ମହୋତ୍ସବ କମିଟିର ପ୍ରସ୍ତୁତି ବୈଠକ: ୨୫ରେ ପାଳନ ହେବ କନ୍ଦରାସୁର ପୋଡ଼ି
କଟକ(ଏନ୍.ଏମ୍.): ରାଣୀହାଟସ୍ଥିତ କନ୍ଦରାସୁର ପୋଡି କମିଟିର ଏକ ପ୍ରସ୍ତୁତି ବୈଠକ ସ୍ଥାନୀୟ ବଳଦେବଜୀଉ ମନ୍ଦିର ପ୍ରାଙ୍ଗଣରେ ନୋଟାରୀ ନେପାଳ ସାମନ୍ତଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଆସନ୍ତା ୨୫ ତାରିଖରେ ସ୍ଥାନୀୟ ନୂଆବଜାରସ୍ଥିତ ନେତାଜୀ ପଡିଆରେ କନ୍ଦରାସୁର ପୋଡି ଉତ୍ସବ ସମାପନ ହେବ ବୋଲି ବୈଠକରେ ନିଷ୍ପତି ନିଆଯାଇଥିଲା । ଏଥିପାଇଁ ମହାପ୍ରଭୁ ବଳରାମଙ୍କର ଏକ ଶୋଭାଯାତ୍ରା ରାଣୀହାଟ ବଳଦେବଜୀଉ ମନ୍ଦିରରୁ ଅପରାହ୍ନ ୪ଟାରେ ବାହାରିବ । ଏଥିରେ କୀର୍ତ୍ତନ ମଣ୍ଡଳୀ, ସମସ୍ତ ପୂଜା କମିଟି ଓ ସ୍ୱେଚ୍ଛାସେବୀ ଅନୁଷ୍ଠାନମାନଙ୍କ ସହଯୋଗ ପାଇଁ ନିବେଦନ କରାଯାଇଛି । ସମସ୍ତ ପୂଜା କମିଟି, ମହିଳା ସମିତି ଓ ଯୁବକ ସଂଘ ପକ୍ଷରୁ ଶଙ୍ଖ, ହୁଳହୁଳି ଓ ପୁଷ୍ପ ପକାଇବା ପାଇଁ ବୈଠକରେ ଉପସ୍ଥିତ କର୍ମକର୍ତ୍ତାମାନେ ନିବେଦନ କରିଛନ୍ତି । ଶୋଭାଯାତ୍ରା ସହର ପରିକ୍ରମା କରି ନେତାଜୀ ପଡିଆରେ ପହଞ୍ଚିବା ପରେ ସନ୍ଧ୍ୟାରେ ‘କନ୍ଦରାସୁର ବଧ’ ନାଟକ ପରିବେଷଣ କରାଯିବ । ଏହି ଅବସରରେ ଏକ ସମ୍ବର୍ଦ୍ଧନା କାର୍ଯ୍ୟକ୍ରମ ଆୟୋଜନ କରାଯାଇଛି । ଶେଷରେ କନ୍ଦରାସୁର ପୋଡି ଉତ୍ସବ ଅନୁଷ୍ଠିତ ହେବା ସହିତ ଅଗ୍ନିଉତ୍ସବ ଅନୁଷ୍ଠିତ ହେବ ବୋଲି ଆଇନଜୀବୀ ମହେନ୍ଦ୍ର କୁମାର ମହାପାତ୍ର, ଜଗନ୍ନାଥ ମହାନ୍ତି, ମନୋଜ କୁମାର ଦାଶ, ଦୁର୍ଯ୍ୟୋଧନ ସାହୁ, ଦେବାଶିଷ ରଥ, ସଂଜୀବ ବିଶ୍ୱାଳ, ଗୁରୁପ୍ରସାଦ ପଣ୍ଡା, ଶଶଧର ପୃଷ୍ଟି ଓ ବିକ୍ରମ କୁମାର ବାରିକ ପ୍ରମୁଖ ସୂଚନା ଦେଇଛନ୍ତି । ଉକ୍ତ ବୈଠକ ରାଣୀହାଟ ବଳଦେବଜୀଉ ଟ୍ରଷ୍ଟର ମୁଖ୍ୟ ବିଜୟ କୁମାର ସାହୁ, ମନୋଜ ସାହୁ, ବସନ୍ତ ସାହୁ ଓ ଭାଗିରଥି ସାହୁ ପ୍ରମୁଖଙ୍କ ସହଯୋଗରେ ସମାପନ ହୋଇଥିଲା ।