ଯୋଗାଣ ବିଭାଗ ପ୍ରୋତ୍ସାହନରେ ସାମଗ୍ରୀ ବାଟମାରଣା କରୁଛନ୍ତି ପରିବହନ ଠିକାଦାର!

କଟକ(ଏନ୍‌.ଏମ୍‌.): କଟକ ମହାନଗର ନିଗମ ଅଞ୍ଚଳରେ ସରକାରଙ୍କ ଦ୍ୱାରା ଯୋଗାଇ ଦିଆଯାଉଥିବା ଅତ୍ୟାବଶ୍ୟକ ସାମଗ୍ରୀ ବଣ୍ଟନ ପାଇଁ ଖୁଚୁରା ବିକ୍ରେତା ନିଯୁକ୍ତ ହୋଇଥିଲାବେଳେ ଖୁଚୁରା ବିକ୍ରେତାମାନଙ୍କ ନିକଟରେ ସାମଗ୍ରୀ ପହଞ୍ଚାଣ ପାଇଁ ପରିବହନ ଠିକାଦାର ଯୋଗାଣ ନିଗମ ନିଯୁକ୍ତ କରିଛନ୍ତି । କଟକ ମହାନଗର ନିଗମ ଅଞ୍ଚଳରେ ନିଯୁକ୍ତ ପରିବହନ ଠିକାଦାର ଏବେ ଯୋଗାଣ ବିଭାଗର ପ୍ରୋତ୍ସାହନରେ ସାମଗ୍ରୀ ବାଟମାରଣା କରୁଥିବା ଭଳି ଗୁରୁତର ଅଭିଯୋଗ କରିଛି କଟକ ରିଟେଲ ଡିଲର୍ସ ଆସୋସିଏସନ । ସଂଘର କାର୍ଯ୍ୟକାରୀ ସଭାପତି ସୈୟଦ ଏକ୍ରାମ ହୁସେନ କରିଛନ୍ତି ଯେ ସିଏମସି ଅଞ୍ଚଳରେ ୧୫୮ ଜଣ ଖୁଚୁରା ବିକ୍ରେତାଙ୍କୁ ସାମଗ୍ରୀ ପହଞ୍ଚାଣ ପାଇଁ ଯୋଗାଣ ନିଗମ ଦ୍ୱାରା ୩ ଜଣ ପରିବହନ ଠିକାଦାର ନିଯୁକ୍ତ ହୋଇଛନ୍ତି । ଏହି ପରିବହନ ଠିକାଦାର ମାନଙ୍କୁ ସାମଗ୍ରୀ ବାଟମାରଣା କରିବା ପାଇଁ ଯୋଗାଣ ବିଭାଗ ପ୍ରୋତ୍ସାହନ ଯୋଗାଉଛି । ଏଠାରେ ସୂଚନାଯୋଗ୍ୟ ଯେ, ଖୁଚୁରା ବିକ୍ରେତାମାନଙ୍କୁ ତାଙ୍କ ନିକଟରେ ସଂଯୋଗ ହୋଇଥିବା ପଡିକାର୍ଡ ଅନୁଯାୟୀ ନିର୍ଦ୍ଧାରିତ ଓଜନର ସାମଗ୍ରୀ ପହଞ୍ଚାଣ ପାଇଁ ପରିବହନ ଠିକାଦାରଙ୍କୁ ଯୋଗାଣ ବିଭାଗ ନିର୍ଦ୍ଦେଶ ଦେଇଥାଏ । ନିୟମ ଅନୁସାରେ ପରିବହନ ଠିକାଦାର ସରକାରୀ ଗୋଦାମରୁ ସାମଗ୍ରୀ ଓଜନ କରି ନିଜସ୍ୱ ଟ୍ରକ/ପିକ଼୍‌-ଅପ ଭ୍ୟାନ ଅଥବା ଛୋଟ ଛୋଟ ଗାଡ଼ିରେ ଏହି ସାମଗ୍ରୀ ଖୁଚୁରା ବିକ୍ରେତାମାନଙ୍କ ବ୍ୟବସାୟ ପ୍ରତିଷ୍ଠାନ ନିକଟରେ ପହଞ୍ଚାଇବା ସମୟରେ ନିୟମ ରହିଛି ଯେ, ଆଣିଥିବା ସାମଗ୍ରୀର ଶତକଡା ଦଶଭାଗ ସାଙ୍ଗରେ ଆଣିଥିବା ଓଜନ ମାପ ଯନ୍ତ୍ରରେ ଓଜନ ଦେଖାଇ କରି ସାମଗ୍ରୀ ଦେବ । କିନ୍ତୁ ପରିତାପର ବିଷୟ ପରିବହନ ଠିକାଦାର