ରାସନକାର୍ଡ଼ ଅଯୋଗ୍ୟ ହିତାଧିକାରୀଙ୍କ ବଢ଼ୁଛି ତାଲିକା
ଚୌଦ୍ୱାର ପୌରାଞ୍ଚଳରେ ୩୬୨ଜଣ ଅଯୋଗ୍ୟ ହିତାଧିକାରୀ ଚିହ୍ନଟ
ଚୌଦ୍ୱାର(ଏନ୍.ଏମ୍.): ରାଜ୍ୟରେ କେହି ଗରିବ ଲୋକ ଭୋକିଲା ରହିବେ ନାହିଁ। ଏହି ଉଦ୍ଦେଶ୍ୟ ନେଇ ସରକାର ଜାତୀୟ ଖାଦ୍ୟ ସୁରକ୍ଷା ଆଇନ-୨୦୧୩ ପ୍ରଚଳନ କରିଛନ୍ତି। ଏହି ଯୋଜନା ମାଧ୍ୟମରେ ପ୍ରକୃତ ହିତାଧିକାରୀଙ୍କୁ ମାସିକ ମୁଣ୍ଡପିଛା ୫କିଲୋଗ୍ରାମ ଚାଉଳ ବା ଗହମ କିମ୍ବା ଉଭୟ ମାତ୍ର ୧ଟଙ୍କା ବିନିମୟରେ ପ୍ରଦାନ କରାଯାଉଛି। ହେଲେ କିଛି ଅଯୋଗ୍ୟ ହିତାଧିକାରୀ ଏହାର ଫାଇଦା ଉଠାଇବାକୁ ଯାଇ ଖାଦ୍ୟ ସୁରକ୍ଷା ଆଇନର ଅପବ୍ୟବହାର କରିବା ସହ ରାସନ ସାମଗ୍ରୀ ହରିଲୁଟ କରୁଥବା ଘଟଣା ଦୃଷ୍ଟିକୁ ଆସିଛି। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କଟକ ଜିଲ୍ଲା ଅନ୍ତର୍ଗତ ଚୌଦ୍ୱାର ପୌରପାଳିକା ଅଞ୍ଚଳରେ। ଚୌଦ୍ୱାର ପୌରପାଳିକା ଅଞ୍ଚଳରେ ୩୬୨ଜଣ ଅଯୋଗ୍ୟ ହିତାଧିକାରୀ ସରକାରଙ୍କ ଖାଦ୍ୟସୁରକ୍ଷା ଯୋଜନାରେ ସାମିଲ ହୋଇ ବର୍ଷ ବର୍ଷ ଧରି ରାଜସ୍ୱ ଲୁଟ କରୁଥିବା ଜଣାପଡ଼ିଛି। ଚୌଦ୍ୱାର ପୌରପାଳିକାର ୧୯ଟି ଯାକ ୱାର୍ଡ଼ରେ ଅଯୋଗ୍ୟ ହିତାଧିକାରୀ ରାସନକାର୍ଡ଼ ତାଲିକାରେ ନାମ ପଞ୍ଜିକରଣ କରି ସରକାରଙ୍କ ରାଜସ୍ୱ ହରିଲୁଟ କରୁଥିବା ଅଭିଯୋଗ ହୋଇଛି। ତେବେ ପୌରପାଳିକା ଅଧିନରେ ଏସବୁ ଅନିୟମିତତା ଚାଲିଥିବାବେଳେ ପୌରାଧ୍ୟକ୍ଷା ଓ ପୌରାଧ୍ୟକ୍ଷାଙ୍କ ଜାଣତରେ ଏସବୁ ଚାଲିଥିବା ଚର୍ଚ୍ଚା ହେଉଛି। ଏପରିକି କିଛି ନିର୍ବାଚିତ ପ୍ରତିନିଧି ମଧ୍ୟ ଏହି ଯୋଜନାରେ ତାଲିକାଭୁକ୍ତ ହୋଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ଦେଶରେ ଗରିବ ଲୋକମାନଙ୍କୁ ଭୋକିଲା ନରହିବା ପାଇଁ ସରକାରଙ୍କ ପକ୍ଷରୁ ଖାଦ୍ୟସୁରକ୍ଷା ଆଇନ ଲାଗୁ କରାଯାଇଥିଲା। ତେବେ ଏହି ଯୋଜନାରେ ଜଣେ ହିତାଧିକାରୀ ଯୋଗହେବା ପାଇଁ ୧୧ଟି ମାନଦଣ୍ଡ ସ୍ଥିରୀକୃତ କରାଯାଇଥିବାବେଳେ ତାଲିକାରୁ ବାଦ ଦେବା ପାଇଁ ୯ଟି ମାନଦଣ୍ଡ ରଖାଯାଇଛି। ମାତ୍ର କିଛି ମୁଷ୍ଠିମେୟ ତଥା ରାଜନୈତିକ ବ୍ୟକ୍ତିବିଶେଷଙ୍କ ଛତ୍ରଛାୟାତଳେ କିଛି ଲୋକ ଏହି ଯୋଜନାରେ ସାମିଲ ହେବା ପାଇଁ ଆବେଦନ କରିବା ସହ ତାଲିକାଭୁକ୍ତ ମଧ୍ୟ ହୋଇ ଯାଇଥିଲେ। ରାଜ୍ୟରେ ଏହି ଯୋଜନା କାର୍ଯ୍ୟକାରୀ ହେବା ଦିନ ଠାରୁ ଏମାନେ ସରକାରୀ ସାମଗ୍ରୀ ଲୁଟ କରିବାରେ ଲାଗିପଡିଥିଲେ। ଏବେ ନୂତନ କେୱାଇସି ସଂଯୋଗ ପ୍ରକ୍ରିୟା ଆରମ୍ଭ ହେବା ପରେ ଏବେ ଗୋଟିଏ ଗୋଟିଏ ଅଯୋଗ୍ୟ ହିତାଧିକାରୀ ଧରାପଡ଼ୁଛନ୍ତି। ମିଳିଥିବା ଖବର ଅନୁଯାୟୀ ଚୌଦ୍ୱାର ପୌରପାଳିକାର ୱାର୍ଡ଼ ନମ୍ବର ୧ରେ ୩୨ଜଣ ଅଯୋଗ୍ୟ ହିତାଧିକାରୀ, ୨ନମ୍ବର ୱାର୍ଡ଼ରେ ୨୩ଜଣ, ୩ନମ୍ବର ୱାର୍ଡ଼ରେ ୨୧ଜଣ, ୪ନମ୍ବର ୱାର୍ଡ଼ରେ୨୨ଜଣ, ୫ନମ୍ବର ନମ୍ବର ୱାର୍ଡ଼ରେ ୧୭ଜଣ, ୬ନମ୍ବର ୱାର୍ଡ଼ରେ ୧୭ଜଣ, ୭ନମ୍ବର ୱାର୍ଡ଼ରେ ୨୨ଜଣ, ୮ନମ୍ବର ୱାର୍ଡ଼ରେ ୨୭ଜଣ, ୯ନମ୍ବର ୱାର୍ଡ଼ରେ ୧୮ଜଣ, ୧୦ନମ୍ବର ୱାର୍ଡ଼ରେ ୪୨ଜଣ, ୧୧ନମ୍ବର ୱାର୍ଡ଼ରେ ୨୬ଜଣ, ୱାର୍ଡ଼ ନମ୍ବର ୧୨ରେ ୨୬ଜଣ, ୱାର୍ଡ଼ ନମ୍ବର ୧୩ରେ ୧୦ଜଣ, ୱାର୍ଡ଼ ନମ୍ବର ୧୪ରେ ୫ଜଣ, ୱାର୍ଡ଼ ନମ୍ବର ୧୫ରେ ୬ଜଣ, ୱାର୍ଡ଼ ନମ୍ବର ୧୬ରେ ୬ଜଣ, ୱାର୍ଡ଼ ନମ୍ବର ୧୭ରେ ୨୨ଜଣ, ୱାର୍ଡ଼ ନମ୍ବର ୧୮ରେ ୫ଜଣ, ୱାର୍ଡ଼ ନମ୍ବର ୧୯ରେ ୧୫ଜଣ ଅଯୋଗ୍ୟ ହିତାଧିକାରୀ ରହିଥିବା ଜଣାପଡ଼ିଛି। ତେବେ ସବୁଠୁ ବଡ଼ ପ୍ରଶ୍ନ ଉଠୁଛି ଚୌଦ୍ୱାର ପୌରା ଧ୍ୟକ୍ଷା ଏବଂ ଉପାଧ୍ୟକ୍ଷଙ୍କ ନିଜସ୍ୱ ୱାର୍ଡ଼ରେ ମଧ୍ୟ ଅଯୋଗ୍ୟ ହିତାଧିକାରୀଙ୍କ ସଂଖ୍ୟା କିଛି କମ୍ ନାହିଁ। ଏମାନଙ୍କ ମଧ୍ୟରେ କିଛି ଏକାଧିକ କୋଠାଘରର ମାଲିକ ହୋଇଥିବାବେଳେ ୪ଚକିଆ ଯାନ ମାଲିକଙ୍କ ସମେତ କିଛି ବୃତ୍ତିଗତ ଟିକସ ମଧ୍ୟ ଦେଉଥିବା ଜଣାପଡ଼ିଛି। ତେଣୁ ସରକାରୀ ଯୋଜନାକୁ ବାଟମଣା କରୁଥିବା ଅଯୋଗ୍ୟ ହିତାଧିକାରୀଙ୍କ ଉପରେ ସରକାର ଓ ପ୍ରଶାସନ କିଭଳି ପଦକ୍ଷେପ ନେଉଛି ତାହା ଦେଖିବାକୁ ବାକି ରହିଲା ବୋଲି ବୁଦ୍ଧିଜୀବୀ ମହଲରେ କୁହାଯାଇଛି।