ରାଜ୍ୟରେ ମେଣ୍ଟ ଚର୍ଚ୍ଚା ନେଇ ନୂଆମୋଡ଼: ବିଜେପି ଦୋହରାଇଲା ଏକା ଲଢ଼ିବୁ, ବିଜେଡି ନୀରବ
#ଭୁବନେଶ୍ୱର(ଏନ୍.ଏମ୍.): ଆଗାମୀ ସାଧାରଣ ନିର୍ବାଚନରେ ରାଜ୍ୟରେ ବିଜେଡି ଓ ବିଜେପି ମଧ୍ୟରେ ନିର୍ବାଚନୀ ମେଣ୍ଟକୁ ନେଇ ଚାଲିଥିବା ଚର୍ଚ୍ଚା ଆଜି ପୁଣି ଥରେ ନୂଆମୋଡ଼ ନେଇଛି । ସମ୍ଭାବ୍ୟ ମେଣ୍ଟକୁ ନେଇ ଗତ ଦୁଇଦିନ ଧରି ଚାଲିଥିବା ରାଜନୀତିକ ହଟଚମଟ ଓ ଚର୍ଚ୍ଚାରେ ରାଜ୍ୟ ବିଜେପି ସଭାପତି ଆଜି ପୂର୍ଣ୍ଣଚ୍ଛେଦ ପକାଇଛନ୍ତି । ପୂର୍ବରୁ ମାର୍ଚ୍ଚ ୧ତାରିଖରେ ଦିଲ୍ଲୀରୁ ଫେରି ମନମୋହନ ସମ୍ଭାବ୍ୟ ମେଣ୍ଟ ଚର୍ଚ୍ଚା ଉପରେ ପୂର୍ଣ୍ଣଚ୍ଛେଦ ପକାଇଥିଲେ । ରାଜ୍ୟ ବିଜେପି ପକ୍ଷରୁ ଆଜି ସକାଳେ ଓ ସନ୍ଧ୍ୟାରେ ଆନୁଷ୍ଠାନିକ ଭାବେ ଦୁଇଥର ମେଣ୍ଟ ସମ୍ଭାବନାକୁ ବାତିଲ କରାଯାଇଥିଲେ ମଧ୍ୟ ବିଜେଡିର ଏ ନେଇ ନିରବତା ସସପେନ୍ସକୁ ଅଧିକ ବଢ଼ାଇ ଦେଇଛି । ରାଜ୍ୟରେ ମେଣ୍ଟ ପାଇଁ ବିଜେଡି ଉପରେ ଚାପ ପକାଇ ନିଜ ପସନ୍ଦ ମୁତାବକ ଆସନ ନେବାକୁ ବିଜେପିର ଏହା ରଣନୀତି ବୋଲି ରାଜନୀତିକ ମହଲରେ ଚର୍ଚ୍ଚା ହେଉଛି । ତେବେ ୩ ଦିନିଆ ଦିଲ୍ଲୀ ଗସ୍ତରୁ ଫେରିବା ପରେ ଆଜି ଭୁବନେଶ୍ୱର ବିମାନ ବନ୍ଦରରେ ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇ ରାଜ୍ୟ ବିଜେପି ସଭାପତି ମନମୋହନ ସାମଲ କହିଛନ୍ତି ଯେ, ମେଣ୍ଟକୁ ନେଇ କୌଣସି ପ୍ରକାରର ଆଲୋଚନା ଦିଲ୍ଲୀରେ ହୋଇନାହିଁ । ବିଜେପି ରାଜ୍ୟରେ ଏକାକୀ ବିଧାନସଭା ଓ ଲୋକସଭା ନିର୍ବାଚନ ଲଢ଼ିବ । ଗତ ଦୁଇଦିନ ଧରି କେନ୍ଦ୍ରୀୟ ନେତୃତ୍ୱଙ୍କ ସହ ରାଜ୍ୟର ନିର୍ବାଚନୀ ପ୍ରସ୍ତୁତି ସମ୍ପର୍କରେ ଆଲୋଚନା ହେଉଥିଲା କିନ୍ତୁ ବିଜେଡି ସହ ମେଣ୍ଟ ପାଇଁ କୌଣସି ପ୍ରକାରର ଆଲୋଚନା ହୋଇନଥିବା ସେ ରୋକ୍ଠୋକ କହିଥିଲେ । ଏଥିସହିତ ଗତ ମାର୍ଚ୍ଚ ୧ତାରିଖରେ ସେ ଦେଇଥିବା ବୟାନକୁ ଆଜି ମଧ୍ୟ ଦୋହରାଇଥିଲେ । ତାଙ୍କ ପୂର୍ବରୁ ଆଜି ପୂର୍ବାହ୍ନରେ ରାଜ୍ୟ ବିଜେପି ଉପସଭାପତି ପୃଥ୍ୱୀରାଜ ହରିଚନ୍ଦନ ମଧ୍ୟ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଥିଲେ ଯେ, ମେଣ୍ଟ କେବଳ କପୋଳକଳ୍ପିତ । ମେଣ୍ଟ ନେଇ କୌଣସି ନିଷ୍ପତ୍ତି କିମ୍ବା ଆଲୋଚନା ହୋଇନାହିଁ । ଓଡ଼ିଶାରେ ବିଜେପି ଏକାକୀ ଲଢ଼ିଲେ ଭଲ ପ୍ରଦର୍ଶନ କରିବ ବୋଲି ସ୍ପଷ୍ଟ ଭାବେ କେନ୍ଦ୍ରୀୟ ନେତୃତ୍ୱଙ୍କ ପାଖରେ ରାଜ୍ୟ ନେତୃତ୍ୱ ମତ ରଖିଛନ୍ତି । ମେଣ୍ଟକୁ ନେଇ କେବଳ ସୋସିଆଲ ମିଡିଆ ଓ ଗଣମାଧ୍ୟମରେ ଚର୍ଚ୍ଚା ହେଉଛି । ଏପରିକି କିଛି ଗଣମାଧ୍ୟମ ଓ ସୋସିଆଲ ମିଡିଆ ମଧ୍ୟ ଆସନ ବୁଝାମଣାର ଖବର ପ୍ରସାରଣ କରୁଛନ୍ତି । ବିଜେପି ରାଜ୍ୟରେ ଏକାକୀ ଲଢ଼ିବାର ବହୁତ ସମ୍ଭାବନା ରହିଛି ବୋଲି ସେ କହିଥିଲେ । ଅନ୍ୟପକ୍ଷରେ, ସମ୍ଭାବ୍ୟ ମେଣ୍ଟକୁ ନେଇ ଯେଉଁ ଫର୍ମୂଲା ତିଆରି ହୋଇଛି ସେଥିରେ ଦୁଇ ଦଳର ସହମତି ହୋଇ ପାରୁନି ବୋଲି ରାଜନୈତିକ ସମୀକ୍ଷକମାନେ ପ୍ରକାଶ କରିଛନ୍ତି । ବିଜେପି ଏବେ ୨୦୦୦ ମସିହାର ଫର୍ମୂଲା (ବିଧାନସଭାରେ ୮୪/୬୩ ଓ ଲୋକସଭାରେ ୧୨/୯)ସିଟ ଦାବି କରୁଥିବାବେଳେ ଏବେ ଅଧିକ ସିଟ୍ ପାଇଁ ବିଜେଡି ଉପରେ ଚାପ ବଜାୟ ରଖିଥିବା ଚର୍ଚ୍ଚା ହେଉଛି । ଏପରିକି ବିଜେଡି ନିଜ ଆଡ଼ୁ ୧୩ଟି ଲୋକସଭା ଓ ୪୯ଟି ବିଧାନସଭା ଆସନ ବିଜେପିକୁ ଅଫର କରିଥିବା ଚର୍ଚ୍ଚା ହେଉଛି । ଯେଉଁଥି ପାଇଁ ଗତ ୩ଦିନ ମଧ୍ୟରେ ବିଜେପି ବାରମ୍ବାର ଏକାକୀ ଲଢ଼ିବ ବୋଲି ବୟାନ ଦେବାରେ ଲାଗିଛି ଓ ବିଜେଡି କୌଣସି ପ୍ରତିକ୍ରିୟା ନରଖି ନିରବତା ଅବଲମ୍ବନ କରିଛି । ସେହିପରି ବିଜେପି ନେତୃତ୍ୱଙ୍କ ସହ ଆଲୋଚନା ପାଇଁ ବିଜେଡିର ଦୁଇ ନେତା ଭି.କେ. ପାଣ୍ଡିଆନ ଓ ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ ଦିଲ୍ଲୀ ଗସ୍ତ କରିଥିଲେ ମଧ୍ୟ ଆସନ ବୁ୍ଝାମଣାକୁ ନେଇ ସମାଧାନ ନହେବାରୁ ମେଣ୍ଟ ଆଶା ମଉଳି ଯାଇଥିବା ଆଲୋଚନା ହେଉଛି । ସୂଚନାଯୋଗ୍ୟ, ଗତ ୬ ତାରିଖରେ ବିଜେଡି ଅଚାନକ ନିଜର ବରିଷ୍ଠ ନେତାମାନଙ୍କୁ ନବୀନ ନିବାସ ଡାକି ସମ୍ଭାବ୍ୟ ମେଣ୍ଟକୁ ନେଇ ବିଚାରବିମର୍ଶ କରିଥିବାବେଳେ ବିଜେପି ନିଜର ରାଜ୍ୟ ନେତୃତ୍ୱଙ୍କୁ ଦିଲ୍ଲୀ ଡକାଇଥିଲା । ଗୋଟିଏ ଦିନରେ ଦୁଇଦଳର ଏଭଳି ଅଚାନକ ରାଜନୀତିକ ଗତିବିଧି ଓ ବିଜେଡିର ଦୁଇ ନେତା ସ୍ୱତନ୍ତ୍ର ବିମାନରେ ଦିଲ୍ଲୀ ଯିବା ଘଟଣା ରାଜ୍ୟରେ ମେଣ୍ଟ ଚର୍ଚ୍ଚାକୁ ବଳ ଯୋଗାଇଥିଲା । ହେଲେ ବିଭିନ୍ନ ପର୍ଯ୍ୟାୟ ଆଲୋଚନା ପରେ ଆଜି ବିଜେପି ନେତା ମେଣ୍ଟକୁ ନେଇ ଅସ୍ୱୀକାର କରିବା ପରେ ସମ୍ଭବତ ଆଗାମୀ ନିର୍ବାଚନରେ ବିଜେଡି ଓ ବିଜେପି ସ୍ୱତନ୍ତ୍ର ଭାବେ ରଣାଙ୍ଗନରେ ଅବର୍ତ୍ତୀର୍ଣ୍ଣ ହୋଇପାରନ୍ତି ବୋଲି ନିର୍ବାଚନ ସମୀକ୍ଷକମାନେ ମତ ଦେଇଛନ୍ତି ।