ବାହାନଗା ଟ୍ରେନ ଟ୍ରାଜେଡ଼ି: ଏସସିବିରେ ଆହତଙ୍କୁ ଭେଟିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ

#କଟକ(ଏନ୍‌.ଏମ୍‌.): ବାଲେଶ୍ୱର ବାହାନଗା ଠାରେ ହୋଇଥିବା ଟ୍ରେନ ଦୁର୍ଘଟଣାରେ ଆହତମାନଙ୍କୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କଟକ ବଡ଼ମେଡ଼ିକାଲ (ଏସସିବି)ରେ ଭେଟିଛନ୍ତି । ପଶ୍ଚିମବଙ୍ଗର ଯେଉଁ ଆହତ ଯାତ୍ରୀମାନେ କଟକ ବଡ଼ ମେଡିକାଲରେ ଚିକିତ୍ସିତ ହେଉଛନ୍ତି, ସେମାନଙ୍କୁ ମମତା ଭେଟିବା ସହ ସ୍ୱାସ୍ଥ୍ୟାବସ୍ଥା ପଚାରି ବୁଝିଥିଲେ । ଏହି ଅବସରରେ ଆହତମାନଙ୍କ ଆଶୁଆରୋଗ୍ୟ କାମନା ମଧ୍ୟ କରିଥିଲେ । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶ୍ରୀମତୀ ବାନାର୍ଜୀଙ୍କ ସହିତ ଏକ ଟିମ୍ ବି ମଧ୍ୟ ଆସିଥିଲେ । ସେହି ଟିମ୍ ଭୁବନେଶ୍ୱରକୁ ଯାଇ ବିଭିନ୍ନ ମେଡିକାଲରେ ଚିକିତ୍ସିତ ହେଉଥିବା ଆହତଙ୍କ ଚିକିତ୍ସାର ଅନୁଧ୍ୟାନ କରିବା ସହ ଏସସିବିରେ ସ୍ଥିତି ଅନୁଧ୍ୟାନ କରିଥିଲେ । ଏଥି ସହିତ ମେଡ଼ିକାଲ କର୍ତ୍ତୃପକ୍ଷଙ୍କ ସହ ମମତା ଆଲୋଚନା ମଧ୍ୟ କରିଥିଲେ । ତେବେ ଟ୍ରେନଦୁର୍ଘଟଣାରେ ଆହତମାନଙ୍କୁ ଏସସିବିରେ ଚିକିତ୍ସା ଚାଲିଥିବାବେଳେ ୬ରାଜ୍ୟର ୧୪୦ଜଣ ରୋଗୀ ଏଠାରେ ଚିକିତ୍ସିତ ହେଉଛନ୍ତି । ସେମାନଙ୍କ ମଧ୍ୟରୁ ସର୍ବାଧିକ ୫୨ଜଣ ପଶ୍ଚିମବଙ୍ଗର ବୋଲି ଜଣାପଡ଼ିଛି । ତେବେ ଏହି ୫୨ଜଣଙ୍କ ସ୍ୱାସ୍ଥାବସ୍ଥା ସମ୍ପର୍କରେ ମମତା ସ୍ଥିତି ଅନୁଧ୍ୟାନ କରିଥିଲେ । ଅନ୍ୟପକ୍ଷରେ ପଶ୍ଚିମବଙ୍ଗର ଯେଉଁ ଯାତ୍ରୀଙ୍କ ମୃତ୍ୟୁ ହୋଇଛି, ଗତକାଲି ହାୱାଡ଼ାରେ ସେମାନଙ୍କର ମୃତଦେହ ପହଞ୍ଚିବା