ବିଳମ୍ବିତ ରାତ୍ରିରେ ବୋଲେରୋ ଗାଏବ: ସିସିଟିଭିରେ କଏଦ ହୋଇଛି ଚୋରିର ଦୃଶ୍ୟ

#ଜଗତପୁର(ଏନ୍‍.ଏମ୍‍.): ଜଗତପୁର ଥାନା ଅଧିନ ଭୁବନପୁର ନୂଆସାହିରେଅଞ୍ଚଳରେ ଏକ ବୋଲେରୋ ଗାଡ଼ି ଚୋରି ହୋଇଯିବା ଅଞ୍ଚଳବାସୀଙ୍କୁ ଚକିତ କରିଛି । ପୂର୍ବରୁ ଜଗତପୁର ଅଞ୍ଚଳରେ ଚୋରି, ଛିନତାଇ, ଲୁଟ ଆଦି ଅପରାଧିକ କାର୍ଯ୍ୟ ଜାରି ରହିଥିବାବେଳେ ସମ୍ପ୍ରତି ଘର ସମ୍ମୁଖରୁ ବୋଲେରୋ ଗାଡ଼ି ଚୋରି ହୋଇଯିବା ଅଞ୍ଚଳବାସୀଙ୍କୁ ଆଶ୍ଚର୍ଯ୍ୟ କରିଛି । ମିଳିଥିବା ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତ୍ରିରେ ଦୁଇ ଜଣ ଦୃବୃତ୍ତ ଏକ ନମ୍ବର ବିହୀନ କାରରେ ଆସି ଏକ ବୋଲେରୋକୁ ଚୋରି କରି ନେଇଛନ୍ତି । ତେବେ ଚୋରି ବେଳର ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି । ଏ ନେଇ ଜଗତପୁର ଥାନାରେ ଅଭିଯୋଗ ହେବା ପରେ ପୁଲିସ ଘଟଣାର ତଦନ୍ତ ଆରମ୍ଭ କରିଛି ।
ସ୍ଥାନୀୟ ଭୁବନପୁର ନୁଆସାହିର ବିଷ୍ଣୁ ଚରଣ ପଣ୍ଡା ପ୍ରତିଦିନ ପରି ତାଙ୍କ ବୋଲେରୋକୁ ରାତି ପ୍ରାୟ ୧୦ଟା ବେଳକୁ ନିଜ ଘର ସମ୍ମୁଖରେ ପାର୍କିଙ୍ଗ କରି ଶୋଇଥିଲେ । ସକାଳୁ ଉଠି ଦେଖିଲା ବେଳକୁ ତାଙ୍କ ବୋଲେରୋଟି ଘର ଆଗରୁ ବୋଲେରୋଟି ଗାଏବ ହୋଇଯାଇଛି । ସେଥିପାଇଁ ତାଙ୍କ ପଡୋଶୀଙ୍କ ସିସିଟିଭି ଯାଞ୍ଚ କରି ଦେଖି ଥିଲେ ଦୁଇ ଜଣ ଦୃବୃତ୍ତ ରାତି ପ୍ରାୟ ସାଢେ ଗୋଟେ ସମୟରେ ଏକ ନମ୍ବର ବିହୀନ କାରରେ ଆସି ତାଙ୍କ ( ଓଡି-୦୫ ଜେ ୨୨୨୧) ନମ୍ବର ବିଶିଷ୍ଟ ବୋଲେରୋ ଥିବା ସ୍ଥାନଠୁ ପ୍ରାୟ ୨୦ଫୁଟ ଦୂରରେ ଠିଆ ହେଲେ । କାରରୁ ଦୁଇ ଜଣ ଯୁବକ ଓହ୍ଲାଇଥିଲେ । ତାଙ୍କ ଭିତରୁ ଜଣେ ଦୃବୃତ୍ତ ବୋଲେରୋ ଗାଡିକୁ ଯାଇଥିବା ବେଳେ ଅନ୍ୟ ଜଣଙ୍କ ରାସ୍ତାକୁ ଜଗି ରହିଥିଲେ । କିଛି ସମୟ ପରେ ବୋଲେରୋଟିକୁ ଷ୍ଟାର୍ଟ କରି ପଛୁଆ ଆଣି ସେଠାରୁ ଚମ୍ପଟ ମାରିବା ସହ ଅନ୍ୟ ଜଣେ କାର ଚଲାଇ ସେଠାରୁ ପଳାଇ ଥିଲେ । ଏ ନେଇ ସେ ଥାନାରେ ଅଭିଯୋଗ କ୍ରମେ ପୁଲିସ ଏକ ମାମଲା (ନଂ୧୫୦/୨୩)ରୁଜୁ କରି ସିସିଟିଭି ଅଧାରରେ ତଦନ୍ତ କରୁଛି । ବହୁତ ଜଲଦି ବୋଲେରୋ ଠାବ ସହ ଆସାମୀ ଧରା ପଡିବେ ବୋଲି ଥାନା ଅଧିକାରୀ ରବୀନ୍ଦ୍ରନାଥ ମେହେର ସୂଚନା ଦେଇଛନ୍ତି ।