ମଙ୍ଗୁଳି ଛକରେ କାର ଦୁର୍ଘଟଣା: ଚଳଚ୍ଚିତ୍ର ନିର୍ଦ୍ଦେଶକ ସୁଧାକର ବସନ୍ତ ଗୁରୁତର

#ଚୌଦ୍ୱାର(ଏନ୍‌.ଏମ୍‌.): କଟକ ଜିଲ୍ଲା ଚୌଦ୍ୱାର ମଙ୍ଗୁଳି ଛକ ନିକଟରେ ଆଜି ଭୋରୁ ଭୋରୁ ଏକ ସଡକ ଦୁର୍ଘଟଣା ଘଟିବା ଫଳରେ ଓଡ଼ିଆ ଚଳଚ୍ଚିତ୍ର ଜଗତର ଜଣାଶୁଣା ନିର୍ଦ୍ଦେଶକ ସୁଧାକର ବସନ୍ତ ଗୁରୁତର ଆହତ ହୋଇଛନ୍ତି । ପ୍ରାପ୍ତ ସୂଚନା ଅନୁଯାୟୀ, ଗତକାଲି ଶ୍ରୀ ବସନ୍ତ ଏକ ଫିଲ୍ମ କାମ ସାରି ବାରିପଦାରୁ ନିଜ କାର ଯୋଗେ ଭୁବନେଶ୍ୱର ଫେରୁଥିବା ସମୟରେ ମଙ୍ଗୁଳି ଛକ ନିକଟରେ ତାଙ୍କ କାର ଦୁର୍ଘଟଣାଗ୍ରସ୍ତ ହୋଇଥିଲା । ରାତିରେ ସେ ଭୁବନେଶ୍ୱର ଫେରିବା ସମୟରେ ବିଳମ୍ବିତ ରାତି ଅର୍ଥାତ୍ ରାତି ୩ ଟାରେ ଚୌଦ୍ୱାର ମଙ୍ଗୁଳି ନିକଟରେ ଛିଡ଼ା ହୋଇଥିବା ଏକ ୧୬ ଚକିଆ ଟ୍ରକର ପଛପଟୁ ତାଙ୍କ କାର ଧକ୍କା ଦେଇଥିଲା । ଏହି ଦୁର୍ଘଟଣାରେ ତାଙ୍କ କାରଟି ସମ୍ପୂର୍ଣ୍ଣ ଭାବେ ଭାଙ୍ଗି ଚୂର୍‌ମାର ହୋଇ ଯାଇଥିଲା । ଏହି କାରରେ ଡ୍ରାଇଭରକୁ ମିଶାଇ ୩ ଜଣ ଭୁବନେଶ୍ୱର ଫେରୁଥିବାବେଳେ ଦୁର୍ଘଟଣା ଘଟିଥିଲା । ଏପରିକି କାରକୁ କାଟି ୩ଜଣଙ୍କୁ ଉଦ୍ଧାର କରାଯାଇଥିଲା । ପରେ ତେବେ ସେମାନଙ୍କ ଭିତରୁ ଫିଲ୍ମ୍ ନିର୍ଦ୍ଦେଶକ ସୁଧାକର ବସନ୍ତ ଅଧିକ ଗୁରୁତର ହୋଇପଡ଼ିଥିଲେ । ଭୋରୁ ଭୋରୁ ଦୁର୍ଘଟଣା ଘଟିଥିବା ସ୍ଥାନୀୟ ଲୋକ ମାନେ ଦେଖି ସ୍ଥାନୀୟ ଥାନାକୁ ଖବର ଦେଇଥିଲେ । ଖବର ପାଇ ଚୌଦ୍ୱାର ଅଗ୍ନିଶମ ବିଭାଗକୁ ଖବର ଦେଇଥିଲେ । ଅଗ୍ନିଶମ୍ କର୍ମଚାରୀ ଘଟଣାସ୍ଥଳରେ ପହଞ୍ଚି ଗ୍ୟାସକଟର ଯୋଗେ କାରକୁ କାଟି ୩ଜଣଙ୍କୁ ଉଦ୍ଧାର କରିବା ସହ ଆମ୍ବୁଲାନ୍ସ ଯୋଗେ ତୁରନ୍ତ କଟକ ବଡ଼ ଡ଼ାକ୍ତରଖାନାକୁ ପଠାଇଥିଲେ । ରାସ୍ତାରେ ଘନ କୁହୁଡ଼ି ଯୋଗୁଁ ଏହି ଦୁର୍ଘଟଣା ଘଟିଥିବା ଅନୁମାନ କରାଯାଉଛି ।