ଶ୍ରମଜୀବୀ ଜନସାଧାରଣଙ୍କ ବିଭିନ୍ନ ଦାବିରେ ଏଆଇୟୁଟିୟୁସି ପକ୍ଷରୁ ବିକ୍ଷୋଭ
କଟକ(ଏନ୍.ଏମ୍.): ଏଆଇୟୁଟିୟୁସି ପକ୍ଷରୁ ଦେଶବ୍ୟାପୀ ପ୍ରତିବାଦ ସପ୍ତାହ ଡାକରାରେ ଶ୍ରମଜୀବୀ ଜନସାଧାରଣଙ୍କ ବିଭିନ୍ନ ଦାବି ନେଇ ଜିଲାପାଳଙ୍କ ଅଫିସ୍ ସମ୍ମଖରେ ଶ୍ରମିକ ବିକ୍ଷୋଭ କରାଯାଇଛି। ବିକ୍ଷୋଭ ସ୍ଥଳ ପ୍ରତିବାଦ ସଭାରେ ଏଆଇୟୁଟିୟୁସିର ଜିଲା ସଂପାଦକ ରାଜକିଶୋର ମଲ୍ଲିକଙ୍କ ଅଧ୍ୟକ୍ଷତାରେ ଏସ୍ ୟୁ ସି ଆଇ ଆଇ (ସି) ଜିଲା ସମ୍ପାଦକ ବିଶ୍ୱାବସୁ ଦାସ, ଏଆଇୟୁଟିୟୁସି ଜିଲା ସଭାପତି ଖଗେଶ୍ୱର ସେଠୀ, ଜିଲା ନେତା ସୌଭାଗ୍ୟ ସାମଲ, ପରମାନନ୍ଦ ସେଠୀ, ଭାଗିରଥୀ ଭୋଇ, ରେଣୁବାଳା ମହାରଣା, ମାନଗୋବିନ୍ଦ ପଣ୍ଡା, ଲାବଣ୍ୟପ୍ରଭା ଦାସ ଓ ସୁକାନ୍ତ ନାୟକ ପ୍ରମୁଖ ବକ୍ତବ୍ୟ ଦେଇଥିଲେ। ଶ୍ରମିକ-କର୍ମଚାରୀ ବିରୋଧୀ ୪ଟି ଶ୍ରମ କୋଡ଼ ଓ ଅନ୍ୟାନ୍ୟ କଳା ଆଇନ ପ୍ରତ୍ୟାହାର କରିବା, ଦୈନିକ କାର୍ଯ୍ୟ ନିର୍ଘଣ୍ଟ ୮ ଘଣ୍ଟାରୁ ୧୨ ଘଣ୍ଟାକୁ ବୃଦ୍ଧି ପ୍ରସ୍ତାବ ବନ୍ଦ କରିବା, ଖାଦ୍ୟ ଦ୍ରବ୍ୟ, ଔଷଧ, ପେଟ୍ରୋଲ-ଡିଜେଲ ଆଦି ଅତ୍ୟାବଶ୍ୟକୀୟ ସାମଗ୍ରୀ ଏବଂ ବିଦ୍ୟୁତ ସେବା ଭଳି ଅତ୍ୟାବଶ୍ୟକ ସେବା କ୍ଷେତ୍ରରେ ଦର ହ୍ରାସ ପାଇଁ ଦୃଢ ପଦକ୍ଷେପ ନେବା, ସମସ୍ତ ବେକାର ଯୁବକ-ଯୁବତୀଙ୍କୁ ସ୍ଥାୟୀ ନିଯୁକ୍ତି ଦେବା, ସ୍ଥାୟୀ କାମରେ ଠିକା ଓ ଅସ୍ଥାୟୀ ନୀତି ବନ୍ଦ କରି ସ୍ଥାୟୀ କାମରେ ସ୍ଥାୟୀ ନିଯୁକ୍ତି ଦେବା, ସମାନ କାମରେ ସମାନ ମଜୁରୀ ଦେବା ସହ ଆଉଟସୋର୍ସିଂ ଶ୍ରମିକଙ୍କୁ ସ୍ଥାୟୀ ନିଯୁକ୍ତି ଦେବା, ସରକାରୀ ସ୍କିମରେ ନିଯୁକ୍ତ ମଧ୍ୟାହ୍ନ ଭୋଜନ ପାଚିକା-ସହାୟିକା, ଆଶା, ଅଙ୍ଗନବାଡି କର୍ମୀ-ସହାୟକ ମାନଙ୍କୁ ସରକାରୀ କର୍ମଚାରୀ ଭାବେ ସ୍ଥାୟୀ ନିଯୁକ୍ତି ଦେବା, ରାଜ୍ୟ ସରକାର ସ୍କିମରେ ନିଯୁକ୍ତ ସ୍ୱାବଲମ୍ବୀ କାରିଗରମାନଙ୍କୁ ସ୍ଥାୟୀ କର୍ମଚାରୀ ମାନ୍ୟତା ଦେବା, ଜନବିରୋଧୀ ବିଦ୍ୟୁତ ଆଇନ- ୨୦୨୩ ଏବଂ ବିଦ୍ୟୁତ ସଂଶୋଧନ ବିଲ୍- ୨୦୨୨କୁ ପ୍ରତ୍ୟାହାର କରିବା, ରାଷ୍ଟ୍ରାୟତ ଓ ସରକାରୀ ଉଦ୍ୟୋଗ ଗୁଡିିକୁ ଘରୋଇକରଣ ବନ୍ଦ କରିବା, ସୁପ୍ରିମକୋର୍ଟ ରାୟ ଓ ୧୫ତମ ଶ୍ରମ ସମ୍ମିଳନୀର ସୁପାରିଶ ଅନୁସାରେ ସର୍ବନିମ୍ନ ମଜୁରୀ ୨୮ ହଜାର ଟଙ୍କା ନିର୍ଦ୍ଧାରଣ କରିବା ପ୍ରମୁଖ ୨୬ ଦଫା ଦାବି ସମ୍ବଳିତ ଦାବିପତ୍ର ଜିଲାପାଳଙ୍କ ଜରିଆରେ ପ୍ରଧାନମନ୍ତ୍ରୀଙ୍କ ନିକଟକୁ ଦିଆଯାଇଛି।