ଶାସକ ଦଳ ସରକାରୀ ଅର୍ଥରେ ଦଳୀୟ ପ୍ରଚାର କରିବା ଦୁର୍ଭାଗ୍ୟଜନକ: ବିଜେପି
#କଟକ(ଏନ୍.ଏମ୍.): ମିଥ୍ୟା ପ୍ରଲୋଭନ ଦେଇ ବିକାଶ ନାମରେ ଶାସକ ଦଳ ରାଜ୍ୟବାସୀଙ୍କୁ ଭୂଆଁ ବୁଲାଉଛି । ଏପରିକି ସରକାରୀ ଅର୍ଥରେ ଶାସକ ଦଳ ଦଳୀୟ ପ୍ରଚାର କରିବା ଦୁର୍ଭାଗ୍ୟ ଜନକ ବୋଲି ବରିଷ୍ଠ ବିଜେପିନେତ୍ରୀ ସ୍ମୃତି ପଟ୍ଟନାୟକ ଅଭିଯୋଗ କରିଛନ୍ତି । ଏପରିକି ନିର୍ବାଚନକୁ ଦୃଷ୍ଟିରେ ରଖି ଶାସକ ଦଳର ନେତାମାନେ ସରକାରୀ ତହବିଲରୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଦଳୀୟ ପ୍ରଚାର କରିବା କେତେଦୂର ଯୁକ୍ତିଯୁକ୍ତ ତାହା ସରକାର ରାଜ୍ୟବାସୀଙ୍କୁ ଜବାବ ରଖିବା ଦରକାର ବୋଲି ଶ୍ରୀମତୀ ପଟ୍ଟନାୟକ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି । ସେ କହିଛନ୍ତି ଯେ, ‘ଆମ ଓଡ଼ିଶା ନବୀନ ଓଡ଼ିଶା’ କାର୍ଯ୍ୟକ୍ରମ ସରକାରୀ ଯୋଜନା ଭାବେ ରାଜ୍ୟସରକାର କ୍ୟାବିନେଟ୍ ଗୃହିତ କଲାପରେ ୬୭୪୯ ଗ୍ରାମ ପଞ୍ଚାୟତର ଉନ୍ନତିକରଣ ନିମନ୍ତେ ସରକାରୀ ରାଜକୋଷରୁ ୩୩୯୭କୋଟି ଟଙ୍କା ଅନୁମୋଦନ କରିଛନ୍ତି । କଟକ ସହରର ତଳ ଏବଂ ଉପର ବାଲିଯାତ୍ରା ପଡ଼ିଆରେ ‘ଆମ ଓଡ଼ିଶା ନବୀନ ଓଡ଼ିଶା’ର ଦୁଇଟି କାର୍ଯ୍ୟକ୍ରମ କରି ଗୋଟିଏକୁ ସରକାରୀ ଅନ୍ୟଟିକୁ ଦଳୀୟ କାର୍ଯ୍ୟକ୍ରମର ଆଖ୍ୟା ଦିଆଯାଇ ସଭାର ସମସ୍ତ ଖର୍ଚ୍ଚ ସରକାରୀ ରାଶିରେ କରିବା ଏବଂ ଯୁବ ଓଡ଼ିଶା ନାମରେ କଟକ ଜିଲ୍ଲାର ବିଭିନ୍ନ ଶିକ୍ଷାନୁଷ୍ଠାନରୁ କଲେଜ ପିଲାଙ୍କୁ ସଭାସ୍ଥଳକୁ ଅଣାଯାଇ କଲେଜ ଗୁଡ଼ିକରେ ଶୈକ୍ଷିକ ବାତାବରଣକୁ ନଷ୍ଟ କରାଯାଉଥିବା ଦୁର୍ଭାଗ୍ୟ ଜନକ । ସରକାରୀ ଯୋଜନା ଆମ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମରେ ଦଳୀୟ ପତାକା ଲାଗଇବାକୁ ନିନ୍ଦା କରିବା ସହିତ ବିଜେଡି ନିର୍ବାଚନ ପୂର୍ବରୁ ବାରବାଟୀ-କଟକ ନିର୍ବାଚନ ମଣ୍ଡଳୀରେ ନିଜର ସ୍ଥିତି ସୁଧାରିବା ପାଇଁ ଏଭଳି କାର୍ଯ୍ୟକ୍ରମ କରୁଛି ବୋଲି ଜଣାଇଥିଲେ । ସହରରେ ବିଶ୍ୱସ୍ତରୀୟ ମେଡ଼ିକାଲ, ଚଣ୍ଡି ମନ୍ଦିରର ପୁଃନରୁଦ୍ଧାର, ବକ୍ସଡ୍ରେନ୍ ଏବଂ ଜାଇକା କାର୍ଯ୍ୟ ନିର୍ଦ୍ଧାରିତ ସମୟରେ ସମ୍ପୂର୍ଣ୍ଣ ନହୋଇ ସମୟରୁ ପଛୁଆ ଚାଲୁଥିବା ଏବଂ ହରିଣ ପାର୍କର ସ୍ଥାନାନ୍ତରିକରଣକୁ ନେଇ ସାଧାରଣରେ କଟକିଆଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି । ତେବେ ପ୍ରଶାସନ ଏଥିପ୍ରତି ଧ୍ୟାନ ନଦେଇ ଶାସକ ଦଳର ହାତବାରିଶି ସାଜି ଶାସକ ଦଳର ପ୍ରଚାର ପ୍ରସାରରେ ଲାଗିଥିବାର ଅଭିଯୋଗ ଆଣି କଟକ ଜିଲ୍ଲାପାଳ ଏହାର ସ୍ପଷ୍ଟିକରଣ ଦେବା ପାଇଁ ସାମ୍ବାଦିକ ସମ୍ମିଳନରେ ଶ୍ରୀମତୀ ପଟ୍ଟନାୟକ ଦାବି ରଖିଛନ୍ତି ।
ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପୂର୍ବତନ ଜିଲ୍ଲା ସଭାପତି ଲକ୍ଷ୍ମୀଧର ପ୍ରଧାନ, ପୂର୍ବତନ କର୍ପୋରେଟର ଆଇନଜୀବୀ ନିରୋଦ ଚନ୍ଦ୍ର ପଣ୍ଡା, ହେମନ୍ତ ବେହେରା, ବରିଷ୍ଠ ବିଜେପି ନେତା ସାକ୍ଷ୍ୟସିଂହ ମିଶ୍ର, ଅନ୍ନଦା ଦାସ, ହରପ୍ରସନ୍ନ ଦାସ, ସରୋଜ ଦାସ, ଧିରେନ୍ଦ୍ର ସେଠୀ, ରୀତା ମହାପାତ୍ର, ସୌମ୍ୟ ଷଡ଼ଙ୍ଗୀ, ଏନ୍. ଫଗୁଆ, ମୁକେଶ ଭୂୟାଁ ପ୍ରମୁଖ ଉପସ୍ଥିତ ଥିଲେ ।