ଭଦ୍ରକ ଜବାହର ନବୋଦୟ ବିଦ୍ୟାଳୟରେ ସ୍ୱଚ୍ଛଭାରତ ଅଭିଯାନର ନବମ ବର୍ଷର ପୂର୍ତ୍ତି ପାଳନ

#ଭଦ୍ରକ(ଏନ୍‌.ଏମ୍‌.): ଦେଶରେ ସୁସ୍ଥ ବାତାବରଣ ପାଇଁ ସ୍ୱଚ୍ଛତାର ଆବଶ୍ୟକ । ଜାତିର ଜନକ ମହାତ୍ମାଗାନ୍ଧୀଙ୍କ ସ୍ୱଚ୍ଛତାକୁ ଆଉ ପାଦେ ଆଗକୁ ନେଇ ୨୦୧୪ ମସିହା ଅକ୍ଟୋବର ୨ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ‘ସ୍ୱଚ୍ଛ ଭାରତ ଅଭିଯାନ’ର ଉଦ୍‌ଘାଟନ ହୋଇଥିଲା । ତେଣୁ ଚଳିତ ବର୍ଷ ସ୍ୱଚ୍ଛଭାରତ ଅଭିଯାନର ନବମ ବର୍ଷର ପୂର୍ତ୍ତି ଅବସରରେ ୭୫ତମ ଆଜାଦୀକା ଅମୃତ ମହୋତ୍ସବକୁ ଆଧାର କରି କେନ୍ଦ୍ର ସରକାର ଗାନ୍ଧୀଜୟନ୍ତୀ ପୂର୍ବଦିନ ୧ଘଣ୍ଟା ଶ୍ରମଦାନ ପୂର୍ବକ ସ୍ୱଚ୍ଛତା କାର୍ଯ୍ୟକ୍ରମ ପାଇଁ ଆହ୍ୱାନ ଦେଇଥିଲେ । ଏହି ଅବସରରେ ଭଦ୍ରକ ଜିଲ୍ଲା ଜବାହର ନବୋଦୟ ବିଦ୍ୟାଳୟ, ଚାନ୍ଦିମାଳ ପରିସରରେ ପ୍ରଧାନ ଆଚାର୍ଯ୍ୟ ଡ. ବିଶ୍ୱନାଥ ଖିଲାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସ୍ଥାନୀୟ ଲୋକପ୍ରତିନିଧି, ସ୍ଥାନୀୟ ବଜାର ପରିଚାଳନା କମିଟି ସଦସ୍ୟ, ସମସ୍ତ ବିଦ୍ୟାଳୟ ପରିବାର, ଅଭିଭାବିକା ଅଭିଭାବକଙ୍କ ଉପସ୍ଥିତିରେ ଛାତ୍ରୀଛାତ୍ରଙ୍କ ଦେଶ ବନ୍ଦନା ତଥା ସ୍ୱଚ୍ଛତା ଉପରେ ସ୍ଳୋଗାନର ତାଳେ ବହୁ ପ୍ରତୀକ୍ଷିତ ‘ଅମୃତ କଳସ ଯାତ୍ରା’ ଓ ‘ସ୍ୱଚ୍ଛତା ହିଁ ସେବା’ର ଶୁଭାରମ୍ଭ ହୋଇଥିଲା । ବିଦ୍ୟାଳୟ ଫାଟକରୁ ମୁଖ୍ୟ ବଜାରର ଉପକଣ୍ଠ ପର୍ଯ୍ୟନ୍ତ ପ୍ରାୟ ଦଶ ହଜାର ବର୍ଗଫୁଟ ପରିମିତ ରାସ୍ତାର ସଫେଇ କାର୍ଯ୍ୟରେ ବିଦ୍ୟାଳୟ ଛାତ୍ରୀଛାତ୍ରଙ୍କ ସୁଶୃଙ୍ଖଳିତ ମନୋଭାବ ଭିତରେ ଦେଶ ପ୍ରେମର ଝଲକ ତଥା ଦାୟିତ୍ୱ ବୋଧ ପ୍ରତି ପ୍ରତିଶ୍ରୁତିବଦ୍ଧତା ଦେଖି ସମସ୍ତ ଅଞ୍ଚଳବାସୀ ଆଶ୍ଚର୍ଯ୍ୟାଭିଭୂତ ହୋଇ ପଡ଼ିଥିଲେ । କାର୍ଯ୍ୟକ୍ରମରେ ଆମନ୍ତ୍ରିତ ଅତିଥିଗଣ ଗହଣରେ ମୁଖ୍ୟଅତିଥି ଭାବେ ସ୍ଥାନୀୟ ସାନକୃଷ୍ଣପୁର ସରପଞ୍ଚ ସସ୍ମିତା ନାୟକଙ୍କ ଉପସ୍ଥିତିରେ ଜାତୀୟ ପତାକା ଉତ୍ତୋଳନ, ଜାତୀୟ ସଂଗୀତ ଗାନ ସମାପନ ପରେ ବିଦ୍ୟାଳୟ ଛାତ୍ରୀଙ୍କ ଦ୍ୱାରା ପ୍ରାୟୋଜିତ ଆଦିବାସୀ ନୃତ୍ୟ ବେଶ୍ ଚିତ୍ତାକର୍ଷକ ଥିଲା । ଏହାପରେ ଛାତ୍ରଛାତ୍ରୀଙ୍କ ଦ୍ୱାରା ଏକକ ବାଦ୍ୟ ପରିବେଷଣ, ସ୍ୱଚ୍ଛତା ଓ ଜନ ସଚେତନତା, ଅମୃତ କଳସ ଯାତ୍ରାର ମହତ ଉଦ୍ଦେଶ୍ୟ ତଥା ଇରମ୍ ପୁଣ୍ୟ ରକ୍ତତୀର୍ଥ ଉପରେ ହିନ୍ଦୀ, ଓଡିଆ, ଇଂରାଜୀ, ବଙ୍ଗଳା ଓ ଛତିଶଗଡ଼ି ଭାଷାରେ ପ୍ରଦତ୍ତ ଅଭିଭାଷଣ ଦ୍ୱାରା ସମସ୍ତେ ମୋହିତ ଓ ମନ୍ତ୍ରମୁଗ୍ଧ ହୋଇଥିଲେ ।