ବିଭିନ୍ନ ଦାବି ନେଇ ଆଗକୁ ବଢ଼ିଲା ଓଡ଼ିଶା ରାଜ୍ୟ ପାଇକ ଆଖଡା ମହାସଂଘ: ଡାକରା ଦେଲା ଦିଲ୍ଲୀଚଲୋ
#ଖୋର୍ଦ୍ଧା (ଏନ୍.ଏମ୍.): ରାଜ୍ୟରେ ପାଇକ ମାନଙ୍କ ପ୍ରତି ସରକାର ଓ ପ୍ରଶାସନ ପକ୍ଷରୁ ଅବହେଳା ପ୍ରଦର୍ଶନ କରାଯାଉଥିବା ଅଭିଯୋଗ ହୋଇଛି । ଏଥି ସହିତ ଐତିହାସିକ ପାଇକ ବିଦ୍ରୋହକୁ ଭାରତର ପ୍ରଥମ ସ୍ୱାଧୀନତା ସଂଗ୍ରାମର ମାନ୍ୟତା ସହ ଓଡ଼ିଶା ପାଇକ ରେଜିମେଣ୍ଟ ଗଠନ ଏବଂ ଭାରତର ଶେଷ ସ୍ୱାଧୀନ ଦୁର୍ଗ ଖୋର୍ଦ୍ଧାଗଡ଼ର ପୁନରୁଦ୍ଧାର ପାଇଁ ଓଡ଼ିଶା ରାଜ୍ୟ ପାଇକ ଆଖଡ଼ା ମହାସଂଘ ପକ୍ଷରୁ ଦାବି ହୋଇଛି । ଏ ନେଇ ମୁଖ୍ୟମନ୍ତ୍ରୀଙ୍କ ସମେତ କେନ୍ଦ୍ରମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରାଯାଇଛି । ତେବେ ଏ ନେଇ ସରକାରୀସ୍ତରରେ ବାରମ୍ବାର ଅବହେଳା କରାଯାଉଥିବା ପ୍ରତିବାଦରେ ଆଜି ମହାସଂଘ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ମାଧ୍ୟମରେ ଦୃଢ ଦାବି କରାଯାଇଛି । ଆସନ୍ତା ୧୮ତାରିଖ ବରୁଣେଇ ଠାରେ ବିଶାଳ ପାଇକ ବାହିନୀର ଜନଗର୍ଜନ ସମାବେଶ ସହ ଦିଲ୍ଲୀ ଚଲୋ ଅଭିଯାନର ଶୁଭାରମ୍ଭ ହେବ ବୋଲି ସୂଚନା ଦିଆଯାଇଛି ।
ସୂଚନା ଅନୁଯାୟୀ, ପାଇକମାନଙ୍କ ସ୍ୱାଭିମାନର ସୁରକ୍ଷା ପାଇଁ ରାଜ୍ୟସାରା ଏକ ଜନଜାଗରଣ ପାଇଁ ଶୁଭାରମ୍ଭ ହେବା ପ୍ରସଙ୍ଗରେ ଆୟୋଜିତ ସାମ୍ବାଦିକ ସମ୍ମିଳନୀରେ ରାଜ୍ୟ ପାଇକ ଆଖଡ଼ା ମହାସଂଘ ସଭାପତି ଡକ୍ଟର ପ୍ରକାଶ ଶ୍ରୀଚନ୍ଦନ, ସାଧାରଣ ସମ୍ପାଦକ ଡକ୍ଟର ଦିଲ୍ଲୀପ ଶ୍ରୀଚନ୍ଦନ ଓ ମୁଖ୍ୟ ସଂଯୋଜକ ଆଇନଜୀବୀ ନରେନ୍ଦ୍ର ପୃଷ୍ଟି ଖୋର୍ଦ୍ଧା ତଳସାହି ସ୍ଥିତ ପାର୍ବତୀ କଲ୍ୟାଣ ମଣ୍ଡପ ଠାରେ କହିଛନ୍ତି ଯେ, ପାଇକ ସ୍ମାରକୀ ନିର୍ମାଣ ପାଇଁ ତତ୍କାଳୀନ ମହାମହିମ ରାଷ୍ଟ୍ରପତି ରାମନାଥ କୋବିନ୍ଦ
ତା.୦୮.୧୨.୨୦୧୯ରିଖ ଦିନ ଏକ ଭବ୍ୟ ସମାରୋହରେ ବରୁଣେଇ ପାଦଦେଶରେ ଏଥି ପାଇଁ ଶିଳାନ୍ୟାସ କରିଥିଲେ ମଧ୍ୟ ଏ ପର୍ଯ୍ୟନ୍ତ ତାହା କାର୍ଯ୍ୟକାରୀ ନହେବା ଅତ୍ୟନ୍ତ ଦୁଃଖ ଓ ପରିତାପର ବିଷୟ । ଓଡ଼ିଶାର ଅସ୍ମିତା ଓ ବୀରତ୍ୱ ବ୍ୟଞ୍ଜକ ଇତିହାସର ଏହା ଦର୍ପଣ ସଦୃଶ ହୋଇଥିବାରୁ ରାଜ୍ୟ ପାଇକ ଆଖଡ଼ା ମହାସଂଘ ପକ୍ଷରୁ ଯଥାଶୀଘ୍ର ଏହାକୁ କାର୍ଯ୍ୟକାରୀ କରିବା ପାଇଁ ବହୁବାର ଖୋର୍ଦ୍ଧାର