ରାଜ୍ୟରେ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ପ୍ରଦାନ ଦାବିରେ ସଂଯୁକ୍ତ କିଶାନ ମୋର୍ଚ୍ଚା ପକ୍ଷରୁ ସ୍ମାରକପତ୍ର

କଟକ(ଏନ୍‌.ଏମ୍‌.): ରାଜ୍ୟରେ ଅଦିନିଆ ବର୍ଷା ଯୋଗୁଁ ଚାଷୀର ଅହେତୁକ କ୍ଷତି ହୋଇଛି। ବର୍ଷ ଯାକର ପରିଶ୍ରମ ଆଉ ପୁଞ୍ଜି ଲଗାଇ ଶେଷରେ ସର୍ବସ୍ୱ ହରାଇବାରେ ପରେ ବହୁ ଚାଷୀ ଆତ୍ମହତ୍ୟା କରିଥିବାବେଳେ କିଛି ଚାଷୀ ହୃଦଘାତରେ ମଧ୍ୟ ପ୍ରାଣ ହରାଇଛନ୍ତି। ଏଭଳି ସମ୍ବେଦନଶୀଳ ଘଟଣାକୁ ସରକାର ଓ ପ୍ରଶାସନ ଗୁରୁତ୍ୱ ଦେଇ ଆଗାମୀ ଦିନରେ ଚାଷୀମାନଙ୍କ ମନୋବଳ ବୃଦ୍ଧି କରାଇବା ନିମନ୍ତେ ସଂଯୁକ୍ତ କିଶାନ ମୋର୍ଚ୍ଚା, ଓଡ଼ିଶା ପକ୍ଷରୁ କ୍ଷତିଗ୍ରସ୍ତ ଚାଷୀମାନଙ୍କ ନିମନ୍ତେ ବିଭିନ୍ନ ଦାବି କରାଯାଇଛି। ଜାନୁଆରୀ ୧୦ତାରିଖ ଦିନ ସାରା ରାଜ୍ୟରେ ଆତ୍ମହତ୍ୟା କିମ୍ବା ଅସ୍ୱାଭାବିକ ମୃତ୍ୟୁବରଣ କରିଥିବା ଚାଷୀ ବା ଭାଗଚାଷୀମାନଙ୍କୁ କ୍ଷତିପୂରଣ ଦେବାକୁ ଦାବି କରାଯାଇଛି। ଏହି ପରିପ୍ରେକ୍ଷୀରେ ସଂଯୁକ୍ତ କିଶାନ ମୋର୍ଚ୍ଚା କଟକ ଜିଲ୍ଲା ଶାଖା ପକ୍ଷରୁ ଜିଲ୍ଲାପାଳଙ୍କୁ ସାକ୍ଷାତ କରି ଏକ ସ୍ମାରକପତ୍ର ପ୍ରଦାନ କରାଯାଇଛି।
ରାଜ୍ୟରେ ଭାଗ ଚାଷୀମାନଙ୍କୁ କ୍ଷତିପୂରଣ ଦିଆଯିବ ନାହିଁ ବୋଲି ବିଭାଗୀୟ ମନ୍ତ୍ରୀଙ୍କ ବକ୍ତବ୍ୟ, ସାରା ରାଜ୍ୟରେ ଆବଶ୍ୟକୀୟ ମଣ୍ଡି ନଖୋଲିବା, ବନ୍ୟଜନ୍ତୁଙ୍କ ଯୋଗୁଁ ଚାଷୀଙ୍କ ବ୍ୟାପକ କ୍ଷତି ଆଦି ସମ୍ପର୍କରେ ରାଜ୍ୟ ବିଜେପି ସରକାରଙ୍କ କୃଷକ ବିରୋଧୀ ନୀତି ପ୍ରତିବାଦରେ ରାଜ୍ୟବ୍ୟାପୀ ଚେତାବନୀ ଦିବସ ପାଳନ କରାଯାଉଛି। ଏହି ପରିପ୍ରେକ୍ଷୀରେ ସରକାର