ପରେ ମମତା ଶେଷ ଦର୍ଶନ କରିଥିଲେ । ଶୋକସନ୍ତପ୍ତ ପରିବାରକୁ ସମବେଦନା ଜଣାଇବା ସହିତ ମୃତକଙ୍କ ପରିବାରକୁ ୫ ଲକ୍ଷ, ଆହତଙ୍କୁ ୨ ଲକ୍ଷ ଟଙ୍କା ଲେଖାଏ ଓ ସାମାନ୍ୟ ଆହତଙ୍କୁ ୫୦ ଓ ୨୫ ହଜାର ଟଙ୍କା ଲେଖାଏ ପ୍ରଦାନ କରାଯିବ ବୋଲି ସେ ସୂଚନା ଦେଇଛନ୍ତି । ଏଥି ସହିତ ଆହତ ନହୋଇଥିଲେ ମଧ୍ୟ ମାନସିକ ଆଘାତ ପାଇଥିବା ଯାତ୍ରୀଙ୍କୁ ୧୦ ହଜାର ଟଙ୍କା ଲେଖାଏ ଦିଆଯିବ ବୋଲି ମମତା କହିଥିଲେ । ଏହା ସହିତ ମୃତକଙ୍କ ପରିବାରର ଜଣକୁ ହୋମଗାର୍ଡ ଭାବେ ଚାକିରି ଦେବାକୁ ମମତା ଘୋଷଣା କରିଛନ୍ତି । ସେହିପରି ସମସ୍ତ ମୃତାହତଙ୍କ ପରିବାରକୁ ମାଗଣା ରାସନ ଦିଆଯିବ ବୋଲି ମମତା କହିଛନ୍ତି । ସୂଚନା ଅନୁଯାୟୀ, ଗତ ୨ତାରିଖ ଶୁକ୍ରବାର ସନ୍ଧ୍ୟାରେ ବାଲେଶ୍ୱର ଜିଲ୍ଲା ବାହାନଗାରେ ଟ୍ରେନ ଦୁର୍ଘଟଣା ଘଟିବା ପରେ ଶନିବାର ମୁଖ୍ୟମନ୍ତ୍ରୀ ମମତା ବାନାର୍ଜୀ ଘଟଣାସ୍ଥଳରେ ପହଞ୍ଚି ସ୍ଥିତିର ସମୀକ୍ଷା କରିଥିଲେ । ମୃତାହତଙ୍କ ମଧ୍ୟରେ ଅଧିକାଂଶ ପଶ୍ଚିମବଙ୍ଗର ଲୋକ ବୋଲି ଜଣାପଡ଼ିଥିଲା ।
ଅନ୍ୟପକ୍ଷରେ କଟକ ବଡ଼ମେଡ଼ିକାଲରେ ଚିକିତ୍ସିତ ରୋଗୀମାନଙ୍କ ସ୍ୱାସ୍ଥ୍ୟ ଏବେ ସ୍ଥିର ଥିବା ଜଣାପଡିଛି । ଏସସିବିରେ ଚିକିତ୍ସିତ ହେଉଥିବା ଯାତ୍ରୀମାନଙ୍କ ମଧ୍ୟର ୨ଜଣ ଆହତ ହାତ, ଗୋଡ଼ ହରାଇଛନ୍ତି । ତେବେ କଟକ ବଡ଼ ଡାକ୍ତରଖାନାକୁ ୨ଶହରୁ ଅଧିକ ରୋଗୀ ଚିକିତ୍ସା ପାଇଁ ଆସିଥିଲେ । ସେମାନଙ୍କ ଭିତରୁ ଗୁରୁତର ଥିବା ୭ଜଣଙ୍କୁ ଆଇସିୟୁରେ ଭର୍ତ୍ତି କରାଯାଇଥିବା ବେଳେ ୫୨ରୁ ଅଧିକ ସୁସ୍ଥ ହୋଇ ଘରକୁ ଯାଇଛନ୍ତି ଓ ୨ଜଣ ଲାମା(ଲେଫ୍ଟ ଏଗେନ୍‌ଷ୍ଟ ମେଡିକାଲ୍ ଆଡଭାଇସ୍‌)ରେ ଅନ୍ୟ ହସ୍ପିଟାଲକୁ ଚିକିତ୍ସା ପାଇଁ ଯାଇଛନ୍ତି । ବର୍ତ୍ତମାନ ୧୪୦ ଜଣ ସର୍ଜରି, ଅର୍ଥୋପେଡିକ୍‌, ନ୍ୟୁରୋ ସର୍ଜରି, ଟ୍ରମା ଓ ଚକ୍ଷୁ ବିଭାଗ କୋଠାର ୩ୟ ମହଲାରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି । ଏହି ମର୍ମନ୍ତୁଦ ଦୁର୍ଘଟଣାରେ ଜଣେ ବ୍ୟକ୍ତିଙ୍କର ଗୋଡ଼ ଅତ୍ୟଧିକ ଖରାପ ଅବସ୍ଥାରେ ଥିବାରୁ ତାହା କଟାଯିବା ସହ ଆଜି ଅସ୍ତ୍ରୋପଚାର କରାଯାଇ ଆଉ ଜଣେ ମହିଳାଙ୍କ ହାତ କଟାଯାଇଛି । ସେହିପରି ଅର୍ଥୋପେଡିକ୍‌, ଟ୍ରମାର ୬ଟି ଟେବୁଲରେ ଗତକାଲି ୯ଟି ଓ ଆଜି ରାତିସୁଦ୍ଧା ଆଉ ୨୦ଟି ଅସ୍ତ୍ରୋପଚାର କରାଯାଇଛି । ଆସନ୍ତାକାଲି ସୁଦ୍ଧା ୬୦ଜଣଙ୍କର ଅସ୍ତ୍ରୋପଚାର ସରିବ ବୋଲି ସୂଚନା ମିଳିଛି । ଆହତଙ୍କ ହାତ, ଗୋଡ ଓ ଅନ୍ୟାନ୍ୟ ଅଙ୍ଗ ଭାଙ୍ଗିଥିବା ଜଣାପଡିଛି । ସେହିପରି ସର୍ଜରି ବିଭାଗରେ ଲିଭର, ଅନ୍ତଃନଳୀରେ କ୍ଷତ ହେବା ଫଳରେ ୫ଜଣଙ୍କର ଅସ୍ତ୍ରୋପଚାର କରାଯାଇଛି । ୩ଜଣଙ୍କ ଛାତିରୁ ଜମାଟ ବାନ୍ଧିଥିବା ରକ୍ତ କଢ଼ାଯାଇ ପାଇପ୍ ଲଗାଯାଇଛି । ନ୍ୟୁରୋସର୍ଜରି ଓ ସର୍ଜରିରେ କେତେ ଆସ୍ତ୍ରୋପଚାର କରାଯିବ ତାର ନିରୀକ୍ଷଣ କରାଯାଉଥିବା ଏସସିବି ପକ୍ଷରୁ ସୂଚନା ଦିଆଯାଇଛି । ପାଖାପାଖି ୨ଶହ ୟୁନିଟ୍ ରକ୍ତ ଆହତଙ୍କ ଚିକିତ୍ସାରେ ବ୍ୟବହାର ହୋଇସାରିଥିବା ଜଣାପଡିଛି । ଆହତଙ୍କ ମଧ୍ୟରେ ୬ଟି ରାଜ୍ୟ ଯଥା; ଓଡିଶା, ପଶ୍ଚିମବଙ୍ଗ, ବିହାର, ଝାଡ଼ଖଣ୍ଡ, ଉତ୍ତରପ୍ରଦେଶ ଓ ଆସାମର ରୋଗୀ ଚିକିତ୍ସିତ ହେଉଛନ୍ତି । ପଶ୍ଚିମବଙ୍ଗର ସର୍ବାଧିକ ୫୨ଜଣ, ବିହାରର ୩୦ଜଣ ଓ ଓଡ଼ିଶାର ୨୬ଜଣ ରୋଗୀ ଚିକିତ୍ସିତ ହେଉଛନ୍ତି । ଅନେକ ରୋଗୀଙ୍କ ‘ମଲ୍ଟିପଲ୍ ଫ୍ରାକ୍‌ଚର୍ ରହିଛି । ଏସସିବିରେ ସମସ୍ତ ରୋଗୀଙ୍କର ନିୟମିତ ଭିତ୍ତିରେ ଚିକିତ୍ସା କରାଯିବା ସହ ରୋଗୀଙ୍କ ବିଭିନ୍ନ ପରୀକ୍ଷା ଓ ଡାକ୍ତରଙ୍କ ମଧ୍ୟରେ ସମନ୍ୱୟ ରଖି ରିକିତ୍ସା କରାଯାଉଥିବାରୁ ମମତା ଦିଦି ଓଡ଼ିଶାର ସ୍ୱାସ୍ଥ୍ୟସେବା ବ୍ୟବସ୍ଥାକୁ ମଧ୍ୟ ଖୁବ ପ୍ରଶଂସା କରିଥିଲେ । ତେବେ ଏସସିବିରେ ସ୍ୱତନ୍ତ୍ର ହେଲ୍ପଲାଇନ୍ ନମ୍ବର ଜାରି କରାଯାଇଛି । ଜିଲ୍ଲା ପ୍ରଶାସନ ତଥା ବିଭିନ୍ନ ସଂସ୍ଥା ପକ୍ଷରୁ ନିୟନ୍ତ୍ରଣ କକ୍ଷ, ସୂଚନାକେନ୍ଦ୍ର ବି ଖୋଲାଯାଇଛି । ଏସସିବି ଅଧୀକ୍ଷକ ପ୍ରଫେସର ଡାକ୍ତର ସୁଧାଂଶୁ ଶେଖର ମିଶ୍ର, କୁଳସଚିବ ଡକ୍ଟର୍ ଅବିନାଶ ରାଉତଙ୍କ ତତ୍ତ୍ୱାବଧାନରେ ବ୍ୟବସ୍ଥା ତଦାରଖ କରାଯିବା ସହ ଡାକ୍ତର, ଡାକ୍ତରୀ ଛାତ୍ରଛାତ୍ରୀ, ନର୍ସ, ସ୍ୱାସ୍ଥ୍ୟ କର୍ମଚାରୀ ଓ ଚତୁର୍ଥଶ୍ରେଣୀ କର୍ମଚାରୀମାନେ ରୋଗୀଙ୍କୁ ସେବା ଯୋଗାଉଛନ୍ତି । ଅନ୍ୟପକ୍ଷରେ ବାହାନଗା ଟ୍ରେନ ଦୁର୍ଘଟଣାର ସିବିଆଇ ତଦନ୍ତ ନିର୍ଦ୍ଦେଶ ଦିଆଯାଇଥିବା ବେଳେ ମମତା ଏହାକୁ ନାପସନ୍ଦ କରିଛନ୍ତି । ସେ କହିଛନ୍ତି, ସିବିଆଇ କ’ଣ ତଦନ୍ତ କରିବ? ସିବିଆଇ କ୍ରିମିନାଲ କେସ୍ ତଦନ୍ତ କରେ, ଏହା ଏକ ଆକ୍ସିଡେଣ୍ଟ । ମମତା ୨୦୧୨ମସିହାରେରେ ଜ୍ଞାନେଶ୍ୱରୀ ଏକ୍ସପ୍ରେସ ତଦନ୍ତ ନିର୍ଦ୍ଦେଶ ଦେଇଥିଲେ । ହେଲେ ଘଟଣକାୁ ୧୨ ବର୍ଷ ବିତିଲାଣି, ଏଯାବତ ସିବିଆଇ ରିପୋର୍ଟ ଦେଇନି । ତେଣୁ ସିବିଆଇ କ’ଣ ତଦନ୍ତ କରିବ? ଶୁକବ୍ରାର ସନ୍ଧ୍ୟାରେ ବାଲେଶ୍ୱର ଜିଲ୍ଲା ବାହାନଗାରେ ଟ୍ରେନ ଦୁର୍ଘଟଣା ଘଟିବା ପରେ ଶନିବାର ମମତା ବାନାର୍ଜୀ ଘଟଣାସ୍ଥଳରେ ପହଞ୍ଚି ସ୍ଥିତିର ସମୀକ୍ଷା କରିଥିଲେ ।