ଶ୍ରୀଗୁଣ୍ଡିଚା ପାଇଁ ରଥଖଳା ଚଳଚଞ୍ଚଳ: ୩୮ଟି ଚକ ନିର୍ମାଣ ଶେଷ
ପୁରୀ(ଏନ୍.ଏମ୍.): ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ଶ୍ରୀକ୍ଷେତ୍ର ପୁରୀ ହୋଇ ଉଠିଛି ଚଳଚଞ୍ଚଳ । ଗୋଟିଏ ପଟେ ପ୍ରଭୁଙ୍କ ଚନ୍ଦନ ଯାତ୍ରାର ବାହାର ଚାପଖେଳ ଶେଷ ହୋଇଥିବାବେଳେ ଭିତର ଚାପଖେଳ ଆରମ୍ଭ ହୋଇଛି । ଅନ୍ୟପକ୍ଷରେ ରଥଖଳା ଚଳଚଞ୍ଚଳ ହୋଇ ଉଠିଛି । ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ଶ୍ରୀଜୀଉଙ୍କ ରଥ ନିର୍ମାଣ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି । ମହାରଣା ସେବକମାନଙ୍କୁ ଫୁରସତ ନାହିଁ । ତେବେ ରଥଖଳାରେ ଆଜି ସୁଦ୍ଧା ତିନି ରଥର ୪୪ ଗୋଟି ଚକରୁ ୩୮ଗୋଟି ଚକର ନିର୍ମାଣ କାର୍ଯ୍ୟ ଶେଷ ହୋଇଛି । ଏହା ବ୍ୟତୀତ ୩ ରଥର ପାଞ୍ଚ ଗୋଟି ନାହାକା ଅଖ ନିର୍ମାଣ ମଧ୍ୟ ଶେଷ ହୋଇଥିବା ବେଳେ ନନ୍ଦିଘୋଷ ରଥ ଓ ଦର୍ପଦଳନ ରଥର ୨ଟି ଲେଖାଏଁ ନିରାଡ଼ି କାଠ ଚଉପଟ କାର୍ଯ୍ୟ ଶେଷ ହୋଇଛି । ତାଳଧ୍ୱଜ ରଥର ପୋଲ ଗୟଳ ଚିରଟ କାର୍ଯ୍ୟ ଶେଷ ପର୍ଯ୍ୟାୟରେ ପହଁଚିଛି । କମାରଶାଳରେ ରଥ ପାଇଁ ଆବଶ୍ୟକ ଦଣ୍ଡା କଣ୍ଟା, ଗୟଳ କଣ୍ଟା, ଜୋଖା କଣ୍ଟା ଏବଂ କଇଁଚି କଣ୍ଟା ନିର୍ମାଣ ଆଗେଇ ଚାଲିଛି । ସୂଚନା ଯୋଗ୍ୟ ଯେ, ଆସନ୍ତା ଜୁନ ୨୦ତାରିଖରେ ପ୍ରଭୁ ଲୀଳାମୟ ଶ୍ରୀଜଗନ୍ନାଥ, ଶ୍ରୀବଳଭଦ୍ର, ମା’ ସୁଭଦ୍ରାଙ୍କ ସମେତ ପ୍ରଭୁ ସୂଦର୍ଶନ ରଥାରୂଢ଼ ହୋଇ ମାଉସୀମା’ ମନ୍ଦିରକୁ ଯିବେ । ଲକ୍ଷାଧିକ ଶ୍ରଦ୍ଧାଳୁ ଶ୍ରୀ ଜୀଉଙ୍କ ଚତୁର୍ଦ୍ଧା ମୂର୍ତ୍ତି ଦର୍ଶନ କରିବାର ସୁଯୋଗ ପାଇବେ । ଏଥି ପାଇଁ ରଥଖଳାରେ ୩ରଥ ନିର୍ମାଣ କାର୍ଯ୍ୟରେ ମହାରଣା ସେବକମାନେ ଭକ୍ତି, ଭାବ ଓ ନିଷ୍ଠାର ସହ ଏହାକୁ ସମ୍ପାଦନ କରୁଛନ୍ତି ।