ମୋଦୀଙ୍କ ଗସ୍ତକୁ ନବନିର୍ମାଣ କୃଷକ ସଂଗଠନର ବିରୋଧ : ବର୍ଷ ଏକ, ବିଫଳତା ଅନେକ

ଭୁବନେଶ୍ୱର(ଏନ୍‌.ଏମ୍‌.): ମୋହନ ମାଝୀ ସରକାରର ଏକ ବର୍ଷ ପୂର୍ତ୍ତି ଉତ୍ସବକୁ ଆସିଥିବା ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତକୁ ବିରୋଧ କରିଛି ନବନିର୍ମାଣ କୃଷକ ସଂଗଠନ। ମୋଦୀ ମୋହନଙ୍କ ମିଛ ସଫଳତାର ପ୍ରଚାରକୁ ଆସିଛନ୍ତି ବୋଲି ଅଭିଯୋଗ କରିଛି ନବନିର୍ମାଣ ସଂଗଠନ। ଏହି ଉପଲକ୍ଷେ ମାଷ୍ଟର କ୍ୟାଣ୍ଟିନ ରେଳ ଷ୍ଟେସନରୁ ଏକ ଶୋଭାଯାତ୍ରାରେ ବାହାରିଥିଲେ ନବନିର୍ମାଣ କୃଷକ ସଂଗଠନ କର୍ମକର୍ତ୍ତାମାନେ। ମୋହନ ମାଝୀ ଆମ୍ବ ଦେବା କଥା କହି, ଆମ୍ବଡ଼ା ଧରାଇ ଦେଲେ, ମାଗଣା ୩୦୦ ୟୁନିଟ୍ ବିଜୁଳି କୁଆଡ଼େ ଗଲା, ବାର୍ଦ୍ଧକ୍ୟ ଭତ୍ତା ୬୦ ବର୍ଷରୁ ୩,୫୦୦ କୁଆଡ଼େ ଗଲା, ୨୩ଟି ଫସଲର ଏମ୍.ଏସ୍.ପି ବିଜେପି ସରକାର କେଉଁ ଦିନ ଦେବେ, ଧାନରେ କଟନୀ ଛଟନୀ ୫ କେଜିରୁ ୨୫ କେଜି ପର୍ଯ୍ୟନ୍ତ କଣ ପାଇଁ, ସୁଭଦ୍ରା ଭତ୍ତା ୫୦,୦୦୦ ଜାଗାରେ ୫,୦୦୦ ଟଙ୍କା କଣ ପାଇଁ, ବର୍ଷକ ଭିତରେ କେତେ ଜମିକୁ ଜଳସେଚନ କରିଛ, ଶୀତଳଭଣ୍ଡାର ଗୋଟିଏ ହେଇପାରିଲାନି କାହିଁକି, ଚିଟ୍ ଫଣ୍ଡ ପଇସା ଫେରାଇବା କୁଆଡ଼େ ଗଲା, ନାରୀ ମାନଙ୍କର ସୁରକ୍ଷା କୁଆଡ଼େ ଗଲା, ଓଡ଼ିଆମାନଙ୍କ ସ୍ଥାୟୀ ରୋଜଗାର କୁଆଡ଼େ ଗଲା ବୋଲି ସ୍ଲୋଗାନ ମାନ ଦେଇଥିଲେ। ଲୋୟର ପିଏମଜିରେ ଏକ ସାଧାରଣ ସଭାରେ ସରକାରଙ୍କ ଉପରେ ବର୍ଷିଥିଲେ। ସାଧାରଣ ସଭାରେ ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର, କେନ୍ଦ୍ର ସରକାରକୁ ସମାଲୋଚନା କରି କହିଥିଲେ ଯେ, ଓଡ଼ିଶାର ୨୦ ଜଣ ସାଂସଦରେ ସରକାର ତିଆରି ହୋଇଛି, କିନ୍ତୁ ଓଡ଼ିଶାକୁ ସେଭଳି ଗୁରୁତ୍ବ ନାହିଁ। ରାଜ୍ୟରେ କେବଳ ମିଛ ପ୍ରଚାର ଓ ପ୍ରସାରରେ ସରକାର ଚଳେଇବା ପାଇଁ ଉଦ୍ୟମ କରୁଛି