ମା’ଶ୍ୟାମାକାଳୀଙ୍କର ବାର୍ଷିକ ମହୋତ୍ସବ ଓ ଦ୍ୱାଦଶତମ ଅଖଣ୍ଡ ଭଜନ ସମରୋହ କାର୍ଯ୍ୟକ୍ରମ ନେଇ ପ୍ରସ୍ତୁତି ବୈଠକ

#କଟକ(ଏନ୍‌.ଏମ୍‌.): ମାଳିକା ବର୍ଦ୍ଧିତ କଟକ ଶିଖରପୁର ସ୍ଥିତ କାଳିଆବୁଦାରେ ପୂଜା ପାଉଥିବା ଶ୍ରୀଶ୍ରୀ ମା’ ଶ୍ୟାମାକାଳୀଙ୍କର ବାର୍ଷିକ ମହୋତ୍ସବ ପାଳନ ନେଇ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଆସନ୍ତା ୧୨ତାରିଖ(ରବିବାର) ଦିନ ଠାରୁ ୧୪ ତାରିଖ ପର୍ଯ୍ୟନ୍ତ ୩ଦିନ ଧରି ମା’ଙ୍କ ପୀଠରେ ବରିଷ୍ଠ ପଣ୍ଡିତ ଓ ମା’ଶ୍ୟାମାକାଳୀଙ୍କ ମୂଖ୍ୟପୂଜକଙ୍କ ଦ୍ୱାରା ହୋମଯଜ୍ଞ, ପୂଜାର୍ଚ୍ଚନା କରାଯିବ । ଏଥି ସହିତ ବାର୍ଷିକ ମହୋତ୍ସବ ଉପଲକ୍ଷେ ମନ୍ଦିର ପରିଚାଳନା କମିଟି ତରଫରୁ ପ୍ରତିବର୍ଷ ଭଳି ଚଳିତବର୍ଷ ଦ୍ୱାଦଶତମ ଅଖଣ୍ଡ ଭଜନ ସମାରୋହ ଅନୁଷ୍ଠିତ ହେବ । ଏହି ଭଜନ ସମାରୋହରେ ଓଡ଼ିଶାର ବିଶିଷ୍ଟ କଣ୍ଠଶିଳ୍ପୀ ଯୋଗଦେଇ ସଂଗୀତ ପରିବେଷଣ କରାଯିବାର କାର୍ଯ୍ୟକ୍ରମ ରହିଛି । ଏଥି ସହିତ ରବିବାର ଦିନ ପ୍ରାତଃ ୭ଟାରୁ ରାତ୍ର ୧୦ଘଟିକା ପର୍ଯ୍ୟନ୍ତ ଅଖଣ୍ଡ ଭଜନ ସମାରୋହ ଅନୁଷ୍ଠିତ ହେବ । ଉକ୍ତଦିନ ଅପରାହ୍ନ ୧୨ଟା ସମୟରେ ୧୦ହଜାର ଭକ୍ତଙ୍କ ପାଇଁ ମା’ଙ୍କ ପ୍ରସାଦସେବନ କାର୍ଯ୍ୟକ୍ରମ ରହିଛି । ଏହି କାର୍ଯ୍ୟକ୍ରମରେ ରାଜ୍ୟ ତଥା ରାଜ୍ୟ ବାହାରୁ ମା’ଙ୍କ ଭକ୍ତ ଯୋଗଦେଇ ପ୍ରସାଦସେବନ କରିବା ସହ ମା’ଙ୍କ ଆର୍ଶୀବାଦ ଲାଭ କରିବେ । ସେହିଭଳି ସୋମବାର ଦିନ ସନ୍ଧ୍ୟା ୬ଟାରୁ ରାତ୍ର ୧୦ଟା ପର୍ଯ୍ୟନ୍ତ ଓଡ଼ିଶାର ବିଶିଷ୍ଟ କଣ୍ଠଶିଳ୍ପୀ ଏବଂ ନୃତ୍ୟଶିଳ୍ପୀଙ୍କ ଦ୍ୱାରା ଓଡିଶୀ ଓ ଭଜନ ନୃତ୍ୟ ପରିବେଷଣ କରାଯିବାର କାର୍ଯ୍ୟକ୍ରମ ରହିଛି । ମଙ୍ଗଳବାର ସନ୍ଧ୍ୟା ୬ ଟା ଠାରୁ ରାତ୍ର ୧୦ଘଟିକା ପର୍ଯ୍ୟନ୍ତ ବାଇଶି ଦିଗଭାଗ ସଂକୀର୍ତ୍ତନ ମଣ୍ଡଳୀଙ୍କ ଦ୍ୱାରା ସଂକୀର୍ତ୍ତନ ପରିବେଷଣ କରାଯିବାର କାର୍ଯ୍ୟକ୍ରମ ରହିଛି । ତେବେ ମା’ଶ୍ୟାମାକାଳୀଙ୍କ ବାର୍ଷିକ ମହୋତ୍ସବର ୩ଦିନ ଧରି କାର୍ଯ୍ୟକ୍ରମରେ ସମସ୍ତ ଭକ୍ତଙ୍କୁ ଯୋଗଦେବା ପାଇଁ ପରିଚାଳନା କମିଟିର ସମ୍ପାଦକ ତଥା ବିଶିଷ୍ଟ ସମାଜସେବୀ ଅଶୋକ କୁମାର ମହାନ୍ତି ନିବେଦନ କରିଛନ୍ତି । ଏହି କାର୍ଯ୍ୟକ୍ରମରେ ଓଡ଼ିଶାର ଅନେକ ଜନପ୍ରତିନିଧି, ପ୍ରଶାସନିକ ଅଧିକାରୀ, ପୂଜାକମିଟି, ମନ୍ଦିର ପରିଚାଳନା କମିଟି ସଭ୍ୟବୃନ୍ଦ, ଯୁବକସଂଘ ବୃନ୍ଦ, ସ୍ଥାନୀୟ ଅଞ୍ଚଳର ଗ୍ରାମବାସୀ ବୃନ୍ଦ ଯୋଗଦାନ କରିବେ ସେ ନେଇ ପରିଚାଳନା କମିଟି ସଭାପତି ସରୋଜ କୁମାର ମହାନ୍ତି ପ୍ରକାଶ କରିଛନ୍ତି । ଦ୍ୱାଦଶ ତମ ଅଖଣ୍ଡ ଭଜନ ସମାରୋହ ଦିନ ପ୍ରଦୀପ ପ୍ରଜ୍ଜଳନ ଏବଂ ମଞ୍ଚ ଉଦ୍ଘାଟନ କାର୍ଯ୍ୟକ୍ରମରେ ମନ୍ଦିର ପରିଚାଳନା କମିଟି ସଭାପତି ଶ୍ରୀ ମହାନ୍ତି, ସମ୍ପାଦକ ଶ୍ରୀ ମହାନ୍ତି, ଶ୍ରୀଶ୍ରୀ ରାଧାମାଧବ ଜୀଉମନ୍ଦିର ସଭାପତି ଶୁକଦେବ ମହାନ୍ତି, ଶିଖରପୁର-ଗଣ୍ଡରପୁର-ମହାନଦୀ ବିହାର ପୂଜାକମିଟି ସଭାପତି ଜୟନ୍ତ କୁମାର ପ୍ରଧାନ, ସମ୍ପାଦକ ବିଷ୍ଣୁ ଚରଣ ନାୟକ, ଉପଦେଷ୍ଟା ଇଶାନ କୁମାର ମହାନ୍ତି, କାଳିଆବୁଦା ଗୁରୁକ୍ଷେତ୍ରର ହାଡିବନ୍ଧୁ ଦାସ ଅତିଥି ରୂପେ ଯୋଗଦେବାର କାର୍ଯ୍ୟକ୍ରମ ରହିଛି । ଏହି ପ୍ରସ୍ତୁତି ବୈଠକରେ ଅନ୍ୟମାନଙ୍କ ମଧ୍ୟରେ ଲକ୍ଷ୍ମୀଧର ମହାନ୍ତି, ଫକୀର ଚରଣ ବରାଳ, ଶରତଚନ୍ଦ୍ର ପ୍ରଧାନ, ଗଣେଶ ଚନ୍ଦ୍ର ରାଉତ, ଜିତେନ୍ଦ୍ର ସାହୁ ପ୍ରମୁଖ ଉପସ୍ଥିତ ଥିଲେ ।