ଯୋଗାଣ ବିଭାଗର ଏହି ନିୟମକୁ “ଫୁ’ କରି ଯୋଗାଣ ବିଭାଗ କେତେକ ଅଫିସରଙ୍କ ସହାୟତାରେ ବିନା ଓଜନରେ ସାମଗ୍ରୀ ପହଞ୍ଚାଣ କରୁଛି । କୌଣସି ବିକ୍ରୟ କେନ୍ଦ୍ର ନିକଟରେ ପରିବହନ ଠିକାଦାର ନା ସାଙ୍ଗରେ ଆଣୁଛି ଓଜନ ମାପ ଯନ୍ତ୍ର ନା ଓଜନ ଦେଖାଇ ସାମଗ୍ରୀ ଦେଉଛି ; ଫଳରେ ବିନା ଓଜନରେ ଦେଇଥିବା ସାମଗ୍ରୀ ରେ ପ୍ରତ୍ୟେକ କ୍ୱିଣ୍ଟାଲରେ ଦୁଇ କିଲୋରୁ ଚାରି କିଲୋ ପର୍ଯ୍ୟନ୍ତ ସାମଗ୍ରୀ କମ୍ ହେଉଛି । ଯେଉଁ ଖୁଚୁରା ବିକ୍ରେତା ମାନେ ନିଜର ଓଜନ ମାପ ଯନ୍ତ୍ରରେ ସାମଗ୍ରୀ ଓଜନ ଦେଖି କରି ନେବାକୁ କହୁଛନ୍ତି ସେମାନଙ୍କୁ ପରିବହନ ଠିକାଦାର ବିଭିନ୍ନ ପ୍ରକାରର ହଇରାଣ ହରକତ ସ୍ୱରୂପ ନିମ୍ନମାନର ସାମଗ୍ରୀ ଚିରାଫଟ୍ଟା ବସ୍ତାରେ ସାମଗ୍ରୀ ବହୁ ବିଳମ୍ବରେ ପହଞ୍ଚାଣ କରୁଛି । ଏପରି କି ପରିବହନ ଠିକାଦାରଙ୍କ କର୍ମଚାରୀ ଖୁଚୁରା ବିକ୍ରେତାମାନଙ୍କୁ ଅଶ୍ରାବ୍ୟ ଭାଷା କହିବାକୁ ମଧ୍ୟ ପଛାଉ ନାହାଁନ୍ତି ଏଣେ ଯୋଗାଣ ବିଭାଗ ପଡିକାର୍ଡ ଧାରୀଙ୍କୁ ମାସିକିଆ କୋଟା ବଦଳରେ ବାଟମାରଣାର ବାଟ କରିବା ପାଇଁ କେତେବେଳେ ଦୁଇମାସ, କେତେବେଳେ ତିନି ମାସ, ପୁଣି କେତେବେଳେ ଚାରି ମାସର ସାମଗ୍ରୀ ଏକକାଳୀନ ପୁଣି ମାତ୍ର କୋଡିଏରୁ ପଚିଶ ଦିନ ମଧ୍ୟ ରେ ନେବାପାଇଁ ବାଧ୍ୟ କରୁଛନ୍ତି । ଏହା ଦ୍ୱାରା ଗରିବ ପଡିକାର୍ଡ ଧାରୀ ସ୍ଥାନ ଅଭାବରୁ ବାଧ୍ୟ ହୋଇ ସାମଗ୍ରୀ ଗୁଡିକ ସାହି, ବସ୍ତିରେ ଥିବା ଗ୍ରୋସୋରୀ ଦୋକାନୀକୁ ଅଳ୍ପ ମୁଲ୍ୟରେ ବିକ୍ରୟ କରିବାକୁ ବାଧ୍ୟ ହେଉଛନ୍ତି । ଫଳରେ ସ୍ୱଳ୍ପ ସମୟରେ ସାମଗ୍ରୀ ଉଠାଣ ନିର୍ଦ୍ଦେଶକୁ ପାଳନ କରିବାକୁ ଯାଇ ଖୁଚୁରା ବିକ୍ରୟ କେନ୍ଦ୍ରରୁ ସାମଗ୍ରୀ ନେବାପାଇଁ ଖୁଚୁରା ବିକ୍ରୟ କେନ୍ଦ୍ର ନିକଟରେ ଭିଡ଼ କରୁଛନ୍ତି । ବାଧ୍ୟ ହୋଇ ଖୁଚୁରା ବିକ୍ରେତା ପରିବହନ ଠିକାଦାରଙ୍କ ବେନିୟମ କାର୍ଯ୍ୟ ସହିତ ସାଲିସ କରିବାକୁ ବାଧ୍ୟ ହେଉଛନ୍ତି ଓ ଶୋଷଣର ଶିକାର ହେଉଛନ୍ତି । ଏ ସମ୍ପର୍କରେ ଯୋଗାଣ ବିଭାଗ ଅଧିକାରୀଙ୍କୁ ଜଣାଇଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ । ଗତ ଡିସେମ୍ବର ମାସରେ କଟକ ରିଟେଲ ଡିଲର୍ସ ଆସୋସିଏସନ୍ ପକ୍ଷରୁ ଯୋବ୍ରା ଅଞ୍ଚଳର ଖୁଚୁରା ବିକ୍ରୟ କେନ୍ଦ୍ର ନିକଟରେ ପରିବହନ ଠିକାଦାର ଦ୍ୱାରା ପ୍ରେରଣ ହୋଇଥିବା ସାମଗ୍ରୀ ପହଞ୍ଚାଣ ସମୟରେ ତନଖି କରାଯିବାରୁ ପ୍ରତ୍ୟେକ ବସ୍ତା ରେ ଧାର୍ଯ୍ୟ ଓଜନ ଠାରୁ ବସ୍ତା ପିଛା ଏକ କିଲୋରୁ ଦୁଇ କିଲ ପର୍ଯ୍ୟନ୍ତ ସାମଗ୍ରୀ କମ୍ ଥିବା ଓ ଉକ୍ତ ଟ୍ରକ୍ ଚାରି କ୍ୱିଣ୍ଟାଲରୁ ଅଧିକ ସାମଗ୍ରୀ କମ୍ ଥିବା ଦେଖିବାକୁ ମିଳିଥିଲା । ଯୋଗାଣ ଅଧିକାରୀଙ୍କୁ ଏସମ୍ପର୍କରେ ଆସୋସିଏସନ୍ ପକ୍ଷରୁ ଗତ ଡ଼ିସେମ୍ବର ମାସ ୨୬ ତାରିଖ ଦିନ ଉକ୍ତ ପରିବହନ ଠିକାଦାର ଏବଂ ଗୋଦାମ ଦାୟିତ୍ୱରେ ଥିବା ପି.ଆଇ. ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏକ ଦାବିପତ୍ର ଦିଆଯାଇଥିଲା । ଯୋଗାଣ ଅଧିକାରୀ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ପ୍ରତିଶ୍ରୁତି ଦେଇଥିଲେ ମଧ୍ୟ ଆଜି ୪ ମାସ ବିତି ଯାଇଥିଲେ ମଧ୍ୟ କାର୍ଯ୍ୟାନୁଷ୍ଠାନ ତ ଦୂରର କଥା ତଦନ୍ତ ପାଇଁ ଧାଡିଏ ନିର୍ଦ୍ଦେଶ ମଧ୍ୟ ଦିଆଗଲା ନାହିଁ । ଏଥିରୁ ସ୍ପଷ୍ଟ ଯେ ଯୋଗାଣ ବିଭାଗର ପ୍ରତ୍ୟକ୍ଷ ପ୍ରୋତ୍ସାହନରେ ପରିବହନ ଠିକାଦାର ସାମଗ୍ରୀ ବାଟମାରଣା କରୁଛି । ଏବଂ ଏହି ବାଟମାରଣା ସାମଗ୍ରୀ କଳାବଜାର କରି ଆୟ ଅର୍ଥର ଏକ ସିଂହ ଭାଗ ସିଏମସିର କାର୍ଯ୍ୟରତ ଯୋଗାଣ ଅଧିକାରୀ ଓ ସହଯୋଗୀ ମାନେ ନେଉଥିବା ସଂଘ ଅଭିଯୋଗ କରିବା ସହ କଟକ ଜିଲ୍ଲାପାଳ ଏହା ଉପରେ ବିଧିବଦ୍ଧ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଶ୍ରୀ ହୁସେନ ଦୃଢ଼ ଦାବି କରିଛନ୍ତି ।