ବୋରୱେଲରୁ ଉଦ୍ଧାର ହୋଇଥିବା ବୃଦ୍ଧାଙ୍କ ପରଲୋକ
ସୁବର୍ଣ୍ଣପୁର(ଏନ୍.ଏମ୍.): ୧୮ ଘଣ୍ଟା ଧରି ଜୀବନ ଓ ମରଣ ସହ ସଂଗ୍ରାମ କରି ଉଦ୍ଧାର ହୋଇଥିବା ୮୦ବର୍ଷୀୟ ବୃଦ୍ଧା ଶେଷରେ ଆଖିବୁଜିଛନ୍ତି । ତେବେ ବୋରୱେଲରୁ ଉଦ୍ଧାର ସମୟରେ ସେ ଜୀବିତ ଥିବାବେଳେ ମେଡ଼ିକାଲ ନେବାବେଳେ ବାଟରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ଏପରି ଦୁଃଖଦ ପୂର୍ଣ୍ଣ ଘଟଣା ଘଟିଛି ସୁବର୍ଣ୍ଣପୁର ଜିଲ୍ଲା ସୋନପୁର-ବୁର୍ଡା ରାସ୍ତାର କଇଁଫୁଲ ଗାଁରେ । ମୃତ ବୃଦ୍ଧା ଜଣଙ୍କ ହେଲେ ଦୁଃଖୀ ନାୟକ ବୋଲି ଜଣାପଡ଼ିଛି ।
ସୂଚନା ଅନୁଯାୟୀ, ଗତକାଲି ସଂଧ୍ୟା ୫ଟା ସମୟରେ ବୃଦ୍ଧା ଜଣଙ୍କ ୨୦ ଫୁଟର ପରିତ୍ୟକ୍ତ ବୋରୱେଲ ଗାତରେ ଖସିପଡ଼ିଥିଲେ । ବୃଦ୍ଧା ଜଣଙ୍କ ଝିଅ ଘରୁ ନିଜ ଘରକୁ ଫେରୁଥିଲା ବେଳେ ବୋରୱେଲ ଗାତରେ ଖସି ପଡ଼ିଥିଲେ । ଅଗ୍ନିଶମ ବାହିନୀ ଓ ଓଡ୍ରାଫ୍ ଟିମ ସମାନ୍ତରାଳ ଭାବେ ଆଉ ଏକ ଗାତ କରି ବୃଦ୍ଧାଙ୍କୁ ଉଦ୍ଧାର କରିଥିଲେ । ମେଡିକାଲ ଆସିବା ପୂର୍ବରୁ ବୃଦ୍ଧାଙ୍କର ମୃତ୍ୟୁ ଘଟିଥିବା ସୋନପୁର ମେଡିକାଲ ଡାକ୍ତର ସୋମି ପୁରୋହିତ ସୂଚନା ଦେଇଛନ୍ତି । ଅନ୍ୟ ପକ୍ଷରେ ସୁବର୍ଣ୍ଣପୁର ଏସପି ଅମରେଶ ପଣ୍ଡା କହିଛନ୍ତି ଯେ, ବୃଦ୍ଧାଙ୍କୁ ବୋରୱେଲରୁ ଉଦ୍ଧାର କରିବା ପରେ ଜୀବିତ ଥିଲେ । ଡାକ୍ତରଖାନାକୁ ଆମ୍ବୁଲାନ୍ସ ନେବାବେଳେ ତାଙ୍କ ଅବସ୍ଥା ଗୁରୁତର ହୋଇପଡ଼ିଥିଲା । ସେଥିପାଇଁ ବାଟରେ ଅକ୍ସିଜେନ ଦିଆଯାଇଥିଲା । ସେ ଆହୁରି କହିଛନ୍ତି, କିଏ ବୋରୱେଲ ଖୋଳି ତାକୁ ଖୋଲା ଛାଡ଼ିଥିଲା ତାହାର ତଦନ୍ତ ହେବ । ତଦନ୍ତ ହୋଇ ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ । ଅନ୍ୟ ପକ୍ଷରେ ବୃଦ୍ଧା ଜଣଙ୍କ ମୁକ ଓ ବଧିର ଥିଲେ ବୋଲି ଜଣାପଡ଼ିଛି ।