ରୋଡ଼ ପାଲଟିଛି ମରଣଯନ୍ତା

#ବାରଙ୍ଗ(ଏନ୍‌.ଏମ୍‌.): ଯୋଗାଯୋଗ ତଥା ଗମନାଗମନର ସୁବିଧା ପାଇଁ କେନ୍ଦ୍ର ଓ ରାଜ୍ୟ ସରକାର ବେଶ ତତ୍ପରତା ପ୍ରକାଶ କରୁଛନ୍ତି । ବିଭିନ୍ନ ଅଞ୍ଚଳକୁ ପକ୍କା ସଡ଼କ କରାଇବା ସହ ଜିଲ୍ଲା ମୁଖ୍ୟାଳୟକୁ ଗମନାଗମନ ସୁବିଧା ପାଇଁ ମୋ’ବସ ବ୍ୟବସ୍ଥା କରୁଛନ୍ତି । କିନ୍ତୁ କଟକ ଜିଲ୍ଲାର ଏମିତି ଅଞ୍ଚଳ ଅଛି ଯେଉଁଠାରେ ଭଲ ରାସ୍ତାଟିଏ ହୋଇ ପାରିନାହିଁ; ଯେଉଁ ରାସ୍ତା ରହିଛି ତାହା ମରଣଯନ୍ତା ପାଲଟିଛି । ଏହା କୌଣସି ଉପାନ୍ତ ଅଞ୍ଚଳ ନୁହେଁ ଖୋଦ ବାରଙ୍ଗ ବ୍ଲକ ଅନ୍ତର୍ଗତ ନରାଜ ମାର୍ଥାପୁର ଗ୍ରାମପଞ୍ଚାୟତର ମାର୍ଥାପୁର ତଳସାଇ ରେଲୱେ ଲାଇନ କଡ ରାସ୍ତା ପାଲଟିଛି ମାରଣା ଯନ୍ତା । ରାସ୍ତାରେ ଖାଲ ଖମା ହୋଇଥିବାରୁ ବର୍ଷା ହେଲେ ପାଣି ଜମୁଛି ଲୋକେ ଯାତାୟତ କଲା ବେଳେ ପଡି ଖଣ୍ଡିଆ ଖାବରା ଓ ଗୋଡ ହାତ ଭାଙ୍ଗିବାର ଦୃଶ୍ୟ ଦେଖିବାର ମିଳୁଛି । ତେଣୁ ଏହି କାର୍ଯ୍ୟକୁ ବ୍ଲକ ପ୍ରଶାସନ ଦୃଷ୍ଟିରେ ରଖି ଖାଲ ଖମା ରାସ୍ତାକୁ ସ୍ଥାଇ ଭାବରେ ମରାମତି କଲେ ମାର୍ଥାପୁର ଗ୍ରାମର ବସବାସ କରୁଥିବା ୪୦ ପରିବାର ଉପକୃତ ହୁଅନ୍ତେ ବୋଲି ସ୍ଥାନୀୟ ବାସିନ୍ଦା କହିଛନ୍ତି ।