ବେଳାମାର୍ଗରୁ ଷ୍ଟ୍ରିଟ୍ ଲାଇଟ ଚୋରି: ଚିଙ୍ଗୁଡ଼ି ଘେରି ଉପରେ ପୁଲିସର ଚଢଉ, ୩ ଅଟକ, ୩ ଫେରାର୍
#କୋଣାର୍କ(ଏନ୍.ଏମ୍.): କୋଣାର୍କ -ପୁରୀ ବେଳାମାର୍ଗର ଚନ୍ଦ୍ରଭାଗା ଠାରୁ ରାମଚଣ୍ଡୀ ମଧ୍ୟରେ ଥିବା ୫୦ଟି ଷ୍ଟ୍ରିଟ୍ ଲାଇଟ୍ ଚୋରି ଘଟଣାର ତଦନ୍ତକରି କୋଣାର୍କ ପୁଲିସ ରାମଚଣ୍ଡୀ ଥାନା ଅନ୍ତର୍ଗତ ବାଙ୍ଗୋର ମୌଜାର କୁଶଭଦ୍ରା ନଦୀ ପଠାରେ ଥିବା କେତେକ ଚିଙ୍ଗୁଡ଼ି ଘେରି ଉପରେ ଚଢ଼ଉ କରାଯାଇଛି । ଚଢ଼ଉ ସମୟରେ ଘଟଣାସ୍ଥଳରୁ ୫ଟି ଷ୍ଟ୍ରିଟ୍ ଲାଇଟ୍ ଜବତ କରିବା ସହିତ ୩ଜଣ ଘେରି ମାଲିକଙ୍କୁ ଉଠାଇ ଆଣି ପଚରାଉଚରା କରିଥିବା ଜଣାପଡିଛି । ଚଢ଼ଉ ସମୟରେ ୩ ଜଣ ଘେରି ମାଲିକ ଘଟଣାସ୍ଥଳରୁ ଫେରାର୍ ହୋଇଯାଇଛନ୍ତି । ଲାଇଟ୍ ଚୋରିରେ ସଂପୃକ୍ତ ଯୁବକମାନଙ୍କ ଠାରୁ ଘେରି ମାଲିକମାନେ ଚୋରି ଲାଇଟ୍ କିଣିଥିବା ପ୍ରକାଶ କରିଛନ୍ତି । ଏହି ଘଟଣାରେ ଚୋରଙ୍କର ଗୋଟିଏ ବଡ଼ ଗୋଷ୍ଠୀ ସଂପୃକ୍ତ ଥିବା ପୁଲିସ ପକ୍ଷରୁ ସୂଚନା ଦିଆଯାଇଛି । ତେବେ ତଦନ୍ତରେ ସମସ୍ୟା ହେବା ଆଶଙ୍କାରେ ପୁଲିସ କାହାରି ନାମ ପ୍ରକାଶ କରିନଥିବା ଜଣାପଡ଼ିଛି । ସୂଚନା ଅନୁଯାୟୀ, ଗୋଟିଏ ଷ୍ଟ୍ରିଟ୍ ଲାଇଟର ମୂଲ୍ୟ ୧୦ହଜାର ଟଙ୍କାରୁ ଅଧିକ ହୋଇଥିବାରୁ କୋଣାର୍କ ଏନ୍ଏସିକୁ ଏହି ଘଟଣାରେ ୫ଲକ୍ଷରୁ ଅଧିକ ଟଙ୍କା କ୍ଷତି ସହିବାକୁ ପଡ଼ିଛି । ଚଢ଼ଉ ସମୟରେ ପୁଲିସ ଫୋର୍ସ ସହିତ କୋଣାର୍କ ଥାନା ଏସ୍ଆଇ ଅଶୋକ କୁମାର ଦାଶ, କୋଣାର୍କ ଏନ୍ଏସି ନିର୍ବାହୀ ଅଧିକାରୀ ସତ୍ୟପ୍ରକାଶ ମିଶ୍ର, ଯନ୍ତ୍ରୀ ଜଗଦୀଶ ନାୟକ ଉପସ୍ଥିତ ଥିଲେ ।