ମହାନଦୀରେ ଗୋଡ଼ ଖସି ଯୁବକ ନିଖୋଜ
#ଆଠଗଡ଼(ଏନ୍.ଏମ୍.): କଟକ ଜିଲ୍ଲାର ବାଙ୍କୀ ଥାନା ଅନ୍ତର୍ଗତ ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ଦେବୀଦ୍ୱାର ବୁଲିବାକୁ ଆସି ମହାନଦୀରେ ଗାଧୋଇବା ବେଳେ ସ୍ରୋତପାଣିରେ ଗୋଡ଼ ଖସି ଯିବାରୁ ଜଣେ ଯୁବକ ନିଖୋଜ ହୋଇ ଯାଇଛନ୍ତି । ଖବର ପାଇ ଘଟଣା ସ୍ଥଳରେ ପାଣିରେ ଭାସି ଯାଇଥିବା ନିଖୋଜ ଯୁବକଙ୍କ ବାପା ମା ପହଞ୍ଚିବା ସହ କାନ୍ଦି ବୋବାଇ ପୁଅକୁ ଝୁରି ହେଉଛନ୍ତି । ତେବେ ପ୍ରାପ୍ତ ସୂଚନା ଅନୁଯାୟୀ ନିଖୋଜ ଯୁବକଙ୍କ ନାମ ଆକାଶ ରାଉତରାୟ ଏବଂ ଘର ଖୋର୍ଦ୍ଧା ଜିଲ୍ଲାର ନିରାକାରପୁର ବୋଲି ଜଣାପଡ଼ିଛି । ସୂଚନା ଥାଉକି ଖୋର୍ଦ୍ଧା ଜିଲ୍ଲା ନିରାକାରପୁର ଅଞ୍ଚଳର ଅରୁଣ କୁମାର ରାୟତରାୟଙ୍କ ୨ ପୁଅ ନିକଟସ୍ଥ ଖଣ୍ଡଗିରି ବୁଲିବାକୁ ଯାଉଥିବା କହି କହି ଘରୁ ବାହାରି ଥିଲେ । ତେବେ ସେମାନେ ଖଣ୍ଡଗିରି ବୁଲିବାକୁ ନ ଯାଇ ବାଙ୍କୀ ଦେବୀଦ୍ୱାରକୁ ଚାଲିଆସିଥିଲେ । ଏଠି ମହାନଦୀରେ ଗାଧୋଇବା ବେଳେ ସ୍ରୋତ ପାଣିରେ ଜଣଙ୍କର ଗୋଡ଼ ଖସି ଭାସି ଯାଇଥିବା ବେଳେ ଅନ୍ୟ ଜଣକ ଅଳ୍ପକେ ବର୍ତ୍ତି ଯାଇଥିବା ଜଣାପଡ଼ିଛି । ତେବେ ତାଙ୍କୁ ଅଗ୍ନିଶମ ବିଭାଗ ଓ ଓଡ଼୍ରାଫ ଟିମର କର୍ମଚାରୀମାନେ ଖୋଜାଖୋଜି ଚଳାଇଥିଲେ ମଧ୍ୟ କୌଣସି ପତ୍ତା ମିଳିପାରିନାହିଁ ।