ବରୁଣେଇ ଠାରୁ ରାଜ୍ୟ ରାଜଧାନୀ ଭୁବେନଶ୍ୱର ପର୍ଯ୍ୟନ୍ତ ବିରାଟ ପାଇକ ବାହିନୀ ଜନଗର୍ଜନ ସମାବେଶରେ ଏକତ୍ରିତ ହୋଇ ଦୃଢଦାବିମାନ ଉପସ୍ଥାପନ କରିଥିଲେ । ଯାହାର ଫଳ ସ୍ୱରୂପ କେନ୍ଦ୍ର ସରକାରଙ୍କ ଭାରତୀୟ ତୈଳ ନିଗମ ପକ୍ଷରୁ ୯୦ କୋଟି ଟଙ୍କା ଓ ରାଜ୍ୟ ସରକାରଙ୍କ ପକ୍ଷରୁ ୩୨ କୋଟି ଟଙ୍କା ପ୍ରିମିୟମ ଛାଡ଼ କରି ୯.୫ ଏକର ଜାଗା ପ୍ରଦାନ କରାଯାଇଛି । ତେଣୁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ମହାସଂଘ ପକ୍ଷରୁ ଏଥି ପାଇଁ ବିଜୟ ଉତ୍ସବ ପାଳନ ମାଧ୍ୟମରେ କୃତଜ୍ଞତା ଜ୍ଞାପନ କରାଯାଇଥିଲା । କିନ୍ତୁ ବର୍ତ୍ତମାନ ପର୍ଯ୍ୟନ୍ତ ସେହି ପାଇକ ସ୍ମାରକୀର ନିର୍ମାଣ ଆରମ୍ଭ ନହେବା ଯେତିକି ଦୁଃଖ ଦାୟକ, କେନ୍ଦ୍ର ସରକାର ଓ ରାଜ୍ୟ ସରକାର ମିଳିତ ଭାବରେ ବସି ଏହାକୁ ନିର୍ମାଣ କରିବା ପାଇଁ ଯଥାଶୀଘ୍ର ପଦକ୍ଷେପ ନନେଇ ପରସ୍ପରକୁ ଦୋଷାରୋପ କରି ଓଡ଼ିଶାର ଅସ୍ମିତାକୁ ନେଇ ରାଜନୀତି କରିବା ଅତ୍ୟନ୍ତ ନିନ୍ଦନୀୟ ବୋଲି ମତପ୍ରକାଶ ପାଇଛି । ତେବେ ଯଥାଶୀଘ୍ର ଶୁଭାରମ୍ଭ କରିବା ପାଇଁ ରାଜ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଆଜି ପତ୍ର ମାଧ୍ୟମରେ ଅନୁରୋଧ କରାଯାଇଛି । ସେହିପରି ଏ ପର୍ଯ୍ୟନ୍ତ ପାଇକ ବିଦ୍ରୋହକୁ ଭାରତର ପ୍ରଥମ ସ୍ୱାଧୀନତା ସଂଗ୍ରାମର ମାନ୍ୟତା ପ୍ରଦାନ କରା ନଯିବା, ଓଡ଼ିଶା ପାଇକ ରେଜିମେଣ୍ଟ ଗଠନ ନହେବା, ସର୍ବୋପରି ସମଗ୍ର ଭାରତ ବର୍ଷର ଅସ୍ମିତାର ପ୍ରତୀକ ଭାରତର ଶେଷ ସ୍ୱାଧୀନ ଦୁର୍ଗ ଓ ପ୍ରଥମ ସ୍ୱାଧୀନତା ସଂଗ୍ରାମର ଏନ୍ତୁଡ଼ିଶାଳ ଖୋର୍ଦ୍ଧାଗଡ଼କୁ ପୁନଃରୁଦ୍ଧାର କରାନଯିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ମହାସଂଘ ପକ୍ଷରୁ କୁହାଯାଇଛି । ତେଣୁ ଏହିସବୁ କାର୍ଯ୍ୟକ୍ରମମାନ ଯଥାଶୀଘ୍ର କରାନଯିବା ପ୍ରତିବାଦରେ ଆସନ୍ତା ୧୮ ତାରିଖ ପୂର୍ବାହ୍ନ ୧୦ ଘ. ସମୟରେ ଖୋର୍ଦ୍ଧାର ବରୁଣେଇ ପୀଠରୁ ପୁନର୍ବାର ଏକ ଜନଗର୍ଜନ ପାଇକ ସମାବେଶ ସଂଗଠିତ ହେବା ସହ ଦାବି ପୁରଣ ପାଇଁ ଦିଲ୍ଲୀଚଲୋ ଅଭିଯାନ ନିମନ୍ତେ ସମଗ୍ର ଓଡ଼ିଶା ସାରା ଜନଜାଗରଣ ସୃଷ୍ଟି କରିବା ଅଭିଯାନ ଆରମ୍ଭ ହେବ ବୋଲି ସେମାନେ ଏହି ସାମ୍ବାଦିକ ସମ୍ମିଳନୀରେ ଦୃଢ ଚେତାବନୀ ଦେଇଛନ୍ତି ।