଶ୍ରଦ୍ଧାଞ୍ଜଳି ଦେଇଥିଲେ। ପରେ ଶ୍ରୀ ଶର୍ମାଙ୍କର ପାର୍ଥୀବ ଶରୀରକୁ ଏକ ବିଶାଳ ଶୋଭାଯାତ୍ରାରେ ନିଆଯାଇ ସ୍ଥାନୀୟ ଖାନନଗର ଶ୍ମଶାନ ଠାରେ ଶେଷକୃତ୍ୟ ସମ୍ପନ୍ନ କରାଯାଇଥିଲା।