ଶାନ୍ତି କମିଟିରେ ଭାଇଚାରାକୁ ଅଣଦେଖା: ଆପତ୍ତି ଉଠାଇଲା ସର୍ବଧର୍ମ ସମନ୍ୱୟ କମିଟି
କଟକ(ଏନ୍.ଏମ୍.): କଟକ ସହର ଗୋଟିଏ ଭାଇଚାରାର ସହର। ଏଠାରେ ପ୍ରତ୍ୟେକ ଧର୍ମର ଲୋକେ ପ୍ରତ୍ୟେକ ପର୍ବପର୍ବାଣୀରେ ସାମିଲ ହୋଇଥାନ୍ତି। ଏଠାରେ ହିନ୍ଦୁ, ମୁସଲିମ, ଖ୍ରୀଷ୍ଟିଆନ, ସାଇ, ଶିଖ, ଜୈନ ଆଦି ବହୁ ଧର୍ମାବଲମ୍ବୀ ବସବାସ କରୁଥିଲେ ମଧ୍ୟ ସମସ୍ତଗୋଟିଏ ଋଜୁରେ ବନ୍ଧା ତାହା ହେଲା ଭାଇଚାରା। ତେବେ ବିଭିନ୍ନ ପର୍ବପର୍ବାଣୀରେ କିମ୍ବା ଉତ୍ସବ ସମୟରେ କୌଣସି ବିଶୃଙ୍ଖଳା ନହେବା ପାଇଁ କଟକ ଶାନ୍ତିକମିଟି ବିଭିନ୍ନ ଭୂମିକା ଗ୍ରହଣ କରିଥାଏ। ପ୍ରତ୍ୟେକ ପର୍ବପର୍ବାଣୀରେ ଶାନ୍ତିି କମିଟିକୁ ଲୋଡ଼ା ପଡେ। ହେଲେ ଆଜି କଟକରେ ସମସ୍ତ କ୍ଷେତ୍ରରେ ଶାନ୍ତି ଶୃଙ୍ଖଳାର ବାର୍ତ୍ତା ବହନ କରୁଥିବା ଶାନ୍ତିକମିଟି ହିଁ ଅସନ୍ତୋଷର କାରଣ ହୋଇଛି। ବର୍ଷ ବର୍ଷ ଧରି ଶାନ୍ତିକମିଟି ରହିଥିଲେ ମଧ୍ୟ କେବଳ ପୂଜାକମିଟିର କର୍ମକର୍ତ୍ତା ହିଁ ଏଥିରେ ରହିଛନ୍ତି। ତେଣୁ କଟକରେ ଥିବା ଶାନ୍ତିକମିଟି ପୂର୍ଣ୍ଣାଙ୍ଗ କମିଟି ନୁହେଁ ବୋଲି ଅଭିଯୋଗ ଆଣିଛି ସର୍ବଧର୍ମ ସମନ୍ୱୟ କମିଟି। ଶାନ୍ତିକମିଟିରେ ସବୁ ଧର୍ମର ଲୋକଙ୍କୁ ସାମିଲ କରିବାକୁ ଦାବି କରାଯାଇଛି। ତେବେ ବର୍ତ୍ତମାନ କଟକରେ ସରିଛି ଶାନ୍ତି କମିଟିର ନିର୍ବାଚନ। ବିଗତ ବର୍ଷ ମାନଙ୍କ ଭଳି ଶାନ୍ତିକମିଟିରେ ସଭାପତି ଭାବେ ଦେବେନ୍ଦ୍ର ସାହୁ ଥିବାବେଳେ ସମ୍ପାଦକ ହୋଇଛନ୍ତି ଭିକାରୀ ଦାସ। ହେଲେ ଶାନ୍ତି କମିଟି ନିର୍ବାଚନର ୨ଦିନ ପରେ ଉଠିଲାଣି ବିବାଦ। ବିବାଦକୁ ନେଇ ଆଜି ସ୍ଥାନୀୟ ବାଖରାବାଦସ୍ଥିତ ଗାନ୍ଧୀ ଭବନରେ ବସିଥିଲା ସର୍ବଧର୍ମ ସମନ୍ୱୟ କମିଟିର ବୈଠକ। ବୈଠକରେ ଅଭିଯୋଗ ହୋଇଥିଲେ ଯେ, ନିଦ୍ଧିଷ୍ଟ ଗୋଟିଏ ଧର୍ମର ଲୋକେ ଅଛନ୍ତି ସଦସ୍ୟ। କଟକ ହେଉଛି ଭାଇଚାରାର ସହର। ଯାହାକି ଅନ୍ୟମାନଙ୍କ ଳାଗିଉଦାହରଣ ହୋଇଛି। କିନ୍ତୁ ଦୁଃଖ ଓ ପରିତାପର ବିଷୟ ଏହି ଭାଇଚାରା ନଷ୍ଟ ହେବାକୁ ଯାଉଛି। ଭାଇଚାରା ଭିତରେ ସମସ୍ତଙ୍କୁ ସମାନ ସୁଯୋଗ ମିଳିବା ଦରକାର ବୋଲି ବୈଠକରେ ଦାବି ଉଠିଛି। ଏହା ଉପରେ ପୁର୍ନବାର ବିଚାର କରିବାକୁ ସମନ୍ୱୟ କମିଟି ଦାବି କରିଛି। ଏହା ସହ କମିଟି ପକ୍ଷରୁ ଏକ ଦାବିପତ୍ର ଜିଲ୍ଲାପାଳ ତଥା ମହାନଗର ପୂଜା କମିଟିର ସଭାପତିଙ୍କୁ ପ୍ରଦାନ କରାଯାଇଛି। କଟକ ସହରରେ ରହୁଥିବା ସବୁ ସମ୍ପ୍ର୍ରଦାୟର ଲୋକମାନଙ୍କୁ ନେଇ ଏକ ପୂର୍ଣର୍ାଙ୍ଗ ଶାନ୍ତି କମିଟି ଗଠନ ଲାଗି ଅନୁରୋଧ କରାଯାଇଛି। ଯଦି ତାହା ନ ହୁଏ ତେବେ ଆଗାମୀ ଦିନରେ ଯାହାକିଛି ସମସ୍ୟା ସୃଷ୍ଟି ହେବ ସେନେଇ ଜିଲ୍ଲାପାଳ ଦାୟୀ ରହିବେ ବୋଲି ସର୍ବଧର୍ମ ସମନ୍ୱୟ କମିଟି ପକ୍ଷରୁ କୁହାଯାଇଛି। ଏହି ପରିପ୍ରେକ୍ଷୀରେ ଆୟୋଜିତ ସାମ୍ବାଦିକ ସମ୍ମିଳନରେ ପ୍ରଫେସର ଡାକ୍ତର ଶାମୀ ସଲିମ ଅଧ୍ୟକ୍ଷତା କରିଥିବାବେଳେ ପୂର୍ବତନ ୱାକଫ ବୋର୍ଡ଼ କମିଶନର ସୟଦ ଏକ୍ରାମ ହୁସେନ, ସାମାଜିକ କର୍ମୀ ସଞ୍ଜୟ ବେହେରା, ହେମମଞ୍ଜରୀ ଭଞ୍ଜଦେଓ, ମୋଇନ ଖଶନ, ସଞ୍ଜିବ କୁମାର ସାମଲ, ବକ୍ରବା ସାହି ଚର୍ଚ୍ଚ ସଦସ୍ୟ ବେଞ୍ଜମିନୀ ଦାସ, ସୂତାହାଟ ସର୍ଚ୍ଚ ସମ୍ପାଦକ ପ୍ରଭାତ ବେଗ୍ ପ୍ରମୁଖ ଉପସ୍ଥିତଥିଲେ।