ଯଦି ଦାବିଗୁଡ଼ିକ ଉପରେ ତୁରନ୍ତ ପଦକ୍ଷେପ ନନିଅନ୍ତି ତେବେ ଆଗାମୀ ଦିନରେ ଜନଆନ୍ଦୋଳନ ହେବ ବୋଲି ସଂଯୁକ୍ତ କିଶାନ ମୋର୍ଚ୍ଚା କଟକ ଶାଖା ପକ୍ଷରୁ ଚେତାବନୀ ଦିଆଯାଇଛି। ତେବେ ଏହି ଦାବି ଗୁଡ଼ିକ ମଧ୍ୟରେ ଭାଗଚାଷୀମାନଙ୍କୁ କ୍ଷତିପୂରଣ ପ୍ରଦାନ କରିବା ଉପରେ ପଦକ୍ଷେପ ନେବା, ଧାନ ଫସଲ କ୍ଷତି ପାଇଁ ଏକର ପିଛା ସର୍ବନିମ୍ନ ୨୫ହଜାର ଟଙ୍କା କ୍ଷତି ପୂରଣ ରାଶି, ପନିପରିବା ଭଳି ଅର୍ଥକରୀ ଫସଲ ପାଇଁ ଏକର ପିଛା ସର୍ବନିମ୍ନ ୪୦ହଜାର ଟଙ୍କା କ୍ଷତିପୂରଣ ରାଶି ପ୍ରଦାନ କରିବା, ଜଙ୍ଗଲ ଜମି ପଟ୍ଟାପାଇଥିବା ଆଦିବାସୀଙ୍କୁ ମଧ୍ୟ ଫସଲ ନଷ୍ଟ ପାଇଁ କ୍ଷତିପୂରଣ ଦେବା, ଫସଲ ନଷ୍ଟ ଯୋଗୁଁ ଅକାଳରେ ମୃତ୍ୟୁବରଣ କରିଥିବା ୧୫ଜଣ କୃଷକଙ୍କ ପରିବାରକୁ ୨୦ଲକ୍ଷ ଟଙ୍କା କ୍ଷତିପୂରଣ ସହ ଋଣ ଛାଡ଼ କରିବା, ସମ୍ପୃକ୍ତ ପରିବାର ବଞ୍ଚିବା ପାଇଁ ଆତ୍ମନିଯୁକ୍ତି ଜରିଆରେ ବିନା ସୁଧରେ ନୂତନ ବ୍ୟାଙ୍କ ଋଣ ପ୍ରଦାନ କରିବା, ମଣ୍ଡି ବ୍ୟବସ୍ଥାରେ ଅରାଜକତା ବନ୍ଦ କରିବା, ଚାଷୀ ବା ଭାଗଚାଷୀଙ୍କ ସମସ୍ତ ଧାନ ସରକାରୀ ବ୍ୟବସ୍ଥାରେ କିଣିବା ପାଇଁ ବ୍ୟବସ୍ଥା କରିବା, କଟକ ଜିଲ୍ଲାରେ ହାତୀ, ମାଙ୍କଡ, ବାରହାମାନଙ୍କ ଆକ୍ରମଣରୁ ଫସଲ ରକ୍ଷା ନିମନ୍ତେ ଆବଶ୍ୟକୀୟ ପଦକ୍ଷେପ ନେବା, ଚାଷୀମାନେ କ୍ଷତିପୂରଣ ଆବେଦନ କରିବା ପାଇଁ ସହଜ ଓ ସାବଲୀଳ ବ୍ୟବସ୍ଥା ଗ୍ରହଣ କରିବାକୁ ଦାବି ହୋଇଛି। ମୋର୍ଚ୍ଚା ପକ୍ଷରୁ ଡମ୍ବରୁଧର ସାହୁ, ରମେଶ ଚନ୍ଦ୍ର ବେହେରା, ବିଷ୍ଣୁ ବେହେରା ପ୍ରମୁଖ ଜିଲ୍ଲାପାଳଙ୍କୁ ଭେଟି ଏହି ସ୍ମାରକପତ୍ର ପ୍ରଦାନ କରିଛନ୍ତି।