ବିଜେପି ସରକାର ବୋଲି ସଂଗଠନ ପକ୍ଷରୁ ଅଭିଯୋଗ କରାଯାଇଥିଲା। ଏଭଳି କାର୍ଯ୍ୟଧାରକୁ ନବନିର୍ମାଣ ବିରୋଧ କରୁଛି ଓ ଆଗକୁ ମଧ୍ୟ ଜୋରଦାର୍ ବିରୋଧ କରିବ। ରାଜ୍ୟ ସଂଯୋଜକ ଶେଷଦେବ ନନ୍ଦ କହିଥିଲେ, ପୁରୁଣା ସରକାର ବଦଳିଲା ପରେ ନୂଆ ସରକାରରେ ବ୍ୟବସ୍ଥାର ପରିବର୍ତ୍ତନ ହେଉନାହିଁ। ବର୍ଷକ ଭିତରେ ଅଫିସର ରାଜ୍ ମୁଣ୍ଡ ଟେକିଛି। ବାଲି, ଖଣି, ଜଳ, ଜଙ୍ଗଲ ଲୁଟ୍ ଉପରେ ଅଙ୍କୁଶ ଲାଗିନାହିଁ। କେବଳ ନୂଆ ମନ୍ତ୍ରୀ ମଣ୍ଡଳ ହୋଇଛି। କିନ୍ତୁ ଓଡ଼ିଶାର ନବକଳେବର ହେବା ପାଇଁ ସେଭଳି ଉଦ୍ୟମ ହୋଇନାହିଁ। କାର୍ଯ୍ୟକ୍ରମରେ ସଂଗଠନର ସହସଂଯୋଜକ ଉମାକାନ୍ତ ଭାରତ, ରଶ୍ମୀ ରଂଜନ ସ୍ବାଇଁ, ଉପଦେଷ୍ଟା ଡା. କୁଳମଣୀ ଶୋଭାଯାତ୍ରାର ନେତୃତ୍ବ ନେଇଥିଲେ। ଯୁବଛାତ୍ର ସଂଗଠନ ରାଜ୍ୟ ସଂଯୋଜକ ମନଓ୍ବର ଅଲ୍ଲୀ ଓଡ଼ିଶାର ବିକାଶରେ ଯୁବକମାନଙ୍କ ଭାଗୀଦାରୀତା ଏବଂ ରୋଜଗାର ନେଇ ମୋଦୀଙ୍କ ୫୬ ଇଞ୍ଚି ଛାତି କଣ କରୁଛି ବୋଲି ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଶ୍ନ ରଖିଥିଲେ। ସାରା ରାଜ୍ୟର ଜିଲ୍ଲାରୁ ଆସିଥିବା ପାଖାପାଖି ୨୦୦ କୃଷକ, ଯୁବକ, ସଂଗଠନ କର୍ମକର୍ତ୍ତାଙ୍କୁ ପୋଲିସ ଗିରଫ କରି ବାସୁଦେବ ରିସୋର୍ଟରେ ଅଟକ ରଖିଥିଲା। ଆଜିର ଶୋଭାଯାତ୍ରା ରାଜ୍ୟ ନେତୃମଣ୍ଡଳୀ ମଧ୍ୟରେ ଅଶ୍ବିନୀ ଜେନା, ଦୀନେଶ ଦାସ, ରଣଜିତ୍ ପଟ୍ଟନାୟକ, ପ୍ରହଲ୍ଲାଦ ସାହୁ, ବିଳାସୀନ ମହାନ୍ତ, ଶ୍ୟାମ ମହାନ୍ତ, କୃଷ୍ଣ ଚନ୍ଦ୍ର ବେହେରା, ମହେଶ୍ବର ଜେନା, କଳ୍ପନା ମୁଣ୍ଡାରୀ, ଜୟନ୍ତ ତ୍ରିପାଠୀ, ସତ୍ୟ ନାୟକ, ଲିଙ୍ଗରାଜ ପ୍ରଧାନ, ଶେଷଦେବ ମଶ୍ରା, ରଘୁନାଥ ନାୟକ, ଯାଜ୍ଞସେନୀ ମହାନ୍ତ, କୈଶଲ୍ୟା ମହାନ୍ତ, ଅଶୋକ ସ୍ବାଇଁ, ପ୍ରସନ୍ନ ପ୍ରଧାନ, କାଶୀନାଥ ସ୍ବାଇଁ, ବାସନ୍ତୀ ସ୍ବାଇଁ, ଦେବବ୍ରତ ସାହୁ ପ୍ରମୁଖ ଯୋଗଦେଇଥିଲେ।