ରାଜଧାନୀରେ କାଳବୈଶାଖୀର ତାଣ୍ଡବ : ଭାଙ୍ଗିଲା ଗଛ, ଉଡ଼ିଲା ଛପର!
#ଭୁବନେଶ୍ୱର(ଏନ୍.ଏମ୍.): ଅସମ୍ଭାଳ ତାତି ପରେ ରାଜଧାନୀରେ କାଳବୈଶାଖୀ ତାଣ୍ଡବ ସୃଷ୍ଟି କରିଛି । ଧୂଳି ଝଡ଼ ହେବା ସହିତ ବଡ଼ବଡ଼ ଗଛ ଗୁଡ଼ିକ ଭାଙ୍ଗି ପଡ଼ିଥିବାବେଳେ ଘରୁ ଛପର ଉଡାଇ ଦେଇଛି । କିଛି ସମୟ ପାଇଁ ଭୁବନେଶ୍ୱରରେ ପ୍ରବଳ ପବନ ସାଙ୍ଗକୁ ଧୂଳି ଉଡ଼ି କିଛି ସମୟ ପାଇଁ ଜନ ଜୀବନ ଏକ ପ୍ରକାର ଠପ୍ ହୋଇଯାଇଥିଲା । ଆଜି ପୂର୍ବାହ୍ନରେ ଭୁବନେଶ୍ୱରରେ ଅସମ୍ଭାଳ ତାତି ଯୋଗୁଁ ଲୋକେ ଘରୁ ବାହାରିବା କଷ୍ଟକର ହୋଇଥିଲା । ବ୍ୟସ୍ତବହୁଳ ଭୁବନେଶ୍ୱର ରାସ୍ତାରେ ଡହଡହ ଖରା ସାଙ୍ଗକୁ ବିଭିନ୍ନ ସମୟରେ ଟ୍ରାଫିକ ଜାମ ଅସମ୍ଭାଳ ସ୍ଥିତି ସୃଷ୍ଟି କରିଥିଲା । ଅସହ୍ୟ ଗରମରେ ଜନସାଧାରଣ ଆଉଟୁ ପାଉଟୁ ହୋଇ ପଡ଼ିଥିଲେ । ତେବେ ଅପରାହ୍ନ ପ୍ରାୟ ୪.୧୫ ମିନିଟରେ ହଠାତ୍ ରାଜଧାନୀ ଆକାଶରେ ଘୋଟି ଆସିଥିଲା କଳାହାଣ୍ଡିଆ ମେଘ । ପରେ ପ୍ରବଳ ବେଗରେ ବହିଥିଲା ପବନ । ଏପରିକି ଘଣ୍ଟା ପ୍ରତି ୪୦ରୁ ୫୦ କିମି ବେଗରେ ପବନ ବହିଥିଲା । ଧୂଳି ଝଡ଼ ମଧ୍ୟ ହୋଇଥିଲା । କାଳବୈଶାଖୀ ପ୍ରଭାବରେ ଅନେକ ସ୍ଥାନରେ ଗଛ ଭାଙ୍ଗି ପଡ଼ିଥିଲା । ଟିଣ ଓ ଆଜବେଷ୍ଟସ୍ ଛପର ବି ଉଡ଼ି ଯାଇଥିଲା । କାଳବୈଶାଖୀର ପ୍ରଭାବ ଭୁବନେଶ୍ୱରର ଖଣ୍ଡଗିରି, ବମିଖାଲ, ପଟିଆ, ଡମଣା, ରାଜମହଲ, ଓଲଡ୍ ଟାଉନ୍, ଶିଖରଚଣ୍ଡୀ ପ୍ରମୁଖ ଅଞ୍ଚଳରେ କାଳବୈଶାଖୀ ତାଣ୍ଡବ ରଚିଥିଲା । ଯାହାଫଳରେ ରାସ୍ତାଘାଟ ଶୂନ୍ଶାନ୍ ହୋଇଯାଇଥିଲା । ଅନେକ ସ୍ଥାନରେ ଦୁଇ ଚକିଆ ଓ ଚାରି ଚକିଆ ଗାଡ଼ି ଓଲଟି ପଡ଼ିଥିବା ମଧ୍ୟ ସୋସିଆଲ ମିଡିଆରେ ଭାଇରାଲ ହେଉଛି । କାଳବୈଶାଖୀର ପ୍ରଭାବ କେବଳ ଭୁବନେଶ୍ୱର କାହିଁକି କଟକ, କେନ୍ଦ୍ରାପଡ଼ା, ଜଗତସିଂହପୁର ବାଲେଶ୍ୱର ଆଦି ଜିଲ୍ଲାରେ ଦେଖିବାକୁ ମିଳିଥିବା ଜଣାପଡ଼ିଛି ।